Mossiestilte: Woorde - Matteus 12:36-37

“Dit sê Ek vir julle: Van elke ligsinnige woord wat die mense sê, sal hulle rekenskap moet gee op die oordeelsdag. Op grond van jou eie woorde sal jy vrygespreek of veroordeel word.”

Woorde is klanke met bepaalde betekenis, en as ons die betekenis van die klanke verstaan, kan ons met mekaar praat.

Woorde gee uitdrukking aan 'n mens se gedagtes en gesindhede, en uit iemand se woorde kan naastenby afgelei word wie of wat hy in werklikheid is.

Woorde kan tot groot SEËN aangewend word, maar hulle kan ook uiters NADELIG wees. Dit hang daarvan af hoe hulle gebruik word. Woorde wat stig en bemoedig kan wonders verrig; maar woorde wat onverskillig of ligsinnig uitgespreek word, kan tot onaangenaamheid en ergernis lei.

Ons verhouding met die Here bepaal tot 'n groot mate die gehalte van ons woorde en die inhoud van ons gesprekke; deur ons woorde kom ons geestelike toestand maklik tot openbaring. Nie uit wat iemand voorgee om te wees nie, maar uit sy woorde, wanneer hy in geselskap van sy vriende is, sal 'n mens weet of hy 'n Christen is of 'n namaaksel is.

Woorde wat eenmaal uitgespreek is, verdwyn nie sommer in die niet om vir altyd verby en vergete te wees nie. Hulle aanslag en invloed duur voort, ten goede of ten kwade, selfs lank nadat die persoon wat hulle gebesig het, reeds van die toneel verdwyn het. 

Woorde kan NOOIT herroep of uitgewis word nie. Bowendien word daar in die Hemel rekord gehou van elke woord wat op aarde uitgespreek word.

Woorde is belangrik, daarom moet ons VERSIGTIG wees hoe ons hulle gebruik. Die Here sien ons woorde nog voordat hulle ons lippe verlaat. Daardie vuil grap mag miskien die lagspiere prikkel van diegene wat na ons luister; die ydellike gebruik van die Here se Naam mag dalk ons vriende beïndruk of ons ego stut; maar wanneer die Boeke in die Oordeelsdag oopgemaak word, sal ons woorde daar wees om vir of teen ons te getuig - en niemand sal kan ontken dat dit sy eie woorde is nie.   

Dit is slegs met die hulp van die Here en in Sy krag dat die versoeking om ons tonge in boosheid los te laat, oorwin kan word. As ons aan Hom behoort, sal Hy ons nie net die oorwinning gee nie, maar ons ook in staat stel om woorde te spreek wat Hom behaag en vir ons medemens tot nut en seën kan wees.

Dan hoef ons nie beskaamd te staan in die dag wanneer daar van ons rekenskap geëis word nie.

Die leë begrafnis

'n Fiktiewe verhaal met 'n ware boodskap.
Die dominee het sy motor voor die klein kerkie gestop en vir 'n oomblik bly sit.
Op die passasiersitplek het die begrafnisprogram gelê.

**Petrus Smit.**
82 jaar oud.
Geen bekende familie.Geen kinders.
Geen naasbestaandes.
'n Eenvoudige begrafnis.
Hy het gesug.
In al sy jare as dominee het hierdie soort dienste hom altyd hartseer gemaak.
'n Hele lewe.
En aan die einde lyk dit asof niemand omgee nie.
Toe hy die kerk binnestap, was die eerste rye leeg.
Net die orrelis, 'n verpleegster van die ouetehuis en twee kerkraadslede was daar.
Voor in die kerk het 'n eenvoudige houtkis gestaan.
Geen groot blommerangskikkings nie.
Geen foto's nie.

Geen huldeblyke nie.
Net 'n naam.
**Petrus Smit.**
Die diens het begin.
Die eerste lied is gesing.
Toe die dominee opstaan om te praat, gaan die agterdeur oop.
'n Vrou stap in.
Toe nog een.
Toe 'n jong man.
Toe 'n bejaarde egpaar.
Toe nog mense.
En nog.
En nog.
Binne minute was die kerk halfvol.
Toe driekwart vol.
Toe moes mense teen die mure staan.
Die dominee kyk verbaas rond.
Volgens die ouetehuis het Petrus min besoekers gehad.
Volgens sy bure het hy alleen gewoon.
Volgens die dokumente was daar feitlik niemand nie.
Maar die kerk was nou stampvol.
Wie was al hierdie mense?
Ná die sang sê die dominee:
"Indien iemand iets oor Petrus wil deel, is julle welkom."
'n Bejaarde vrou staan op.
Haar hande bewe.
"My man is baie jare gelede oorlede."
Sy sluk swaar.
"Ek het niemand gehad nie."
"Die dae was lank."
"Die nagte nog langer."
"Een middag het iemand aan my deur geklop."
Sy glimlag deur haar trane.
"Dit was Petrus."
"Hy het nie gekom om my probleme op te los nie."
"Hy het net gaan sit."
"En geluister."

