Die einde van die oue en die begin van die nuwe

Bankbesonderhede

Hartsmense

Hartsmense ... 

Na 'n besige en miskien slegte jaar, is dit nodig om tot stilstand te kom en die jaar in oënskou te neem. Op jou eie of tussen hartsmense is dit die beste plek. Hartsmense is nie net mense wat aan jou aandag gee of saam met wie jy lekker dinge doen nie. Dit is mense wat jou hart verstaan; mense rondom wie jy jouself kan wees, mense wat tyd het vir jou, mense wat na jou luister, vir jou bid en wat saam met jou lag en huil. 

Na 'n jaar wat uitdagings stel aan jou finansies, jou werksituasie, jou emosionele en geestelike aspek, die misdaad waarvan ons almal al 'n slagoffer is of was, besef  'n mens hoe ongelooflik belangrik dit is dat jy jouself omring met jou hartsmense. Dit sluit die duisende gesiglose "followers" uit wat alles wat jy op sosiale media kwytraak, beaam en "like." 

 
Mag jy in die nuwe jaar met nuwe krag en werkywer jou taak aanpak. Gereed vir die soms onmoontlike eise wat aan jou gestel word, wetend dat jy elke hekkie nie alleen aanpak nie.

Mag jy in 2025 omring word deur baie genade!

Maandag-gedagtesaad

Oudtroepies genooi na 'n heerlike kuieroggend

Veterane van die nasionale diensplig wat in Kimberley en omgewing woon, word na 'n saamkuieroggend vroeg in Januarie uitgenooi. Die geleentheid word op Woensdag, 8 Januarie om 10:00 by die NG Kerk Dutoitspan by Rosestraat 4 in Beaconsfield aangebied.

Belangstellendes kan hul naam, ID-nommer en die woord "Kimberley" in 'n WhatsApp-boodskap na 066-518-0402 stuur om hulle plek te bespreek!

Hope pryse is op die spel, geskenkpakkies gaan uitgedeel word asook 'n inkopiegeskenkbewys.  'n Spreker en musiek gaan deel van die kuieroggend uitmaak.

Moenie hierdie spesiale kuiergeleentheid misloop nie. Klik HIER om die berig in Noordkaap Bulletin te lees.

Onthou: Bespreek betyds!

Mossiestilte: 1 Kor 1:9

God is getrou, deur wie Hy julle geroep het tot die gemeenskap met sy Seun Jesus Christus, onse Here. 

Ons het Christus se geboortedag gevier, met verskeie redes: 

Sommige om kwaliteittyd met hul geliefdes deur te bring. Sommige om weer net lekker te kuier met wie ookal en lekker te kan drink; die geleentheidsdrinkers, elke geleentheid moet gebruik word vir drink. Ander om in gebed die Here Jesus, te dank en te verheerlik, vir sy reddingsdaad, op God se gegewe tyd in sy raadsplan, en hul geliefdes weer aan God te wy.

Onthou God het jou geroep in sy getrouheid tot die gemeenskap met sy Seun Jesus Christus, onse Here.

Dank God dat sy geregtigheid jou die reg gee, deur sy groot genade in ChristusJesus, om mede-erfgenaam, saam met sy Seun in die koninkryk van God te wees.  Hy sal jou nooit vergeet nie. Hy is altyd daar vir jou. 

Grote God, ek gee aan U al die eer en heerlikheid elke dag. U is die enigste onveranderlike in my lewe. U bly getrou van geslag tot geslag. Deur u genade bly U die bron van my lewe. U het my en my geliefdes uitverkies van voor die grondlegging van die wêreld. Ek is geroep deur U tot die gemeenskap met u Seun Jesus Christus, my Here. Vandag sal ek u Naam aan die wêreld bekend maak, U my redder. Amen. 

