Die eerste en basiese belydenis van Christene oor God, is dat Hy die Skepper is. God word deurgaans beskryf as die Een wat bou, nie afbreek nie.
Daarteenoor word die duiwel, die bose, van meet af uitgebeeld as die groot breker; die een wat dít wat God goed en mooi geskape het, afbreek en probeer vernietig.
Regdeur die Bybel kan die werk van God en dié van die bose hieraan onderskei word - God is die Skepper, die Heelmaker en Satan die groot verwoester. Dit is dan ook die hoofrede waarom Jesus na die aarde toe gekom het en aan die kruis gesterf het - om dít wat die duiwel gebreek het, weer te kom heelmaak - veral die mens sélf.
Teen hierdie Bybelse agtergrond het ek die afgelope tyd toenemend oor die situasie in Suid-Afrika besin. Suid-Afrika is teen ’n onstellende tempo op ’n pad van vernietiging. Kyk maar na opeenvolgende nuusberigte in enige koerant of televisie-nuus.
Infrastruktuur wat oor jare opgebou is en noodsaaklik is vir ’n goed-funksionerende land en gemeenskap, word letterlik afgebreek, afgebrand, besteel of gesaboteer. Misdaad breek, skend en vernietig lewens.
Waaraan moet dit toegeskryf word? Onverantwoordelikheid, ongebreidelde haat, reaksionêre woede en ’n vreemde vernietigingsdrang speel sekerlik ’n rol.
Die ANC staan as ’n volslae korrupte en mislukte regerende party egter eerste in die beskuldigingsbank. Waar alles waaraan die mitiese koning Midas geraak het in goud verander het, verander alle “goud” waaraan die ANC raak in skroot.
Daarmee saam het Julius Malema en sy EFF nog niks anders gedoen as om af te breek en die vlamme van haat, geweld en rasse-konflik aan te blaas nie.
Terwyl opbou en herstel nie uniek aan Christen-wees is nie, behoort dit ’n kenmerk van Christene te wees.
Om af te breek, af te brand en te vernietig, druis in teen die Skepper se opdrag aan sy skepsele om verantwoordelike rentmeesters van sy skepping te wees. Ons is immers na Sy beeld en gelykenis geskape. Iets van ons skeppingsdoel word sigbaar as ons skep, regmaak, heelmaak.
Tesame met alle moontlike aanleidende faktore wat spesifiek tot die vernietiging van ons eie land meewerk, kan ek nie anders as om die invloed en rol van die Bose raak te sien nie. Moord, verkragting, misdaad en vernietiging kan met geen woord beter beskryf word as “boos” nie.
As Christene veral, is ons steeds geroep om bouers en nie brekers te wees nie en om alles moontlik te doen om hierdie vernietigings-kultuur stop te sit.
Daar mag nie van ons gesê word wat in Eseg. 22:30 staan nie: “En Ek het onder hulle 'n man gesoek wat 'n muur kan bou en voor my aangesig in die bres kan staan vir die land ..., maar Ek het niemand gevind nie.”
(Isak Burger is ’n voormalige kerkleier en skrywer - Beeld 23 Februarie 2022)