Sy vee haar oë af.
"Daardie dag het ek nie so alleen gevoel nie."
Toe gaan sit sy.
'n Jong man staan op.
"Toe ek sestien was, het ek die verkeerde pad gekies."
Hy kyk af.
"Baie mense het opgegee op my."
"Maar nie Petrus nie."
"Hy het elke week tyd gemaak om met my te praat."
"Nie om my te veroordeel nie."
"Net om te luister."

"Vandag het ek 'n gesin."
"Ek het werk."
"Ek het hoop."
"En ek glo God het Petrus gebruik om my lewe te verander."
Nog mense staan op.
'n Enkelma.
'n Afgetrede onderwyser.
'n Verpleegster.

'n Man wat sy werk verloor het.
Verhaal ná verhaal.
Nie van groot wonderwerke nie.
Nie van geld nie.
Nie van roem nie.
Maar van tyd.

Tyd om te luister.
Tyd om om te gee.
Tyd om iemand raak te sien.
Toe staan 'n middeljarige vrou op.
Niemand herken haar nie.

Sy hou haar selfoon in haar hand.
Vir 'n oomblik kan sy nie praat nie.
Toe sê sy:
"Ek het Petrus nooit persoonlik ontmoet nie."
Die kerk word stil.
"Ek het net met hom gepraat."
Sy lig die foon op.
"Hierdie foon was vir jare my enigste geselskap."
Trane blink in haar oë.
"My man is oorlede."
"My kinders woon ver."
"Ek het baie dae alleen deurgebring."
Sy kyk na die skerm.
"Ek het mense gebel."

"Maar almal was besig."
"'Ek sal jou later terugbel.'"
"'Ons praat weer.'"
'Ek is nou net in 'n vergadering.'
Sy glimlag hartseer."Hulle het dit nie sleg bedoel nie."
"Die lewe het net aangegaan."
Die kerk was doodstil.
Toe sê sy die woorde wat diep in almal se harte ingesny het:
"Mense het my stem gehoor, maar niemand het my eensaamheid gehoor nie."
Selfs die dominee het sy kop laat sak.
"Toe bel ek eendag vir Petrus."
'n Traan rol oor haar wang.
"Hy het nie geweet ek huil voordat ek gebel het nie."
"Hy kon nie my gesig sien nie."
"Hy kon nie die trane sien wat oor my wange geloop het nie."
"Maar hy het iets gehoor wat ander mense gemis het."
Sy sluk swaar.
"Hy het my hart gehoor."
Die kerk was stil.
"Daardie gesprek het amper twee ure geduur."

"Hy het nêrens heen gejaag nie."
"Hy het nie gesê hy sal later terugbel nie."
"Hy het net geluister."
"En toe ons klaar gepraat het, was my probleme nie weg nie."
"Maar ek het geweet iemand gee om."
Sy kyk na die kis.