Woorde van die bekende Izak de Villiers:

“Van tyd kan 'n mens baie dinge sê. Tyd heel wonde en laat 'n mens vergeet. Tyd vlieg verby en namate jy ouer word, lyk dit of dié al hoe vinniger gaan. Jy kan tyd nie terugkry nie, want wat verby is, is verby. En jy kan jou tyd verspeel, of só geïnteresseerd raak in iets dat jy nie agterkom dat die tyd verbygaan nie. Verliefdes kom tyd selde agter.

“Die Prediker het 'n halwe hoofstuk geskryf oor die feit dat alles 'n bepaalde tyd het: om te huil en te lag, om te plant en uit te roei, om te lewe en te sterwe, om lief te hê en te verlaat (vgl Pred 3). Ja, en die Prediker was nie 'n baie vrolike man nie. 'n Mens verkies die optimisme van Longfellow:

“Lives of great men all remind us
we can make our lives sublime
and, departing, leave behind us
footprints in the sands of time
(uit: A Psalm of Life).

“Ons hoop ons kan 'n voetspoor in die sand van die tyd agterlaat, dalk vir iemand om te volg. Totius het gesê dat wanneer hy die grens van die ewigheid oorsteek, hy die voetspoortjies van sy heengegane kinders voor hom sal sien om hom huis toe te lei. Dis alles mooi beelde, maar Dawid s'n is die mooiste: 'My tye is in u hand ...' (Ps 31:16; 53-vertaling).

“Dis of 'n mens in jou verbeelding 'n groot hand sien, of liewer twee hande saam gehou sodat dit 'n bakkie vorm, met alles, ook my hele aardse program daarin. Daardie hande is beskermend, onderhoudend, koesterend, ewig, sterk en veilig. Wat ook al met my gebeur, gebeur binne die beskermende sfeer van daardie Goddelike hande. Dis natuurlik 'n baie menslike beeld wat Dawid vir God gebruik, maar dit druk die gevoel van God en sy totale heerskappy en liefde uit. Dis tog Dawid wat gesê het: Selfs vir my straf wil ek liewer in die hande van die Here as dié van mense val ...

“Daarmee kan ek, mens, my vereenselwig - met oorgawe en berusting.”

Uit: In die Teenwoordigheid van God deur Izak de Villiers

[Kuier HIER vir interessante stukkies, brokkies en dagstukkies.]

Afkondiging: Bid saam met ons vir ...

1. Ons Huis - die tehuis vir bejaardes - vir die inwoners, vir hulle in die siekeboeg en die personeel.
2. Sally Aucamp - die tehuis vir volwasse gestremdes - die inwoners, siekes, hulle wat mismoedig en depressief is en die personeel.
3. alle gemeentelede wat siek is, swaarkry en tans sonder werk is.
4. alle huwelike en gesinne!
5. vrede, verdraagsaamheid en wedersydse respek onder mekaar wat wyer kan uitkring.
6. ons gemeente dat ons God 1ste sal stel!
7. elke gelowige dat hulle die vrug van die Gees sal uitstraal.

8. ons land, regering en vir elke landsburger. (1 Tim 2:1-7)  

9. die verkondiging van U Woord in 'n wêreld wat al verder van U af wegdryf.

10. hulle wat in gevaarlike en moeilike omstandighede U Woord verkondig.

Die krag van gebed kan nooit onderskat word nie! Elkeen van ons het 'n verantwoordelikheid om vir mekaar te bid.

Kerkgenotjies: Kinderlogika

Die ma ry met haar twee kleintjies van drie en vyf jaar oud in die kar. Die kinders is onhebbelik en sy raas en raas, maar hulle wil nie luister nie, wat nog te sê stilsit. Sy raak toe baie kwaad en trek van die pad af, dissiplineer die twee sommer goed met die plat hand, en laat hulle weer agter inklim en sê: "Nou wil ek nie weer 'n woord hoor nie."

Na 'n paar minute sê die seuntjie: "Mamma, ek wil iets sê."

Sy sê: "Net vinnig, want jy is veronderstel om stil te bly."

