Mandjie Hoop: As jy ...

As jy eerlikheid plant, sal jy vertroue oes.
As jy integriteit plant, sal jy karakter oes.
As jy opregtheid plant, sal jy goeie dinge oes.
As jy respek plant, sal jy vriende oes.
As jy goedheid plant, sal jy tevredenheid oes.
As jy vriendelikheid plant, sal jy glimlagte oes.
As jy geduld plant, sal jy kalmte oes.
As jy goeie dade plant, sal jy hoop oes.
As jy dankbaarheid plant, sal jy innerlike geluk oes.
As jy nederigheid plant, sal jy grootheid oes
As jy volharding plant, sal jy bevrediging oes.
As jy oordenking plant, sal jy perspektief oes.
As jy sweet plant, sal jy sukses oes.
As jy vergifnis plant, sal jy versoening oes.
As jy jou hart plant, sal jy liefde oes.
As jy geloof, hoop en liefde plant, sal jy die mooi van die lewe oes. 

'n Gesprek met spyt

(deur die ONS GOUE JARE-redaksie)

Hy was laat.

Natuurlik was hy laat.

Ons het al amper die ligte afgeskakel toe die deur stadig oopgaan. Geen dramatiese aankoms nie. Geen selfversekerde glimlag nie. Net ’n skraal figuur met ’n ou jas, skoene vol stof, en ’n hoed wat te laag oor sy oë getrek is.

Hy het gaan sit.

Nie regop nie.

Kop onderstebo. Skouers ingetrek. Hande styf gevou, asof hy bang is iemand herken hom.

Jy is laat.

SPYT: Ek is altyd laat.

Dis seker hoekom jy SPYT genoem word?

SPYT: Ja. Ek kom selde vroeg genoeg om iets te verander.

Hy kyk nie op nie.

Waar kom jy vandaan?

SPYT: Van mense se stil kamers af. Van hospitaalbeddens. Van grafte waar mense ná die tyd praat. Van kinders wat wens hulle het meer gevra. Van ouers wat wens hulle het meer geluister. Van mense wat jare lank gewerk het vir dinge wat nie kon terugpraat nie.

Jy klink moeg.

SPYT: Ek dra swaar. Mense dink ek is net ’n gevoel. Ek is nie. Ek is ’n argief. Ek dra sinne wat nooit gesê is nie. “Ek is jammer.” “Ek vergewe jou.” “Kom ons begin weer.” “Ek is lief vir jou.” “Ek was verkeerd.” Daardie sinne word soms te laat in my sakke gestop.

Besoek jy net gewone mense?

Vir die eerste keer lig hy sy kop effens. Nie genoeg om ons in die oë te kyk nie, maar genoeg dat ons sy stem duideliker hoor.

SPYT: Nee. Ek het al by groot mense ook gesit. Bekendes. Leiers. Rykes. Mense wie se name in boeke staan. Mense wat applous gekry het. Mense wat miljoene bereik het, maar nie altyd hul eie kinders bereik het nie.

En wat sê hulle gewoonlik?

SPYT: Hulle praat min oor titels. Min oor pryse. Min oor geld. Hulle praat oor tyd. Oor verhoudings. Oor ’n huis wat vol mense was, maar leeg van aandag. Oor ’n kind wat grootgeword het terwyl hulle besig was om belangrik te wees.

Hy glimlag flou, maar daar is geen vrolikheid daarin nie.

SPYT: Op die einde vra min mense: “Hoekom het ek nie nog meer vergaderings bygewoon nie?” Hulle vra eerder: “Hoekom het ek nie daardie Sondag saamgegaan nie?” “Hoekom het ek nie gebel nie?” “Hoekom het ek gewag?”

Is dit die grootste spyt - tyd?

SPYT: Tyd is een van hulle. Maar tyd is net die houer. Die ware spyt is wat mense nie daarin gesit het nie.

Soos?

SPYT: Sagtheid. Waarheid. Moed. Vergifnis. Geloof. Teenwoordigheid. Mens dink mos altyd daar sal nog ’n geleentheid wees. Nog ’n Kersfees. Nog ’n kuier. Nog ’n kans om reg te maak. Ek leef van daardie “nog”.