"Daardie iemand was Petrus."
Niemand het beweeg nie.
Toe staan die verpleegster van die ouetehuis op.
"Daar is iets wat julle moet weet."
Sy haal 'n klein notaboek uit haar handsak.
"Ek het dit tussen Petrus se goed gekry."
Sy maak dit oop.
Daar was net een sin wat oor en oor geskryf was:
'Here, wys my vandag iemand wat ander mense miskyk.'
Die dominee voel hoe sy keel toetrek.
Hy kyk af na die preek wat hy die hele week voorberei het.
Toe maak hy dit toe.
Stadig.
Hy kyk op na die mense.
"Vandag het ek iets geleer."
Die kerk was doodstil.
"Ek het gedink hierdie begrafnis gaan oor 'n man wat alleen gesterf het."
Hy kyk deur die oorvol kerk.
"Maar ek was verkeerd."
"Hierdie man het verstaan wat baie van ons vergeet."
Hy haal diep asem.
"Ons leef in 'n wêreld vol boodskappe."
"WhatsApps."
"E-posse."
"Oproepe."
"Kennisgewings."
"Maar tog is daar mense wat nog nooit so alleen gevoel het soos nou nie."
Niemand het beweeg nie.
"Ons sien die boodskap."
"Maar nie altyd die trane daaragter nie."
"Ons hoor die stem."
"Maar nie altyd die pyn daaragter nie."
"Ons vra: 'Hoe gaan dit?'"
"En ons aanvaar die antwoord: 'Dit gaan goed.'"
Die dominee se stem breek.
"Terwyl daardie persoon dalk net gewens het iemand sou langer luister."
Hy kyk na die kis.
"Petrus het nie op groot verhoë gestaan nie."
"Hy was nie 'n bekende man nie."
"Hy het nie roem gesoek nie."
"Hy het net tyd gemaak vir mense."
"En soms is dit die grootste geskenk wat ons vir iemand kan gee."
Die kerk was stil.
Baie stil.
Want almal het geweet van iemand wat hulle moes bel.
Iemand wat hulle vergeet het.
Iemand wat dalk wag vir 'n oproep.
Iemand wat dalk vanaand alleen sit.
Toe maak die dominee sy Bybel oop en lees:
"Wees bly saam met dié wat bly en treur saam met dié wat treur."
Romeine 12:15
Hy maak die Bybel toe.
En vir die eerste keer daardie dag het die mense verstaan:
Jy kan nie saam met iemand treur as jy nooit tyd maak om hul hart te hoor nie.
BOODSKAP
Ons leef in 'n wêreld waar mense meer verbind is as ooit tevore, maar dikwels meer eensaam as ooit tevore.
Ons stuur boodskappe.
Ons maak oproepe.
Ons lees statusse.
Ons druk "like".
Maar baie mense sit steeds alleen.
Baie mense huil waar niemand hulle sien nie.
Baie mense sê:
"Dit gaan goed."
Terwyl hulle harte swaar is.
Soms het mense nie antwoorde nodig nie.
Soms het hulle nie raad nodig nie.
Soms het hulle net iemand nodig wat sal luister.
Iemand wat tyd maak.
Iemand wat regtig omgee.
Petrus het nie probeer om die hele wêreld te verander nie.
Hy het eenvoudig tyd gemaak vir die mense wat God oor sy pad gestuur het.
Een oproep.
Een gesprek.
Een besoek.
Een hart op 'n slag.
Dalk is die belangrikste vraag nie hoeveel mense ons ken nie.
Nie hoeveel geld ons gemaak het nie.
Nie hoeveel boodskappe ons gestuur het nie.
Maar:
Hoeveel harte het ons aangeraak terwyl ons hier was?
Mag ons elke dag bid:
"Here, help my om nie so besig te wees dat ek mense se pyn miskyk nie. Gee my oë om te sien, ore om te luister en 'n hart wat tyd maak vir ander."
Bybelvers
Filippense 2:4
Laat elkeen nie net aan sy eie belange dink nie, maar ook aan dié van ander.
Want soms verander 'n lewe nie deur groot dinge nie. Soms verander 'n lewe bloot omdat iemand tyd gemaak het om te luister.

[Hierdie is 'n kosbare 'gelykenis van Petrus'. Dit is verseker nie fiktief nie, net die reine waarheid. Ek dink aan ons Here Jesus se woorde in Mat 25:1-46, veral vers 35. Mense honger na Christus se liefde in en deur ons ... hand en hart en tyd ...]

Dankie, Brahm, vir die aanstuur van hierdie boodskap.

Mandjie Hoop: Wees vol moed

 Het jy al gedink en besef wat ‘n groot wonder van genade God vir jou gedoen het sodat jy aan Jesus kan glo en aan Hom kan behoort? Dank God elke dag daarvoor! Dan hoef jy nooit moed te verloor nie, want sy genade wat jou tot hier gedra het sal jou ook verder dra. Miskien is jy onseker ... deel ek in die genade? Jy kan dit vandag ontvang! (Matt 11:28 & 2 Kor 6:2)

Jy het rede om vol moed te wees, kind van God!

Mossiestilte: Matt. 11:28

Kom na My toe, almal wat vermoeid en belas is, en Ek sal julle rus gee.

Vandag nog wil die Here vir jou vrede in jou hart en gedagtes gee.

Hy het reeds vir jou rus gegee, want Hy het geweet die wêreld wil jou uitput en moeg maak as jy op jou eie kragte staatmaak.

Miskien sien jy nie kans vir die groot uitdagings op jou pad nie.

Miskien sê jy: Ek verdien dit nie; die Here weet watse slegte gedagtes ek het en wat ek wegsteek. 