Hy: "Ek wil net vir Mamma sê, liewe Jesus gaan hiervan hoor." 

ooOOoo

Klein Kabous is gefassineerd met die groot ou Familiebybel met die bladsye van dun, brose papier. Hy maak dit oop en blaai versigtig daardeur. Meteens val iets tussen twee van die bladsye uit, en Kabous tel dit dadelik, maar baie versigtig op en kyk baie aandagtig daarna. Dis 'n ou boomblaar wat baie jare gelede tussen die bladsye platgedruk is.

"Ma, kyk net wat ek gekry het!" gil Kabous.

"Wat het jy daar, my kind?" vra sy ma.

Met 'n frons op sy voorkop sê Kabous: "Ek dink dis Adam se klere."   

Statistiek: 'n Dutoitspan-kerspresent is 181 000 e-besoeke!

Dink hieroor: Wat is lewe?

As jy kan vergewe

sonder om 'n woord te sê.

As jy liefde in iemand se oë kan sien

sonder om te vra.

As jy kan glimlag

sonder 'n rede.

As jy als gee met jou hart.

As jy kan luister na die stem van God

sonder om te twyfel

DIS LEWE!

Kerswense

Terugblik: Knagende muis het glo aandeel in Stille Nag se skepping gehad

Beroemde Kerslied verskaf vreugde in 230 tale

Feitlik geen beskaafde taal bestaan ter wêreld waarin die ou bekende Kerslied Stille Nag, Heilige Nag nie in een of ander vorm opgeneem is nie. 'n Roomse priester, pater Josef Keller, in die suide van Duitsland het weergawes van die lied in 230 tale gevind.

Die eenvoud van die lied se woorde, die diepte van die boodskap daarin opgesluit, het dit deur die jare waarskynlik dié Kerslied gemaak. Dié eenvoud kan ook deurgetrek word tot by die ontstaan van die lied.

Volgens oorlewering het selfs 'n muis 'n aandeel daaraan gehad.

Stille Nag, Heilige Nag is op 24 Desember 1818 deur 'n Oostenrykse onderwyser, Franz Xavier Gruber, gekomponeer. Die woorde is binne twee uur deur die dorpie Oberndorf se predikant Josef Mohr geskryf.

Gruber was destyds ook die plaaslike kerk se orrelis. Die dag voor Kersfees het hy en Mohr in die kerkie gestaan en gesels oor hoe hulle die Kersdiens daardie jaar sonder orrelmusiek kan hou, want daar was fout met die orrel en dit sou eers ná die feesdae herstel kon word.

Volgens oorlewering is vasgestel dat 'n muis 'n gat in die orreltjie se blaasbalk geknaag het, gevolglik kon dit nie behoorlik bespeel word nie. 

Gruber stel toe voor dat 'n Kerslied gevind word wat meerstemmig en met kitaarbegeleiding gesing kan word.

Mohr, 'n knap sanger, het saamgestem en gesê die orrelis kan die woorde oor so twee uur by hom kom haal. 

Twee uur later het Gruber die woorde gehad, dadelik huis toe gestap deur die sneeu wat kniediep gelê het en begin werk aan 'n melodie vir Stille Nag, Heilige Nag.

Om middernag het die mense van Oberndorf en die boere in die omgewing die kerkie volg gepak. Gruber en eerw Mohr het langs die orrel stelling ingeneem, eersgenoemde met sy kitaar.

Hy het begin speel en hulle het gesing. Die gemeente was gou betower deur die lied.

Toe hulle die lied die tweede keer sing, het die gemeentelede begin inval. Daarna het dit nie lank geduur voordat almal saamgesing het nie.

Die lied het algaande deur die valleie van Oostenryk versprei. Volgens musiek-geskiedskrywers is dit in 1831 deur twee susters by 'n Kersdiens in Leipzig gesing. Dit is toe genoem Volkslied uit die Zillertal of dan Volkslied uit die Zillervallei. 'n Jaar later is dit op 'n Kersprogram aangedui as 'n Tiroolse volkslied. In 1834 is dit die eerste keer gedruk en is die note formeel opgeteken.

