Gedagte uit 'n koevert: Die eie-ek

Elke dag word daar gesnoei

Aan die eie-ek wat nog iewers broei

Altyd groei daar weer 'n loot

Wat jy gedink het, is lankal dood

So moet die Snoeier aan jou werk

Elke dag en dit maak jou net sterk

Die middelstam waaraan die takke groei

Sodat dit elke jaar net mooier bloei.  

[Dankie, Mariet Hobbs]

Gedagte uit 'n koevert: Die geheim van 'n gelukkige lewe

Een van die geheime 

van ‘n gelukkige lewe,

is dankbaarheid. 

As ek en jy dit kan regkry 

om met dankbaarheid te leef, 

verander dit die wêreld vir ons. 

Begin ons verby die dinge kyk

wat die lewe vir ons moeilik maak, 

en sien ons die seën wat ons het, raak.

Gedagte uit 'n koevert: Dankbaarheid leef in aksies

Dankbaarheid is egter nie net ‘n emosie nie,
maar gaan altyd oor tot aksie.

Dankbaarheid inspireer my om my geloof uit te leef,
om saam met ander gelowiges Sondae God te loof
en te dank vir Sy genade,
lief te wees vir God se kinders,
iets van die baie wat ek ontvang,
terug te gee met my tiende,
en elke dag met vreugde te leef!

Gedagte uit 'n koevert: Raadop?

Mense is dikwels RAADOP, 

nie omdat raad op is nie, 

maar omdat hulle nie die Raadsman 

geraadpleeg het nie.

Gedagte uit 'n koevert: Laste en bekommernisse

Wanneer ek my hand in Syne sit, 

word swaar laste ligter en 

bekommernisse kleiner.

Gedagte uit 'n koevert: God se liefde en genade

Vandag is die perfekte dag 

om God se liefde en genade 

te deel met almal om ons!

Gedagte uit 'n koevert: Haar kroon aan Sy voete

Een van die kapelane van wyle koningin Victoria het by geleentheid oor die wederkoms van Christus gepreek. Na die diens het die koningin teenoor die kapelaan opgemerk: "O, ek wens die Here kom nog in my leeftyd!"

"Waarom dan?" wou die kapelaan weet.

Die koningin was merkbaar aangedaan. "Ek sou so graag my kroon aan Sy voete lê."

Gedagte uit 'n koevert: Word stil ...

Soms neem die Heer die sonskyn weg 

en pak die wolke saam.

Daar is nie altyd vreugde nie; 

heel dikwels 'n traan.

Is dit nie dalk die tyd dat Hy wil nader aan jou kom?

Het jy toe 'n oomblik stil geword 

en mooi gepraat met Hom?

[AM du Preez]

Gedagte uit 'n koevert: Die skepping

Dit is verbasend hoeveel moeite God gedoen het om 'n volmaakte tuiste vir die mens te berei. Die berge, die dale en riviere, die diere, die visse en die voëls, die plante, bome en die blommeprag - alles het God terwille van die mens geskape. Daarom moet ons dit opreg waardeer en ten beste benut in plaas van dit te misbruik.  

Gedagte uit 'n koevert: Belofte

Moenie te gou moed opgee nie;

Vertoef by 'n belofte 

totdat God jou daar ontmoet.

[Spoorwegbode]

Gedagte uit 'n koevert: Storms

Jesus Christus is geen waarborg 

TEEN storms nie, 

maar Hy is 'n absolute waarborg 

IN die storm.

[Geleen] 

Gedagte uit 'n koevert: Spinnekop

'n Man het elke keer in die biduur gevra dat die Here tog die spinnerakke uit sy lewe moet verwyder, totdat iemand op 'n dag uitgeroep het: "Here, maak liewer die spinnekop dood!"

Gedagte uit 'n koevert: Toevlug

God is 'n Toevlug in die nood;

'n Rots wat altyd vas bly staan.

Psalm 46:1 

Gedagte uit 'n koevert: Wysheid

Enigiemand kan kennis opdoen, maar Wysheid moet van God verkry word.

[Spoorwegboodskapper]

Gedagte uit 'n koevert: Ons beste

As ons ons beste vir God gee,

kan ons Sy beste van Hom verwag, 

Gedagte uit 'n koevert: Knieologie

Baie predikers het al die onderspit gedelf, 

nie omdat hulle teologie verkeerd was nie,

maar omdat hulle hul knieologie verwaarloos het.  

[Die Pelgrim]

Gedagte uit 'n koevert: Wegkruip

Daar is baie mense 

wat vir die Here 

in die kerk wegkruip! 

Gedagte uit 'n koevert: Hoop

'n Godloënaar het 'n rede,

maar geen hoop nie.

'n Huigelaar het hoop,

maar geen rede vir sy hoop nie.

'n Christen het hoop

en 'n rede vir sy hoop.

[Anoniem]

Gedagte uit 'n koevert: Bruikbaar

Mense bid dikwels dat God hulle moet gebruik, maar Hy kan nie. Hulle is nie aan Hom oorgegee nie. Hulle stoflike belange, hul eer en posisie staan in die pad.

[Anoniem] 

Gedagte uit 'n koevert: Gewete wat rek ...

Wanneer 'n mens dink dat jou uitkyk op die lewe breër word,

is dit dalk maar net jou gewete wat jy laat rek.

[Anoniem]