Miskien misken die wêreld jou, maar lees vers 11c: maar die kleinste in die koninkryk is groter as hy (Johannes die doper). Daarom is jy nie gering geag by die Here nie, maar baie hoog geag.

Liewe Vader, dankie vir u genade, wat my 'n nuwe mens gemaak het. U het my vuilheid afgewas en skoon en vlekkeloos voor U laat staan. U het my gereinig en sal nie toelaat dat die satan my reg as kind van God, wegneem nie, die prys was net te duur daarvoor. Ek loof en dank en eer u heilige Naam. Amen

Matteus 25:40 - "... het julle dit aan My gedoen."

’n Jong dametjie met die naam van Sally kan nog soos gister onthou die ondervinding wat sy gehad het in een van haar Bybelkundeklasse deur haar onderwyser, mnr. Smit.

Mnr. Smit was bekend vir sy vindingryke metodes om ’n klas aan te bied.

Een spesifieke somersoggend stap Sally in die Bybelkundeklas in en sy het onmiddellik geweet hierdie gaan weer een van daardie onvergeetlike dae wees.

Teen die muur was ’n groot afdruk van ’n veerpyltjiebord en op die tafel daar naby het ’n klomp veerpyltjies gelê.

Mnr. Smit het gevra dat hulle elkeen ’n skets moet maak van die persoon wat hulle die meeste verafsku of iemand wat hulle kwaad gemaak het en hy sal hulle toelaat om van die veerpyltjies na die persoon se skets te gooi.

Sally se vriendin het ’n skets geteken van die ander meisie wat haar kêrel gesteel het. ’n Ander vriend het ’n skets geteken van sy jonger boetie. Sally het ’n skets geteken van ’n voormalige vriend van haar. Sy het baie detail ingevoeg op die skets, selfs van die puisies op sy gesig. Sally was baie tevrede met haar skets en dit was nogal ’n goeie weergawe van die voormalige vriend.

Die klas het in ’n ry gestaan en hulle beurt afgewag om van die veerpyltjies na hul skets te gooi.

Sommige studente was so meegevoer deur die hele ondervinding dat hulle van die veerpyltjies so hard gegooi het dat hulle sketse geskeur het. Sally kon nie meer wag op haar beurt om haar frustrasie op die skets van haar voormalige vriend uit te haal nie.

Sy was baie teleurgestel toe mnr. Smit die gooiery stop en die studente vra om hul sitplekke weer in te neem omdat die tyd bestem vir die klas feitlik verstreke was.

Terwyl Sally sit en dink hoe kwaad sy is omdat sy nie ’n beurt kon kry om van die veerpyltjies na haar skets te gooi nie, begin mnr. Smit die afdruk van die veerpyltjie bord van die muur af te haal.

Onder die afdruk van die veerpyltjie bord was ’n prentjie van Jesus. ’n Grootse stilte het op die klas neergedaal soos wat elke student kon sien hoe verwronge die prentjie van Jesus se gesig gelyk het. Daar was oral gate en skeure in die prentjie van Sy gesig en die oë was deurboor met die veerpyltjiegate.

Mnr. Smit het net die volgende woorde aangehaal: “vir sover julle dit gedoen het aan een van die geringstes van hierdie broeders van My, het julle dit aan My gedoen.” Mat 25:40.

Geen verdere woorde was nodig nie, terwyl studente met oë wat vol trane is, steeds staar na die prentjie van Jesus, ons Verlosser!!

[Geleen]

Mossiestilte: Mat. 11:28

Kom na My toe almal wat vermoeid en belas is, en Ek sal julle rus gee.

Bring vanoggend al jou hartseer en moegheid na die voete an Jesus.

Bring jou donker mismoedigheid na die kruis.

Bring jou siekte en gebreke na Jesus.

Vra Hom vir Wysheid om jou deur die dag te dra en die regte besluite te neem.

Dankie, Seun van God, dat U vir my vanoggend wysheid gee en my uit my dom astrantheid verlos. As ek vanoggend stukkend en arm is, sal U vir my voorsien volgens die rykdom van U heerlikheid. U is my God en liefde. U Gees gee my die vermoë om die onmoontlike te doen in Jesus Naam. Amen.

[Aangestuur deur Pieter Swanepoel]

Mossiestilte: Matt. 6:33&34

Maar soek eers die koninkryk van God en sy geregtigheid, en al hierdie dinge sal vir julle bygevoeg word.