Meester Gruber het nie geweet hoe wyd sy lied bekend sou word nie. Hy is op 7 Januarie 1863 oorlede sonder dat hy geweet het hoe sy lied die wêreld aangryp.

[Bron: Die Volksblad, Vrydag 24 Desember 1999, bl.3]

'n Rowwe grondpadjaar

* Daar was dae wat ek die mooiste uitsig gehad het en dan was daar dae wat ek kaalvoet oor die klippies moes hardloop, om net op 'n beter plek te kom as gister.

* Ja soms op my knieë geval omdat ek net nie kans gesien het om verder te loop nie.

 
* Dan was daar dae waar ek rustig kon loop sonder omkyk of omdraai.

* Ek het wel die mooiste blommetjies in die veld gepluk, van hulle het ek op pad verloor, maar dis okay.

* Ja, daar was dorings wat my vele kere gesteek het sodat ek vir dae net nie meer kon loop nie, maar dit was ook okay.

*Dit was lang paaie, soms sonder water, soms sonder suurstof, soms met geskeurde skoene, maar dit was goeie paaie.

Maar, het ek iets geleer uit die jaar? Absoluut!

* Dat niemand die pad vir jou kan stap nie, maar wel net saam met jou.
* Dat niemand jou gelukkig kan maak as jy nie self gelukkig is nie.
* Dat niemand jou tas vir jou gaan sorteer nie, net jy self moet.
* Dat min mense jou enduit gaan help.
* Dat beloftes soms leë woorde is.
* Dat opgee nooit n opsie is nie.
* Dat mens soms net moet sit en rustig word en dankie sê.
* Dat daar altyd iemand sal wees wat in die middel van jou reis sal staan, omdat hulle dit nie vir jou gun nie.
* Dat mens net die beste weergawe van jouself kan wees en om nooit jou moed te verloor in iets wat mens regtig wil bereik nie.
Ja, daar was goed én sleg maar ek sien uit na die nuwe pad wat voorlê.

Dankie aan elkeen wat dit saam met my enduit gemaak het deur ons Vader se genade en liefde - ek het by elkeen iets geleer.

Wat nou voorlê weet ons nie, maar wat ek wel weet is dat:
* Dat ek daagliks my geloof moet versterk in God se Woord.
* Meer moet vertrou.
* My God loof en prys vir Sy genade en goedheid.
* Op my knieë in aanbidding moet bly!
* Soveel meer suurstof inkry om my nuwe roete aan te pak.

Reis veilig,
wees lief vir mekaar,
help mekaar,
droom saam,
lag saam,
maak tyd vir mekaar.

Dankie vir jou stukkie hart wat ek saam op my reis deur 2024 kon dra.
* Mag die Here ons lei op die onbekende pad van 2025 en mag ons nooit vergeet van Sy Groot Genade nie ...
* Mag die laaste paar dae van 2024 net vol sonskyn en liefde wees en mag ons God en Vader altyd oor jou waak.
* Mag 2025 gevul wees met die keur van Sy seëninge in jou lewe.

God seën jou!!!

[Dankie, Marguerite vir hierdie mooi wense. Waardeer al jou 2024-bydraes. Seën vir jou!]

Verjaardagwense

Antoinette (Sally Aucamp), die Here is rondom jou om jou te beskerm. Mag Hy jou ryklik seën op hierdie spesiale dag. Mag Hy vir jou die krag en die genade gee om elke dag met al sy baie uitdagings te kan hanteer. Gelukkige verjaardag. 

Maandag-gedagtesaad

Kersdagdiens

Mossiestilte: Hos. 13:14

Uit die mag van die doderyk sal Ek hulle loskoop, Ek sal hulle verlos van die dood. Dood, waar is jou pestilensies? Doderyk, waar is jou verderf? Berou bly vir my oë verborge. 