Daar is ’n lang stilte.

Buite beweeg die wind teen die venster. Binne sit SPYT soos iemand wat al te veel einde-van-die-pad-gesprekke gehoor het.

Jy het geloof genoem. Hoekom?

SPYT vou sy hande stywer.

SPYT: Omdat ek dikwels daar is wanneer mense besef hulle het hul siel laaste op die lys gesit. Hulle het planne gehad vir aftrede, vir geld, vir eiendom, vir vakansie, vir gesondheid - maar nie altyd vir God nie.

Dis ’n swaar ding om te sê.

SPYT: Ek weet. Daarom sê ek dit sag. Maar sag beteken nie onwaar nie.

Hy sluk swaar.

SPYT: Party mense wag tot die lewe hulle stilmaak voordat hulle begin luister. Hulle het deur die jare gevoel iets roep, maar hulle het dit uitgestel. “Later,” het hulle gesê. “Eendag.” “Wanneer ek tyd het.” Maar geloof is nie ’n ornament vir die einde van die lewe nie. Dit is lig vir die pad.

En jy? Jy sit hier kop onderstebo. Jy praat oor almal anders. Maar sê my, SPYT…

Hy beweeg nie.

Waaroor is jý spyt?

Vir die eerste keer kyk SPYT op.

Sy oë is nie kwaai nie. Net oud. En hartseer.

SPYT: Ek is spyt dat mense my so laat ontmoet.

Die vertrek word stil.

SPYT: Ek is spyt dat ek dikwels eers kom wanneer berou nie meer ’n gesprek kan red nie. Wanneer liefde nie meer hardop gehoor kan word nie. Wanneer ’n graf die enigste luisteraar is.

Hy haal diep asem.

SPYT: Maar die grootste spyt?

Hy kyk na die vloer.

SPYT: Ek gaan nie hemel toe nie.

Wat bedoel jy?

SPYT: Spyt gaan nie hemel toe nie. Spyt is te laat. Spyt dra die smaak van gemiste genade. Maar berou kan hemel toe gaan. Vergifnis kan. Geloof kan. ’n Mens wat omdraai, kan.

Sy stem raak sagter.

SPYT: Dit is waaroor ek spyt is: dat mense dink ek is genoeg. Hulle sê: “Ek is spyt,” maar hulle gaan nie verder nie. Hulle vra nie vergifnis nie. Hulle maak nie reg nie. Hulle draai nie terug na God toe nie.

So spyt is nie die antwoord nie?

SPYT: Nee. Ek is net die klop aan die deur. Berou maak die deur oop. Genade nooi jou in.

Hy staan stadig op. Weer soos iemand wat nie lank op een plek bly nie.

Gaan jy nou?

SPYT: Ja. Daar is altyd iemand wat my roep.

By die deur draai hy om.

SPYT: Maar sê vir julle mense: moenie wag vir my nie. Bel vandag. Vergewe vandag. Bid vandag. Maak reg vandag. Sê vandag wat gesê moet word.

Toe is hy weg.

Laat gekom.

Stil gegaan.

Maar hierdie keer, miskien, nie te laat nie.


[Aangestuur deur Valerie - dankie!]

Gaan leef dit uit wat jy in die kerk hoor ...

'n Persoon skryf 'n brief aan 'n tydskrif en kla dat dit vir hom geen sin meer maak om kerk toe te gaan nie.

Hy skryf: "Ek gaan al vir meer as 30 jaar kerk toe, ek het gedurende hierdie tydperk na ongeveer 3200 preke geluister, maar ek kannie een onthou nie. So ek dink ek mors my tyd en die predikante mors hulle tyd deur al hierdie preke voor te berei en Sondag vir Sondag te preek". 

Die brief is in die tydskrif gepubliseer en 'n paar weke het verbygegaan voordat iemand soos volg op die artikel geantwoord het: "Ek is reeds 30 jaar getroud. Gedurende my getroude lewe het my vrou ongeveer 32,000 etes voorberei. Maar, net soos jy, kan ek nie een van die spyskaarte onthou nie. Maar dit weet ek, al daardie etes het my gevoed en versterk, as dit nie vir daardie etes was nie, dan sou ek vandag dood gewees het. Dieselfde geld ook vir die kerk. As ek nie gegaan het om geestelik gevoed te word nie, sou ek vandag geestelik dood gewees het. "

Wanneer jy af is, is God besig met iets! 