Kwel julle dus nie oor môre nie, want môre sal hom oor sy eie dinge kwel. Elke dag het genoeg van sy eie kwaad

In hierdie "laaste dae" as mens na die tekens van die tye kyk, kwel mense hulle baie oor môre. 

Sommige wil net reg wees vir die wegraping, ander vrees die tyd wat die antichris sal kom. 

Elkeen wil slimmer wees oor die uitlegte van profesieë. 

Dan vra ek eerder: wat kan ek doen om iets vir iemand, my naaste te doen. 

Is jou "mate" van geloof wat jy van God gekry "gevul". 

Jesus sê tereg: as jy nie vir die minste wat honger was, gevoed het, of in die tronk besoek het, of iemand wat naak is, beklee het, het jy dit ook nie aan My gedoen nie.

Nie almal wat vir My sê Here, Here, sal in die koninkryk van God ingaan nie.

Here, U het u Heilige Gees aan my gegee om my te leer en te herinner aan wat Jesus ons geleer het. 'n Nuwe gebod het U ons ook gegee: om mekaar lief te hê soos wat U ons liefgehad het. (Joh. 13:34). Here bewaar ons van die bose en lei ons nie in versoeking nie en vergeef ons ons skulde (Matt. 6:12 & 13). Help my, Here, om op U te fokus en nie te fokus op die DINGE, wat ek uit my verhouding met U kan kry nie. Amen.

Mossiestilte: Matt. 24:12 & 13

En omdat die ongeregtigheid vermeerder word, sal die liefde van die mense verkoel.

Maar wie volhard tot die einde toe, hy sal gered word. 

Jesus praat oor die eindtyd. Baie mense sal God verlaat en afvallig word van die evangelie.

Almal praat nou oor die wegraping en wanneer dit nie gebeur nie skei mense hulle af van God se woord en wil nie meer kerk toe gaan nie. 

Laat die Heilige Gees jou vul en leer.

Soos die weerlig wat uit die ooste uitslaan en tot in die weste skyn, so sal die koms van die Seun van die mens wees (vers 27).

Wees gereed, want as Jesus op die wolke kom met groot krag en heerlikheid, sal Hy sy engele uitstuur om sy uitverkorenes vanuit die vier windrigtings te versamel, van die een einde van die hemel tot die ander einde daarvan. (vers 30 & 31)

Here, ek wil gereed wees as Jesus kom om my te kom haal. Laat ek getrou wees en die diensvolk hulle voedsel altyd op die regte tyd gee (vers 45). U geregtigheid is my genade deur Jesus Christus, om die ewigheid in u koninkryk in te gaan. Amen.

Mandjie Hoop: Maak skatte in die hemel bymekaar

Matteus 6:19-21 sê:

“Moenie vir julle skatte op aarde bymekaarmaak nie ...
Maak vir julle skatte in die hemel bymekaar ...
Waar jou skat is, daar sal jou hart ook wees.”

Hoe kan jy nou hierdie koninkrykbeginsel prakties uitleef?
Hoe kan jy perspektief behou, in terme van die materiële in jou lewe?

Kies die krag van eenvoud.
Leef binne jou inkomstegrens. Koop minder.
Jy het nie die grootste, beste en nuutste nodig nie.

Konsentreer op die dinge wat die kosbaarste is in die lewe,
en wat geen geld kan koop nie.
Verhoudings, liefde, tyd, gesondheid.
Die grootste gawes van God!

Ontwikkel jou waardering vir die klein dingetjies in die lewe.
Dit kom ook alles van God af!
Sien dit raak en koester dit.

Onderskei wat die advertensie nou eintlik aan jou wil verkoop.
Status, mag, gewildheid ...

Vrygewigheid help om op die koninkryk gerig te wees.
Gee eerder, as om te ontvang.
Gee eerder die einste goed wat jy wil hê, weg!
Vrygewigheid help jou om vry te kom van “goed”.
Eenvoud, uitreik, en omgee, maak jou vry van “goed”.

Leef hierdie koninkryks-avontuur!
Maak saam met die Here skatte in die hemel bymekaar.
“Waar jou skat is, daar sal jou hart ook wees,” sê die Here Jesus.