'n Wonderlike profetiese woord wat in vervulling gekom het, wat jy vandag kan aanneem. God het jou nou losgekoop van die doderyk. Jesus se bloed het jou bevry en die dood is oorwin. Die doderyk het geen verderf meer om jou te vernietig nie. Die berou van God bestaan nie meer nie, want deur Jesus Christus se bloedoffer, is onverstandigheid en ongeregtigheid verborge vir die oë van God en is sy grimmigheid afgewend van jou af.

Here, ons God, U is ons almal se God. U het my sondes verander in geregtigheid. U het arm geword sodat ek deel kan hê aan die rykdom van u heerlikheid. U het gesterf sodat ek die ewige lewe kan hê. Jesus, die Seun van God is my enigste en ewige Koning. U, my Koning, het my losgekoop van die doderyk. U, sal altyd geloof en geëer word deur alle volke. Elke knie sal buig en elke tong bely dat U, Jesus Christus, die Here is; die liefling van my siel. Amen.

[Aangestuur deur Pieter Swanepoel.]

Kerkgenotjies: Kersfees

Kersfees is om die draai en in een van Kimberley se groot winkelsentrums sit Vader Krismis op 'n groot stoel en praat met die kleintjies wat verby hom loop.

Klein Peter is baie bly om Vader Krismis te sien en klim pens en pootjies op sy skoot. Vader Kersfees vra die heel belangrikste vraag in die wêreld: "En wat wil jy vir Kersfees hê?"

Klein Peter staar geskok na Vader Krismis, voordat hy met 'n bewende stemmetjie vra: "Het jy dan nie my e-pos gekry nie?"   

ooOOoo

'n Mamma vra haar seuntjie wat hy graag vir Kersfees wil hê.

"Ek wil 'n bababoetie hê," is sy antwoord.

"O, maar dit is 'n groot versoek," sê sy ma. "Hoekom wil jy 'n boetie hê?"

"Want 'n mens kan nie altyd al die skuld op die hond pak nie!" verduidelik hy.

ooOOoo

'n Kleuterskoolonderwyseres hou 'n ogie oor haar klas vol kinders, terwyl hulle tekeninge maak van Kersfees en al die karakters wat daarin voorkom. So nou en dan stap sy rond om te sien wat die kinders teken, en gaan staan by 'n paar van hulle om te gesels oor wat hulle uitbeeld.

Sy kom by klein Pulani, wat baie hard aan die werk is, en vra wat haar tekening uitbeeld.

Pulani: "Ek teken vir God." 

Die onderwyseres huiwer vir 'n oomblik en sê toe: "Maar niemand weet hoe God lyk nie."

Pulani sê: "Hulle sal binnekort." 

Mieta se gebed

More my Jirre,
Vandag is ou Mieta vroeg op
ek sien daar ver agter die berg
kom wys die son sy kop

Die vlaktes is droog
dit soek water my Jirre
die son brand
daar op my draad se klere

My Jirre die laaste reent
het vir Mieta trane gebring
maar ek het weer opgebou
en my hart het aanhou sing

Die land bid vir reent
die boere kry swaar
Jirre skud daai hemel
dat die reent neer kan daal

My Jirre die son brand
hard op die droe aare
maar ou Mieta my Jirre
sy maak nie besware

Sy los die werke van die Groot Man
In Sy eie hande
maar ou Mieta bid saam die boere
vir bietjie water vir hul lande

Seen ons boere my Jirre
en seen hierdie land
doen U die werk daarbo
en ou Mieta sal bid aan hierie kant

Dankie my Jirre
Amen

[Dankie, Rosetta, vir die aanstuur. Waardeer!]

Statistiek: Dankie vir elkeen van die 179 000 e-besoeke!

Verjaardagwense

Vincent (Sally Aucamp), geniet 'n geseënde nuwe lewensjaar en behou jou vertroue in God. Mag Hy vir jou die krag en die genade gee om elke dag met al sy baie uitdagings te kan hanteer. Geniet jou spesiale dag.

