Voorbidding vir oom Essie en sy gesin

Dit is met die groot leedwese dat ons van Annatjie Esterhuyzen se afsterwe verneem het. As 'n jarelange Dutoitspanner het sy haar plek vir baie jare op vele terreine volgestaan op haar stil vriendelike manier. 'n Staatmaker wat nie geskroom het om haar deel te doen nie. 

Oom Essie en familie, mag die Almagtige julle dra wanneer julle voete te swak is om self te loop. Mag die mooi herinneringe aan haar julle bybly en troos."

Woorde skiet te kort in hierdie tyd van hartseer. Weet egter dat ons as gemeente aan julle dink en vir julle bid. Baie sterkte in die moeilike tyd.

Lewensviering van ds. Keydy O'Callaghan

Maandag word daar afskeidgeneem van ds. Keydy O’Callaghan. Jy is welkom om die diens by te woon om saam met ander ’n lewe te onthou wat soveel mense geraak het.

Plek: NG Kerk Bakenskop Kimberley

Datum: 17 Augustus 2026 (Maandag)

Tyd: 10:00

Kleredrag: Vier sy lewe in kleur - verkieslik nie swart nie,

asseblief.

Inligting van Bakenskop se FB - klik HIER. 

In liefdevolle herinnering ...

Ons het met leedwese verneem van die afsterwe van ds. Keydy O'Callaghan. Hy is eergister (12 Augustus 2026) oorlede. Keydy was van 01/01/2000- 25/02/2007 in Dutoitspan-gemeente werksaam.

Ons bid dat sy familie die troosvolle nabyheid van die Here in hierdie tyd sal ervaar.

[Klik HIER vir inligting - hy was ook 'n NK-berader.]

Troosdiens: Rinus Slabbert

PLEK:

NG Gemeente Dutoitspan

DATUM:

20 Junie 2025

TYD:

11:30

PREDIKER:

Ds. Ensie Enslin 

'n Kers vir Rinus Slabbert

Ewigheid

Iewers is dit als verby
en staan jy wat agterbly
vir lank verslae, verstom, verpletter …
Verblind!

Want sien jy my dan nie dwaal
deur die melkweg nie?
En voel jy nie hoe waai
my asem in die winde nie?
Hoor jy nie my fluisterstem
oor veld en vleiland nie?

Jy bly soek my
tussen klip en steen
en jy mis my -
jy mis my

waar ek oor jou reën …

[Digter: Braam Oberholzer]

Die troosdiens van Rinus Slabbert vind 20 Junie 2025 om 11:30 plaas. Die diens sal deur ds. Ensie Enslin gehou word. 'n Groot boom het in Dutoitspan-gemeente geval. Ons sal Rinus onthou as die omgeemens met die groot hart vir wie geen taak te groot of te onmoontlik was nie. Uitreik was 'n natuurlike reaksie, terwyl sy linkerhand nie geweet het wat sy regterhand doen nie. 

Ons bid vir Selma, die kinders en kleinkinders troos toe in hierdie hartseertyd.

Koesterende genade vir die Le Roux-gesin met die afsterwe van 'n geliefde eggenoot, pa en oupa

Piet le Roux saam met sy kleindogter Lisa.

Wanneer dit tyd word om te groet,

kan ons dit doen met die wete dat die Here in beheer is

en dat sy tydsberekening volmaak is.

'n Kers vir Piet le Roux

Hier aan die einde van my lewenspad

Het die son vir my finaal gesak,

Maar moenie huil en treur oor my 

O nee, wees bly: My siel is vry.

Mis my 'n rukkie - maar nie vir lank

met kop omhoog en geen hartseer klank.

Onthou hoe het herinneringe ons lewenspad gebaan

Mis my - maar laat my gaan.

Hierdie pad moet ons alleen stap en alleen

moet ons elke die tog aanpak.

Dit is alles deel van God se Meesterplan op pad

na waar die ewige die tydelike vervang.

So wanneer julle eensaam en hartseer voel,

laat vriende en familie se liefde en troos hul oorspoel.

In goed doen aan ander kan g'n droefheid bly staan 

Mis my - maar laat my gaan.

Dit is met harseer dat ons die gemeente inlig van Piet le Roux se afsterwe gisteraand. Ons sal hom onthou as die medic van die gemeente, wat op die kerkraad gedien het en ook betrokke was by die gesinsbedieningsgroep. 

Ons bid vir Bets, Gerhard en Johan troos toe in hierdie hartseertyd.