[Bron: Klik HIER]

Mandjie Hoop: Koop die regte aandele

Daar is nie fout om baie besittings te hê nie. Die probleem lê daarin dat jou rykdom jou identiteit vorm. Jy is wat jy besit. (Luk. 18)

Mense van aansien en rykdom, word dikwels in koerante en in die media deur die wêreld aangeprys. Gewone mense verdwyn eenvoudig in die massa. Hulle lewe lyk vir die man op straat onbelangrik. Jakobus help ons egter met hierdie siening. Gaan lees dit gerus as jy die dag plat op die grond sit, omdat jou besittings nie die wêreld se standaarde ewenaar nie. Rykdom wat ewigheidswaarde het, is jou kennis van God, jou verhouding met God en jou betekenisvolle verhouding met ander mense. Belê jou rykdom in die Ewigheidsbank. (Matt 6: 19-21) 

Die Vrede en Liefde van God is met julle

Kom na My toe almal wat vermoeid en belas is en Ek sal julle rus gee. My juk is sag en My las is lig (Mat.11:25-30 ). 

Jesus wil die swaar jukke, bekommernisse en laste wat ons dra, van ons afhaal. In die plek daarvan wil Hy ons herstel tot die mens wat Hy vanaf die begin beplan het dat ons moet wees. Vir dit om te gebeur, moet sekere vleeslike werke in ons lewe sterwe en plek maak vir die geestelike vrugte. 

Ongelukkig sal ons solank ons op aarde is, altyd 'n stryd voer tussen die Gees en vlees wat albei in ons woon ( Gal.5:16 ev.) Die keuse van wie in ons gaan heers, berus by ons. Heiligmaking is wanneer ons kies om 'n verandering in ons lewe te bring. Daarmee sal die Here ons help (Rom.12:2). Hy sal nooit teen ons keuse indruis nie. Ons het die ewige lewe gekies wat Hy vir ons aangebied het. Nou gaan ons verder en kies ook om die lewe te leef wat Hom behaag. Kortliks, ons kies wie ons God is en dien Hom, ons kan nie twee gode dien nie. Ons kies om goeie vrugte te dra (Joh.15).

Bid asseblief gereeld en getrou vir ons land en volk en ook by name vir ons regering. Die Here is lief vir ons. Kom ons dra ons liefde vir Hom elke dag net meer en meer uit. 

[Dankie, Anoniem, vir die deel van hierdie gedagtes.]

Mossiestilte: God se Genade

Die aarde en alles wat daarop is, die wêreld
en dié wat daar woon, alles behoort aan die Here,
want Hy het die fondamente daarvan in die see gelê
en dit stewig gevestig in die waters.
Psalm 24:1-2 NAV

God het die aarde se fondasies in die see gelê, sê Dawid - volgens sy antieke verstaan van die wêreld. Met ons oneindig beter wetenskap handhaaf ons egter dieselfde waarheid: God het alles gemaak! HY het die heelal beplan en dit toe laat bestaan, laat voortkom. HY weet van elke hemelliggaam en elke krag, HY ken die misterieë van die spoed van lig, van donker energie, van die kragte wat atoomdeeltjies bymekaar hou of wat galaksies uitmekaar dryf. God is die Fisikus, die Wetenskaplike, die Projekbestuurder en ook die Eienaar - dis alles Syne! Hy ken ook elke mens, want Hy het elke mens láát ontstaan. Daarom is elke mens ook Syne: gelowig of ongelowig, gehoorsaam of nie, of hulle Jood, Christen, Moslem of Hindoe is - elke mens behoort aan Hom. Bekering is om dit te besef en na die Maker, die Kunstenaar terug te keer, om in lyn te kom met SY plan. Wie ken jou beter as HY wat jou ontwerp het?

Dankie, Hemelse Kunstenaar, dat U elkeen van u kunswerke so liefhet. Ook vir my. Amen.

Mossiestilte: Matt. 6:21-23 + 33

want waar julle skat is daar sal julle hart ook wees.

Die lamp van die liggaam is die oog. As jou oog dan reg is, sal jou hele liggaam verlig wees.

Maar as jou oog verkeerd is, sal jou hele liggaam donker wees. As dan die lig in jou donkerheid is, hoe groot is die donkerheid  nie!

Sien is glo. Dit wat ons sien is nie altyd reg nie. Jesus het op 'n keer vir die Fariseërs gesê: Omdat julle sê julle sien, daarom is julle blind.

Let op, jou oog is die LAMP van jou liggaam en as dit reg is, verlig dit die hele liggaam. 

Soek dus eers die koninkryk van God EN sy geregtigheid ... jou oë moet dus op God gerig wees en nie op die vleeslike begeertes nie; fokus op die skatte in die hemel en maak dit bymekaar.

Goeie Vader, ek vestig my oog op U, om te doen wat U verlang. Ek bied my liggaam as woning vir U aan. Laat u Heilige Gees in my woon; Christus in my, die hoop op heerlikheid. Amen.