Think about it: Being a parent is a constant work-in-progress

You will teach them to fly,

but they will not fly your flight.
You will teach them to dream,

but they will not dream your dream.
You will teach them to live,

but they will not live your life.
Nevertheless,

in every flight,

in every life,

in every dream,

the print of the way you taught them,

will remain ...
[Mother Teresa] 

Mossiestilte: Joh. 15:5

Ek is die wynstok, julle die lote. Wie in My bly, en Ek in hom, hy dra veel vrug; want sonder my kan julle niks doen nie.

Jy is ingeënt op die enigste ware wynstok, Jesus Christus. Slegs in Hom kan ons veel vrug dra, want Hy alleen gee ons die vermoë om die vrug te kan dra, want sonder Hom kan ons niks doen nie. Ten spyte van jou swakhede gee God aan jou die krag om goeie vrugte te dra wat by die bekering pas.

Here, my God, ek verlustig myself in u heerlikheid. Ek is 'n loot en moet vrug dra. Die wynstok dra nie vrugte nie, maar stuur krag na die lote wat vrugte moet dra. Dankie Here dat U my deelgemaak het van u koninkryk, al is ek swak en geneig tot kwaad, maar U sal my bo my skaamte verhef. Ek sê weer net dankie en met blydskap in my hart, wil ek U loof en prys. Amen.

[Aangestuur deur Pieter Swanepoel.]

Versekering vir 2025!

So hardloop die laaste paar dae van 2024 ook deur die shredder ...
in daardie bondel papierrepies lê al jou vreugde, drome, liefde, hartseer en verdriet van 'n hele lange jaar ...
wat 'n Hemelse Voorreg om te weet jy was teenwoordig in 2024!
Dit was nog 'n jaar van onverdiende Genade!
Al was die jaar hoe moeilik,
al was die kruispaaie baie,
God het jou deurgedra,
want jy lees hier,
en jy het dit gemaak!
Onthou, saam met God bly jy 'n WENNER,
maak nie saak wat die situasie is nie ...
met jou hand in God se Hand,
sal jy altyd as wenner uit enige stryd tree!
'n Onbekende 2025 lê op die horison en wag, maar ons kan blymoedig ons voete op die 2025-pad sit.
Want ons weet ons Hemelse Vader loop vooruit!

[Aangestuur deur Ena Coetzer - waardeer!]

Maandag-gedagtesaad

Kersdagdiens

Mossiestilte: Ps. 65:4

Ongeregtige dinge het die oorhand oor my gehad, maar U versoen ons oortredinge. 

Die mens se weë is wetteloosheid en hy soek sy eie weë. Niemand wil God dien nie. Maar God ken die ongeregtigheid van die mens en sal aan jou siel lewe gee en nie toelaat dat jou voet wankel nie. God sal jou uitverkies en laat nader kom om in sy voorhowe te staan.

Dankie, onse Vader, dat U met my weë van wetteloosheid gehandel het en aan my vertroosting gebring het. U het my siel rustig gemaak en my skoongewas. Ek is U ewig dankbaar en kom nader na U, om u guns te ontvang wat ek nie verdien nie. U verryk my grootliks; U stroom o God, is vol water. U seën my, u uitspruitsel wat U natgemaak het. Amen.

[Aangestuur deur Pieter Swanepoel.]

Oesmaande: Desember

Kerkgenotjies: Kersfees

“Wat gee jy jou ma en pa vir Kersfees Jannie?”
“’n Lys van alles wat ek wil hê juffrou.”

ooOOoo

Die afgelope vyf jaar het Eskom die Kers terug in Kersfees gesit - ek wonder of hulle hierdie Kersfees dit ook gaan doen.

ooOOoo

Definisie van 'n ALMANAK: Dis 'n kaart waarop jy kan sien hoe om by Kersfees uit te kom.