Geloof sien die onsigbare, glo die ongelooflike en ontvang die onmoontlike! 

Dank God daagliks vir ons fisiese en geestelike voeding.

[Aangestuur]

Waarom is jy vandag so vol stres en vrees?

"Ek was gister besig om te werk toe my 12-jarige seun by die studeerkamer inkom en sê dat hy my iets wil vertel wat my sal laat ontspan."

Ek het na hom gekyk en hy vra my toe: "Pappa, wanneer jy in 'n vliegtuig sit, ken jy gewoonlik die loods?"
My antwoord was, "Nee, ek ken hom nie."
Toe sê hy, "Maar Pappa is ontspanne en geniet gewoonlik die vlug, nê?"
Ek sê dat dit so is.
Toe vra hy weer: "En as Pappa op 'n treinrit gaan, ken pappa die treindrywer?"
"Nee," het ek geantwoord.
"En tog sit Pappa terug en geniet die verbygaande natuurskoon?"
"Ja," het ek geantwoord.
"En as Pappa op 'n bus ry, ken Pappa die busbestuurder?"
"Nee," het ek geantwoord.
"En tog sit Pappa terug en geniet die busrit?"
"Ja, dis reg," antwoord ek toe.
En toe sê hy: "As Pappa dan die rit op die vliegtuig, en op die trein, en op die bus geniet, en Pappa sit terug en ontspan heerlik, en hulle is gewone mense wat Pappa nie eers ken nie, en Pappa weet nie eers of Pappa veilig by Pappa se bestemming gaan uitkom nie ... En tog kan Pappa nie terugsit en ontspan as Pappa weet God is in beheer van Pappa se lewe en Pappa se eindbestemming nie?"
En toe sê hy: "Pappa, sit terug en ontspan, vergeet van jou vrese en al jou bekommernisse. God is die mees ervare Loods en Bestuurder van Pappa se lewe, en Hy ken Pappa persoonlik."

Is dit nie waar van elkeen van ons se lewe nie? Ons luister daagliks na die nuus en hoe slegter dit in die land en in die wêreld gaan, hoe meer raak ons stres - en bekommernisse neem eksponensieel toe. 
Waarom is ons vandag so vol stres en vrees?
Sit terug, ons Koning is in beheer, en al wat ons moet doen is om Hom te vertrou. Hy is ten volle in beheer!

[Aangestuur deur Rosetta] 

Hoe lyk jou lewe vandag?

KORRELTJIES SAND ...
Hoe lyk jou lewe vandag ... hoe voel jy vandag?

SEESAND ... voel jy of die seesand jou nadertrek en wil instoot in die blou oseaan, groot, onstuimig, daar waar die branders jou omgooi en rondskommel tot jy klein word?
RIVIERSAND ... voel jy soos riviersand vanoggend, eenkant lê jy, verlate, verlore, ver weg van alles en almal, net die voëltjies in die bome hoor jou geroep, jy lê uitgespoeg op die wal. Moeg van spartel en beur, tussen stompe, rommel en takke deur, beur jy, hyg jy, skreeu jy, net jy alleen.
DRYFSAND ... is jou lewe dalk soos dryfsand? Word jy ingesluk en versmoor deur die duisende korreltjies sand, word jy afgetrek tot onder in die diepste put van donkerte en vrees? Waaraan klou jy vandag vas? Dryf jy, val jy, beur jy?

WOESTYNSAND ... is jou lewe dalk soos woestynsand vandag? Warm, droog, moeg, uitgeput, verlate, alleen, verlore, verstote.
BOUSAND ... is jy dalk soos bousand vandag? Sterk, stewig, rigtingvas, regop, getrou, jou fondamente stewig geanker en gepleister met Jesus se spesiale bousand. Maak nie saak watter tipe sand jy vanoggend in jou hart ronddra nie, ONTHOU:

SEESAND: JESUS het op die seewater geloop en HY gryp jou as die branders jou omgooi.
RIVIERSAND: JESUS kan orals sien, ook hier sal HY jou optel, afwas en heel maak.