[Aangestuur deur Pieter Swanepoel]

Mossiestilte: Matt. 11:28-30

Kom na My toe almal wat vermoeid en belas is, en ek sal julle rus gee. Neem my juk op julle en leer van My, want Ek is sagmoedig en nederig van hart, en julle sal rus vind vir julle siele; want my juk is sag en my las is lig.

Jesus nooi jou vandag uit: Kom na My toe, Jesus is die Messias, jou Verlosser, sy planne is reeds uitgewerk vir jou; daardie swaar las wat wat die wêreld of jyself jou laat dra, wil Hy vanoggend weg neem en jou rus gee.

Sy juk is sag op jou, leer van Hom; jy weet nie eers sy juk is op jou nie, so sag is dit. Hy is sagmoedig en nederig van hart en Hy kom gee jou vanoggend rus vir jou siel. Kom na Hom toe en verloor jou in sy sagmoedigheid en nederigheid; steek jou hande uit na Hom en ontvang in oorvloed wat Jesus vir jou in stoor het. Sy juk is sag en sy las is lig, teenoor die wêreld se hardheid. Dalk is jy hard op jouself.

Here, my Verlosser, ek reik uit na U vanoggend en kom sit by U voete. by u voete is daar oorvloed van rus en vrede, is daar genesing en verkwikking, is daar rykdom en blydskap. Ek kom om U te verheerlik en myself in u heerlikheid te verloor terwyl ek saam met U in hemelse plekke sit. Laat u koninkryk kom op my en my gesin en my vriende en op aarde, net soos in die hemel. Ek sien die hemel geopend en die engele van God opklim en neerdaal (verg. Joh1:52). U gee my u volheid, my barmhartige Vader. Amen.

[Aangestuur deur Pieter Swanepoel]

Mossiestilte: Mat 6:34

Kwel julle dus nie oor môre nie, want môre sal hom oor sy eie dinge kwel. Elke dag het genoeg aan sy eie kwaad.

God het klaar die antwoorde vir die dag van môre. Bekommer jou dus nie oor môre nie. Kyk uit vir God se seën oor jou vandag.

 
Elkeen wat bid ontvang (7:7); i.p.v. om jou te bekommer, begin om tot God te bid. As jy sukkel daarmee begin om die Psalms te lees, of vind 'n vriend wat saam met jou kan bid. God sal vir jou voorsien; Hy weet klaar wat jy wil bid nog voor jy begin; stel jou vertroue in die Here.

Here en Almagtige God, ek kom om tot U te bid vandag. U weet watter probleme vir my wag. U ken my tekortkominge. U alleen is my Verlosser. U voorsien daagliks vir my wat ek benodig. U verander my donker in lig. In my vallei is U steeds my God. Vandag gaan ek met gejubel in, want U maak my pad gelyk en beveel u engele om my op die hande te dra. U genade is vir my genoeg. Amen.

[Aangestuur deur Pieter Swanepoel]

Mossiestilte: Matt. 12:24 en 32

Maar toe die Fariseërs dit hoor, sê hulle: Hy dryf die duiwels nie anders uit as deur Beëlsebul, die owerste  van die duiwels nie.

vers 32 sê Jesus: 

En elkeen wat 'n woord spreek teen die Seun van die mens, dit sal hom vergewe word; maar elkeen wat spreek teen die Heilige Gees, dit sal hom nooit vergewe word nie, nie in hierdie eeu nie en ook in die toekomende nie.

'n Ernstige boodskap teen hedendaagse Fariseërs en Godloënaars. Die Fariseërs het nooit kon dink watse verrykende gevolge hulle woorde dra nie; hulle het eintlik die Heilige Gees in Jesus beledig. Kom ons wees versigtig wat ons sê teenoor ander, sodat ons nie 'n oordeel oor onsself uitspreek nie. Lees gereeld die woord van God, mediteer oor die woord van God en bid vanoggend die woord van God, oor jouself, jou familie en vriende.

Dankie Vader, vir u woord wat onder ons kom woon het. Ek bid U, dat U deur die onderskeiding van die Heilige Gees in my lewe, my sal leer om u woord reg te interpreteer. Leer my meer van die Vader en leer my om die hart van die Vader te spreek. Leer my om mense te versterk met u woord, In Jesus Naam, Amen.

[Aangestuur deur Pieter Swanepoel]

SNAAKS ...