Verjaardagwense

Eddie (Sally Aucamp), moet nooit vergeet hoe spesiaal die Here jou gemaak het nie. Baie geluk met jou verjaardag. Mag Hy vir jou die krag en die genade gee om elke dag met al sy baie uitdagings te kan hanteer. Geniet jou spesiale dag. 

Did you notice today's date is 12/12

See what the Bible says about today's date: 

🗝️Genesis 12:12. 

You will not die you will live.

🗝️Exodus 12:12. 

I will execute judgment against your enemies. 

🗝️Deuteronomy 12:12 

You and your households will be joyful in God's presence.

🗝️Joshua 12:12 

You will defeat all your enemies

🗝️1 Samuel 12:12 

A new and a better king will rule in your life.

🗝️2 Samuel 12:12 

The evil plans of your enemies will be made public.

🗝️1 Kings 12:12 

Your favours shall return to you.     

🗝️2 Kings 12:12 

You will build your own house.

 Today is the first day of the rest of your life!!!! 

[Thank you, Rosetta]

Einde-van-die-jaar-dankies: Mossiestilte

Think about it: Mother Teresa's quote

"It's not how much we GIVE but how much love we put into giving."

Einde-van-die-jaar-dankies: Gemeente

Mossiestilte: Jud. 1:20

Maar julle, geliefdes, moet julleself opbou in julle allerheiligste geloof en in die Heilige Gees bid 

Ervaar jy nou 'n moeilike, donker, koue, droë en alleentyd? Dan is dit nou die tyd om jou wortels soos die van 'n boom, dieper in die grond te vestig. Terwyl jou blare afgeval het en jy nie nou vrug kan dra nie. Bid nou meer en vertrou die Here. Binnekort kom die lente en die tyd wat jy nuwe blare en blomme moet maak. As jy jou lewe dieper inwortel in God se krag, sal jy op die regte tyd weer blare, blomme en vrugte kan gee. Dit gaan nie oor jou nie, maar oor wat jy vir ander kan gee, wat jou werk in die lewe is.

Dankie Here, vir u seëninge oor my, u barmhartigheid oor my, u genade wat ek elke dag kry. Strome van seën tref my elke dag. Strome van genesing, van rykdom, van blydskap en vreugde, van vriende en familie, van geloof in U. U sê duidelik dat strome van lewende water sal uit ons uitborrel, die wat in U glo. Ons het so baie om uit te deel en aan ander te gee. Ek is opgebou in die Allerheiligste en ek wil net in u Heilige Gees bly, sodat ander van my vrugte kan kry. Amen.

[Aangestuur deur Pieter Swanepoel.]

Einde-van-die-jaar-dankies: Orrelis

Wat is liefde?

Dis 'n houtkruis teen alleenheid,

'n Steunpilaar in pyn,

'n Vuurhoutjie en 'n olielamp,

Wanneer jou lewenslig begin kwyn.

Dis 'n skouer om op te huil,

Wanneer die wêreld jou soms druk,

'n Hand wat weet wanneer om jou vas te hou,

en wanneer om vir jou 'n roos te pluk.

Dis 'n oor wat na jou luister,

Al praat jy soms nie sense,

'n Stem wat vir jou fluister:

"Jy's 'n dierbare mens."

Dis 'n kombers teen die koue,

'n Sambreel teen die reën,

'n Fort waardeur geen wind kan waai,

Selfs wanneer die donderweer buite dreun.

Dis 'n telefoonoproep uit die bloute,

'n Drukkie wanneer jy dit die nodigste het,

En wanneer woorde oorbodig is,

Word liefde 'n stille gebed.

Bo alles is Liefde 'n gawe van God -

Geen mens kan daarsonder klaarkom -

Dis die kern van Sy grootste gebod.

[Anoniem]

Einde-van-die-jaar-dankies: Diensgroepe

Is jy voortdurend bekommerd?