DRYFSAND: Jy het nie vashouplek nodig as jy sink nie. JESUS is jou anker, jou kabel, jou redder. HY trek jou uit die dieptes uit en maak jou nuut.
WOESTYNSAND: JESUS was vir dae alleen in die woestyn, honger, dors. Hy het die duiwel trotseer, Sy honger en dors is geles deur SY VADER en HY was die oorwinnaar. Drink van JESUS se LEWENDE WATER en jy sal NOOIT weer dors word nie.
BOUSAND: JESUS bou al die hoekstene van ons lewe, HY het ons gevorm na SY beeld, HY het die beste BOUSAND ooit gebruik om ons te vorm. SY genade, troos en liefde, kan nooit breek nie. Sy fondamente is stewig geanker, dit hou vir ewig en ewig. 

[Aangestuur]

Flitsgedagte: Gebed

Hoekom glo ek in God?

Ek het Hom nodig.

Hier is my antwoord:

Ek glo in God, want partykeer is die wêreld so "awesome" en dinge werk so goed uit dat my siel uitroep vir iemand om voor dankie te sê.
Dan is dit Hy!

 
Ek glo in God, want soms is die berge en die sonsondergang en die wolke en die maan so mooi dat ek iemand nodig het om te prys.
Iemand moes dit gemaak het.
Dis Hy!

 
Ek glo in God, want partykeer gebeur goed wat so onbeplan is en so seermaak. En dan voel dit of niemand verstaan nie, maar dan onthou ek die spykers in Sy hande en die Man aan die kruis.
Dan weet ek Iemand huil saam met my.
Dis Hy!

 
Ek glo in God, want partykeer is ek so deurmekaar en die lewe so sinneloos en my drome lyk onbereikbaar en dan het ek iemand nodig om saam met my die pad te stap en rigting te wys.
Dan is Hy daar!

 
Ek glo in God, want partykeer is ek so dom en ek doen sulke "stupid" goed en sonde mors my hart en my lewe so op en maak ander so seer.
En Dan het ek nodig dat Iemand vrede en wysheid bring
Dan is Hy daar!

 
Hy maak heel wat ekself verbrou het!
Hy bring genade selfs in seer wat ekself veroorsaak het!
Ek glo in God, want partykeer weet ek niks. Ek het leiding en wysheid nodig in 'n deurmekaar wêreld wat ek nie verstaan nie.

En dan skryf Hy vir my in die Bybel en ek lees Sy Woord en hoor Sy stem en dinge maak weer sin!
Ek glo in God, in Jesus, in sy Gees, want Hy's daar!
Heeltyd! Altyd!

 
In alles waardeur ek gaan, maak nie saak hoeveel keer ek dieselfde fout maak nie, Hy is daar!

Ek glo in God, want ek sien nie kans om ooit alleen te wees of enigiets alleen te doen nie.

Dink hieroor: Waar kry jy jou krag vandaan?

Jy leef uit die krag van die Een wat in jou woon.

Die waarheid is eenvoudig. 

Bekommernis het geen krag nie. 

Bekommernis kan nie jou toekoms verander nie. 

Bekommernis kan nie jou verlede regmaak nie. 

Bekommernis kan egter jou hede steel. 

Maar geloof in God se Woord,

vervang die van angs met vrede. 

"U sal hom in volkome vrede bewaar wie se gedagte op U gerig is" 

(Jesaja 26:3). 

Vrede is nie iets wat jy jaag nie. 

Dit is iets wat jy binne jou ervaar

wanneer jy rus in die Een wat in jou woon.

[Aangestuur]

Dink hieroor: Ontvang 'n weldaad in ruil

Dit word vertel van Cranmer, 'n man wat vir sy geloof gesterf het: "Om hom kwaad aan te doen, was om 'n weldaad terug te ontvang. Sy hart was so ryk en vol dat, as 'n mens 'n saadjie van haat daarin sou saai, liefde daaruit sou voortspruit."