... hoe baie R100 is as jy dit kerk toe neem, en tog so min as jy supermark toe gaan.
... hoe lank is 'n uur as jy die Here dien en hoe kort 60 minute is as jy langs die viswaters sit.
... hoe moeilik dit is om 'n hele hoofstuk van die Bybel op een slag te lees en hoe maklik dit is om 'n hele roman deur te lees.
... hoe ons nie weet wat om te sê as ons bid nie - en tog kan ons ure lank oor nietighede gesels.
... hoe mens te moeg is na werk om biduur toe te gaan, maar hoe verfris jy voel as daar partytjie gehou word.
... hoe daar nie nog tyd is om op die kerkraad of vrouediens te dien nie, maar hoe 'n mens ure lank na TV, FB en videos kan kyk.
... hoe verveeld mens kan raak wanneer die dominie 30 minute lank preek, maar hoe interessant 'n vollengte rolprent kan wees.
... hoe onbekwaam 'n mens is om vir Here te werk, maar hoe op hoogte van sake jy kan wees oor die politiek van die dag.

Nee, dit is maar net tekens van waar ons prioriteite lê - en van ons ware toewyding aan die God wat ALLES vir ons gegee het

"Jy moet die Here jou God liefhê met jou hele hart en met jou hele siel en met jou hele verstand.
Dit is die eerste en groot gebod." Matt 22:37. 

[Eerw. Jan Muller]

Mossiestilte: Matt. 9:22

En Jesus het omgedraai  en haar gesien  en gesê: hou goeie moed, dogter, jou geloof het jou gered. En die vrou het gesond geword van daardie uur af.

Wil jy Jesus vandag aanraak? Is jy moedeloos oor jou omstandighede? Christus is die Geneser en wil jou ook aanraak. Jesus wil vir jou hoop gee vir dié dag en wil net hê dat jy Hom moet vertrou en in geloof na Hom toe gaan.

Here, my God, ek kom met geloof na U dat U my redding sal skenk en my genees sodat U naam verheerlik kan word. Ek wil vanoggend uitreik en net die soom van U kleed aanraak. Met U wat die bose oorwin het en omdat U leef, sien ek kans vir vandag met al sy uitdagings. Amen. 

[Aangestuur deur Pieter Swanepoel.]

Mossiestilte: Matt. 14:36

en hulle het Hom gesmeek dat hulle net maar die soom van sy kleed mag aanraak; en almal wat dit aangeraak het, het gesond geword.

Almal wat ongesteld was, is na Hom gebring in die omgewing van Gennésaret.
Het jy dalk vanoggend 'n siekte of kwaal of probleem? Kom na die Geneesheer; al raak jy net die soom van sy kleed aan, sal jy genees word. Het jy die geloof? Jou geloof sal jou red, want hoekom raak jy Hom aan; omdat jy glo Hy kan jou genees, red, of jou oplossing vir jou probleem wees.

Here, ek erken dat U die Geneesheer is en elkeen wil genees. Soms is ek ook 'n kleingelowige soos Petrus, maar ek weet u barmhartigheid tel my op en U raak my aan met u goedheid. Ek wil net u soom van u kleed aanraak, want ek glo U is my oplossing vir my probleme deur U groot genade. Aan U al die aanbidding en dank vir U Almag in my lewe. Amen.

[Aangestuur deur Pieter Swanepoel]

Mossiestilte: Wat is jou lewe werd?

Dink 'n bietjie hieroor  - daar sterf 166,859 mense elke dag! EN VANDAG WAS JY NIE EEN VAN HULLE NIE! Jy het nog 'n kans. Gebruik dit ten goede.

MATTEUS 10:29-31 Afrikaans 1983 (AFR83)
“Is twee mossies nie vir 'n sent te koop nie? En tog sal nie een van hulle op die grond val sonder die wil van julle Vader nie. Van julle is selfs die hare op julle kop almal getel. Moet dan nie bang wees nie. Julle is meer werd as baie mossies.”

Die lewe gaan daaroor om in Christus te lewe. Paulus sê in Filippense 1:20-21: “... Ek wil ook nou, soos nog altyd, met alle vrymoedigheid deur my hele wese Christus verheerlik in lewe en in sterwe, want om te lewe, is vir my Christus, en om te sterwe, is vir my wins.”

Elke dag is 'n nuwe kans wat voor jou deur gelê word. Gebruik dit - As ‘n mens nie gereed is om te sterf nie, is jy eintlik ook nie gereed om te leef nie! Dink weer mooi daaroor ...

[Aangestuur deur Pieter Swanepoel]