Terugblik: Die gebed van 'n boom

Wanneer u by my verbystap

Sonder om my raak te sien

of dalk my takkies ongemerk te kneus

Wag 'n bietjie en staan eers stil.

Dis ek wat in koue winternagte

jou haard verwarm

Dis my vriendelike koeltes

wat jou teen die snikhete sonstrale laaf.

Dis my sappige vrugte wat jou op jou reis

verkwik en jou dors les.

Ek is die balke wat jou dak oor jou hoof vashou

Ek is die blad van jou tafel en die bed waarop jy rus

Ek is die hout van jou boot

en die handvatsel van jou gereedskap

Uit my kom die brood wat voed

en die blom vol kleur en geur.

Ek is die deur van jou woning

die hout van jou wiegie

en die kis van jou graf.

Uit my is eenmaal balke gekap

Waarmee 'n kruis gemaak is

Ek was die hout van Gods altaar vir sy seun

die hout wat 'n brug geword het.

Uit my stamme gebreek en fyngemaal deur die meule

Kom papier, ook die van Die Boek van God

oor my staan die Boodskap

van hoop en lewe geskrywe

My blare is tot genesing van die Nasies

Open. 22:2

Ek vra u daarom

Moet my nie beskadig of vergeet nie.

Kniel liewer by my en dank God vir my.

[Uit: Dorstfontein: Dutoitspan-gemeentemaandblad - April 1984]    

A TREE IS A SEED THAT TOOK A STAND.

Op 'n dag hou ek bo-op 'n berg stil in een van die plantasies by Tzaneen. Ek staan en kyk oor die omgewing (die Laeveld) en is seker ek kan tot by Phalaborwa sien. Ek hoor 'n voertuig  aankom en dit ry tot by my. 'n Voertuig van Merensky Bosbou. Die vuurtoring het rapporteer dat hulle 'n voertuig sien stilhou het in die plantasie. EK. Die bosbouer het kom kyk wat aangaan. 

Ons kyk saam na die omgewing.  Pragtig. 

Hannes, die bestuurder, vra my toe "WAT IS 'N BOOM"?

'n Boom? Wat 'n vraag. Ek dink 'n bietjie en besef hy wil vir my iets sê. En ek vra hy moet my vertel ...

A TREE IS A SEED THAT TOOK A STAND. 

Daar gaan klomp sade tot niet. 

Party lê en het op klip geval - ontkiem maar verdroog. 

Ander versuip. 

Ander lê bo-op die grond, ontkiem maar verdroog . 

Ander groei maar brand dood. 

Klomp redes waarom dit nie tot volwassenheid ontwikkel nie.  

Maar, teen die tyd wat dit boom geword het is dit 'n boom met 'getuienisse'. 'n Saad wat 'n klomp aanslae oorleef het.

My vriend/vriendin, as jy "boom" geword het, 50 verby, dan het ek baie respek vir jou. Dan beteken dit - "A tree that took a stand". 

Maar, dan vertel dit ook van genade en dat jy gespaar is sodat jy koelte kan gee, takke het waarop voëls kan sit en nesmaak, vrugte kan dra vir almal wat daarvan kan eet, hout het wat gebruik kan word, en 'n karakter het wat eie is aan jou. Pragtig gevorm en uniek. 

Jy was gevorm om 'n doel te dien. 

Jy is 'n uitverkose saad wat boom geword het. Jy het vrug, koelte, ens. vir ander. Ek dank God dat ek vanoggend vir jou kan sê dat jy spesiaal gespaar was tot nou. 

Vader, ek bid vanoggend vir elke "boom wat staan". Dat U vanoggend vir elkeen sy of haar waarde sal wys en dat hulle ook dit sal uitleef.

Dankie Vader dat ons tot hier gevorder het. Dat ons vrug het vir ander om te eet. 

Ons loof U groot en Heilige Naam.

[Dankie, ds. Brahm Reyneke, dat jy hierdie met ons deel.]

Lewensles

Hierdie boom staan steeds regop nadat die wind, weer, water en storms die sand onder hom weggekalwe het ... omdat sy wortels diep in die grond as fondasie vasgeanker is ... 

Wat is die fondasie waarop jou lewe gebou is? Hoe diep en stewig is jou geloofswortels in God, Sy Woord, Liefde en trou, vasgeanker? Sal jy kan staande bly ondanks die lewenstorms wat op pad is?... 

Maak nou seker ... Maak nou reg!...