[Klik HIER en HIER om meer van aartsbiskop Thomas Cranmer te lees.]

Grafgodsdiens

Jesus se lyde en sterwe sou tot 'n groot mate tevergeefs gewees het, as Hy nie uit die graf opgestaan het nie. 

Dit is die bewys dat Hy waarlik die Seun van God is.

Christus het nie slegs opgestaan nie, maar Hy LEEF!  

Hy leef NOU en tot in alle Ewigheid.

Soos die vroue van ouds bring baie van ons egter vandag nog ons speserye na Sy graf toe. Ons kom om te treur, in plaas van te triomfeer. Ons ongeloof verwag niks meer as 'n lyk nie.

Geen wonder dan ook dat ons so dikwels die kenmerke van hierdie GRAFGODSDIENS onder die sogenaamde Christene aantref nie. 

Hulle godsdiens het ...

* 'n grafklimaat (dit is koud en dood);

* 'n Grafatmosfeer (muf en onaangenaam);

* 'n Grafgeaardheid (lewenloos en kragteloos);

* 'n Grafeffek (onwelriekend en afstootlik).

Die kerk het kragteloos geword omdat dit hom ontbreek aan 'n LEWENDE Jesus!

[Dr. JCG Kotze (prof. Kolie - April 1988]

Luister gerus na van prof. Kolie se preke HIER.

Mandjie Hoop: Die 4 kersies

Daar is vier kersies wat elke dag in jou lewe moet brand. Die name van die kersies is VREDE, GELOOF, LIEFDE en HOOP.

Vrede het gesê: "Daar is soveel bakleiery en woede dat niemand my meer aan die brand kan hou nie."

Liefde het gekla: "Mense verstaan nie meer dat ek 'n noodsaaklike deel van hulle bestaan is nie. Ek sien nie meer 'n doel vir myself nie."

Geloof het bygevoeg: "Ek is nie meer onmisbaar nie, so waarom moeite doen om te bly brand."

Al drie kersies se vlammetjies het doodgegaan.

Maar HOOP skree: "Solank as wat ek brand, kan ek julle al drie aansteek!" 

En toe maak hy so! Maak seker dat jou vier kersies ELKE DAG brand!

Flitsgedagte: Geloof

Mandjie Hoop: Konstante krag ...

Jou geloof is nie 'n eindpunt wat jy moet bereik nie;
dis 'n reis van genade wat elke oggend nuut begin.
Laat ons vashou aan hierdie wete:
ons is nooit alleen op hierdie pad nie,
en Sy liefde is die konstante krag wat ons vorentoe dra.

Mossieboodskap: Nog net drie minute ...

Die breinspoeling was al weke lank aan die gang, soms tot 14 uur per dag - 48 uur aaneen by een geleentheid. Maar hy het sy man gestaan. Hy wou nie swig nie.

Die plek: 'n Kommunistiese gevangenis in China. 

Die tyd: in die vroeë vyftigerjare. 

En die man: 'n Stralende Chinese Christen.  

Uiteindelik, na herhaalde gekruisvra, bespotting en marteling, sê die Christen aan sy verdrukkers: "Julle mors julle tyd, Menere. My geloof is dieper gewortel as enige marteling waaraan julle my kan onderwerp. Dit is vir ewig gewortel in Jesus Christus, die Seun van God."

Woedend klap die indoktrineerder hom deur die gesig en skreeu: "Val op jou knieë en bid! Want oor drie minute gaan ons 'n koeël deur jou kop jaag."

Terwyl die indoktrineerder, 'n gewapende wag en vyftien van die man se medegevangenes staan en kyk, maak hy soos hy beveel is.

"Here," begin die man bid, "ek dank u vir die vrede wat daar in my hart is. Ek dank u vir die geloof wat dit vir my moontlik maak om te glo dat, ten spyte van my verdrukkers, my hemelse Vader op sy troon sit en in staat is om enige oomblik die monde van hulle wat Sy Naam laster, vir ewig te stop. Here, u is in staat om hierdie oomblik U mag aan hierdie twee manne te bewys. U is in staat om te toon dat U God is. U mag kan hierdie manne in een oomblik laat dood neerval, en ..."