“Dit is nie God se wil dat jy met voortdurende bekommernis saamleef nie. Dit is nie sy wil dat jy elke dag met angs en ontsteltenis tegemoetgaan nie. God het jou gemaak vir meer as ’n lewe vol bekommernisse wat jou asem steel en angstigheid wat jou gedagtewêreld verskeur. God beplan ’n nuwe hoofstuk vir jou lewe, en Hy is gereed om dit te begin skryf.”

Max Lucado

Maandag-gedagtesaad

Tot siens en baie welkom

Malan, wat as leierouderling uittree,wil ons baie dankie sê vir sy toewyding en hulpvaardigheid wat hy aan die dag gelê het om sy taak suksesvol uit te voer. Ons waardeer al sy insette.

Terselftertyd wil ons as gemeente vir Henry baie geluk en welkom sê. Hy vat die leisels by Malan oor. Baie seën en sterkte vir hierdie taak. Mag die saak van die Here van krag tot krag gaan.  

Afkondiging: Bid saam met ons vir ...

1. Ons Huis - die tehuis vir bejaardes - vir die inwoners, vir hulle in die siekeboeg en die personeel.

2. Sally Aucamp - die tehuis vir volwasse gestremdes - die inwoners, siekes, hulle wat mismoedig en depressief is en die personeel.
3. alle gemeentelede wat siek is, swaarkry en tans sonder werk is.
4. alle huwelike en gesinne!
5. vrede, verdraagsaamheid en wedersydse respek onder mekaar wat wyer kan uitkring.
6. ons gemeente dat ons God 1ste sal stel!
7. elke gelowige dat hulle die vrug van die Gees sal uitstraal.

8. ons land, regering en vir elke landsburger. (1 Tim 2:1-7)  

9. die verkondiging van U Woord in 'n wêreld wat al verder van U af wegdryf.

10. hulle wat in gevaarlike en moeilike omstandighede U Woord verkondig.

Die krag van gebed kan nooit onderskat word nie! Elkeen van ons het 'n verantwoordelikheid om vir mekaar te bid.

Mossiestilte: Rom. 16:25-26

Aan Hom dan wat magtig is om julle te versterk volgens my evangelie en die prediking van Jesus Christus, ooreenkomstig die openbaring wat eeue lank verswyg is, maar nou geopenbaar is en deur die Skrifte bekend gemaak is onder al die heidene, volgens die bevel van die ewige God, tot gehoorsaamheid van die geloof  ...

God het sy Woord bewaar wat Hy reeds voor die grondlegging van die wêreld gespreek het en nou ook genadiglik aan jou gebring is, sodat jy mag deelhê aan sy genade volgens die belofte aan Abraham en Isak. Jy is nou saam met die uitverkore volk Israel, deelgenoot aan die erfenis van die Almagtige God, deur die bloed van Jesus Christus, wat jou ingekoop het by God se ewige erfenis. Jy het niks gedoen om dit te verdien nie, maar die liefde van die Vader is ryk aan barmhartigheid en genade en gee aan almal na die rykdom van sy heerlikheid. 

Dankie onse Vader, dat U die Woord vir my ook gebring het en lewendig gemaak het om in my te kom woon. Ek het nou 'n dienaar geword van Christus in die bediening en lydsaamheid om die woord van God te vervul, naamlik die verborgenheid wat van die eeue en geslagte af verborge was, maar nou aan my en sy heiliges geopenbaar is. My hoop is nou op Christus, en in sy heerlikheid. Nou kan elke mens volmaak wees in Christus (sien Kol. 1:24-28). Amen.

[Aangestuur deur Pieter Swanepoel.]

Oesmaande: Desember

Statistiek: Dankie vir elkeen van die 178 000 e-besoeke!

Dankie, Dagbestuur vir 2024!

Dankie vir jul entoesiasme waarmee julle jul taak verrig het. Dankie vir al die harde werk wat julle deur die loop van die jaar ingesit het en dankie vir die geestelike voetspore wat julle laat - daar waar julle arbei. Seënwense vir hierdie Kersgety.

Foto's: Elsa Minne