Maar hy het nie aan die einde van sy gebed gekom nie, want, hygend van pyn, het die twee manne gelyktydig op die grond neergeval. Binne 'n paar uur was albei dood.

Die Christen is daarna vrygelaat, en na wat verneem word, is hy toegelaat om by sy vrou en kinders aan te sluit en ongehinderd in sy huis te woon. Geen nie-Christen het dit naby sy huis gewaag nie.

* Eerw. Leslie Millen, lank 'n CIM-sendeling in China, was 'n ooggetuie van bostaande gebeurtenis tydens sy eie gevangenskap deur die kommuniste.   

Lees HIER van David Lin se ervarings agter tralies.

[Oorgeneem uit: Die Kruisgesant - Die Spoorwegbode, Februarie 1986]

Mandjie Hoop: Hier is 'n pleister vir jou hart

Mag jy altyd  ...
... genoeg GEDULD hê om jou dierbaar te maak.
... genoeg VERDRIET hê om jou menslik te maak.
... genoeg HOOP hê om jou gelukkig te maak.
... genoeg TERUGSLAE hê om jou nederig te maak.
... genoeg VRIENDE hê om jou te troos.
... genoeg VERDIENSTE hê om jou gemaklik te laat lewe.
... genoeg GEESDRIF hê om jou na die dag van more te laat uitsien.
... genoeg GELOOF om jou swartgalligheid af te weer.
... genoeg WILSKRAG om elke dag ′n beter dag as gister te maak.

Dis die laaste naweek voor Kersfees en my se wense vir jou is ...

Mag die wind slegs jou hare deurmekaar woel, 

maar nie jou gees omkrap nie.
Mag die son jou nie skroei nie, 

maar slegs warmte skenk, ook in jou hart.
As die reën op jou val, voel geseënd
As jy guns en gawes ontvang, 

neem dit met dankbaarheid en nederigheid.
As jy vriendskap ervaar, 

koester dit.
As jy liefde ervaar, 

troetel dit.
Mag jou bekers van geloof, hoop en liefde altyd gevul bly.
Mag die geskenke en lesse wat jy van die lewe ontvang, 

groter wees as dié wat met geld gekoop kan word.
Mag jy altyd bewus wees van die kosbaarheid

en kortstondigheid van tyd.
Mag jy veilig loop en ry op die paaie waar jy gaan.

Mag jou opdraandes nie te steil wees nie, 

en mag jou 'bagasie' nie te swaar word nie.
Mag die lewe jou met n sagte hand aanraak.
Mag jy altyd 'n bewustheid, empatie en begrip hê

vir en van die omstandighede van ander.
Mag jy vroegdag opstaan en saans gaan slaap

met 'n hart vol dankbaarheid.
Mag jy die ware Christus-vrede ervaar.

[Dankie, Wilna, dat jy dit met ons lesers deel.]

Afkondiging: Erediens

Kry jou kaartjie betyds

Jesus het vir hom gesê: "Ek is die weg en die waarheid en die lewe. Niemand kom na die Vader toe behalwe deur My nie." - Joh. 14:6

Jy kan op enige trein klim en afklim waar jy wil wees - solánk jy 'n kaartjie het! Dieselfde geld as jy met 'n vliegtuig êrens heen wil gaan. Jy kan heerlik gemaklik sit, 'n fliek kyk, iets drink en na énige plek in die wêreld vlieg - solank jy net 'n kaartjie het!

As jy eendag hemel toe wil gaan, moet jy reeds nóú jou kaartjie kry. Die enigste manier wat jy in die hemel gaan kom, is om in Jesus Christus te glo. Hý is die énigste weg!

Dierbare GOD, ek gló dat JESUS vir my sondes gesterf het. Ek glo dat HÝ in my hart lewe en daarom WÉÉT ek ek gaan HEMEL toe. Help my asseblief om vir ánder mense daarvan te vertel, sodat húlle óók hemel toe kan gaan. Amen

[Carolyn Larsen]

Afkondiging: Erediens

Afkondiging: Erediens