Afkondiging: Welkom by eerskomende Sondag se erediens

Dink hieroor: God se oneindige liefde

Redding is 'n gawe van God se oneindige liefde. Die hemel is net ons s'n weens sy genadegawes. 

Menslike trots het geen plek in hierdie verlossingswerk nie. Ons nuwe lewe in Christus is God se kreatiewe meesterstuk. Hy het 'n pad van goeie werke voorberei vir ons en Hy sal daardie goeie werke in ons lewens laat gebeur soos ons deur die geloof wandel. 

Dit is die Christelike lewe: Want deur genade is julle gered, deur die geloof - en dit is nie uit julleself nie, dit is die gawe van God - nie deur werke nie, sodat niemand kan roem nie. Want ons is God se handewerk, wat in Christus Jesus geskep is om goeie werke te doen, wat God vooraf voorberei het vir ons om te doen. (Efesiërs 2: 8-10, NIV)

Elke goeie en volmaakte gawe is van bo af, afkomstig van die Vader van die hemelse ligte, wat nie verander soos verskuiwende skaduwees nie. Hy het gekies om ons geboorte te gee deur die woord van waarheid, sodat ons 'n soort eersteling kan wees van alles wat hy geskep het. (Jakobus 1: 17-18, NIV)

Afkondiging: Besoek Sally Aucamp

Mossiestilte: Klaag. 3:26-29 (NLV - 2011)

Dit is goed om geduldig te wag totdat die Here ons red.
Dit is goed om van jongs af te leer om geduldig op die Here te wag.
Mense moet geduldig sit en wag totdat die Here aandag aan hulle gee.
Daar is hoop vir jou as jy stilbly.

Met die tegnologie tot ons beskikking word die lewe al hoe vinniger en wil ons nie wag vir enige iets meer nie.
Kettingwinkels laai kruideniersware by jou huis af.
Jy kan nou inmiddellik met iemand kommunikeer en wil nie jou woorde oordink nie.
Somtyds laat die tegnologie jou in die steek, dan moet jy vir 'n part, of herstel wag.
Die Here se ore is nie toe nie. Hy hoor jou nog voor jy praat en ken jou behoeftes; Hy het nie jou tegnologie nodig nie.
God verlang egter na die stem van jou afhanklkheid en wil met jou kommunikeer.
Vra Hom, rig jou versoeke in geloof en wag in stilte, en sien hoe jou lewe verander en Hy jou antwoord.

Here, vanoggend sonder ek my af in U woord en wil ek U stem hoor na al my klagtes en versoeke. Ek vertrou U, Here. U alleen is my antwoord; U alleen weet wat die regte plan en uitkomste vir my saak is. Ek rig vanoggend my gebed na U en ek het in geloof 'n verwagting van u planne, daarom loof ek U en kyk op en bly stil en wag ... Amen.

[Aangestuur deur Pieter Swanepoel]

Uitreik: Uitreikingsprogram by VGK Ring van Upington

Die naweek het Annatjie Enslin as deel van Dutoitspan se Uitreikingsprogram, 'n kursus in Upington by die VGK Ring van Upington aangebied. 

Byna 70 jeugleiers uit 7 gemeentes is opgelei om lesmateriaal op 'n prettige manier te gebruik om dissipels in God se Koninkryk te maak. Die jeugleiers moes maar hul grootmensskoene uittrek en self weer kinders word om saam speletjies te speel, blokraaie en woordsoek in te vul, Bybelteksverse aan te leer, ens. Die kursusgangers het hope pret gehad. 

Dit was 'n geseënde naweek: 'n verrykende kursus wat tot die hart gespreek het, het die deelnemers toegerus met waardevolle kennis en vaardighede, sodat hulle met selfvertroue kan uitgaan en jong dissipels kan wen, wat op hulle beurt weer 'n verskil kan gaan maak aan diegene wat hulle pad kruis. 

Dié naweek is afgesluit met ds. Ensie wat Sondag by VGK Rainbow gepreek.

HEBREËRS 12:28-29 AFR53 (Afrikaans 1933/1953)
Daarom, omdat ons 'n onwankelbare koninkryk ontvang, laat ons dankbaar wees, en so God welbehaaglik dien met eerbied en vrees.

Jongmense moet eendag, waar hulle ook al gaan, “kerk” kan wees.

Foto's: Annatjie Enslin

Uitreik: Die eerste in twintig jaar

Een koue wintersaand (so verhaal dr. Cuyler) het ek my eerste besoek afgelê by 'n ryk koopman in New York. Toe ek by die voordeur uitgaan en 'n snerpende windjie daar inwaai, sê ek: "Wat 'n vreeslike nag vir die armes!"

Die man het teruggegaan en bring my toe 'n rol banknote met die woorde: "Gee tog asseblief hierdie geld aan die armes wat u ken."

'n Paar dae later het ek aan hom 'n dankie sê-brief geskryf namens die dankbare armes wat deur sy milddadigheid gehelp is. "Hoe kom dit tog," het ek daarby gevoeg, "dat 'n man wat so vriendelik teenoor sy medemens kan wees, tog altyd so onvriendelik is jeens sy Saligmaker, deur Hom sy hart te weier?"

Hierdie vraag het hom diep in sy binneste getref. Hy het vir my 'n boodskap gestuur om hom te kom spreek, en dit was nie lank nie, of hy het hom aan Christus oorgegee. Van toe af was hy 'n baie nuttige en entoesiatiese Christen gewees. Skokkend was egter die feit dat hy vir my vertel het dat ek die eerste persoon was die afgelope 20 jaar wat met hom oor sy siel gepraat het.

[Dr. Theodore Ledyard Cuyler (1822-1909) uit Die Wekker]

Getuienis-uitreik:

Wanneer: Getuienis-uitreike vind Sondae direk na die erediens plaas.

Kontak Coen by: 082 821 0217 vir verdere inligting.

Mandjie Hoop: Dis nie God se werkswyse nie

Dikwels land daar gebedsversoeke per e-pos, whatsapp of sms op jou foon wat sê dat indien jy nie vir ‘n bepaalde saak bid nie of die gebedsketting breek, dit vir jou en so baie mense tot nadeel sal wees. Slegte dinge kan gebeur.

Dit is nie hoe God werk nie!

As jy egter by ‘n gebedsaksie wil inskakel, waar dit vir jou gaan om niks anders as die belange van God se Koninkryk nie, doen jy die regte ding. (Kontak die kerkkantoor vir meer inligting.)

Ons kan met sekerheid weet dat God ons liefhet en dat elkeen van sy kinders ‘n plek in sy groter plan beklee.

[Bron: Gebed, ‘n Bybelstudie - Johan Smit]

Statistiek: Dankie vir 328 000 e-besoeke

Afkondiging: Bid saam met ons vir ons gemeentelede

Afkondiging: Bid saam met ons vir ...

Seënbede: Mag jy vandag geseën word ...

Die Here sal jou seën en jou behoed;
die Here sal sy aangesig oor jou laat skyn en jou genadig wees;

die Here sal sy aangesig oor jou verhef en aan jou vrede gee.
Numeri 6:24-26

Wat doen jy op Sondae?

Niemand kan kerkbesoek verwaarloos en geestelik vorder nie.

Hoe meer jy wegbly, hoe minder sal jy lus kry om te gaan, en hoe makliker sal jy die dag van die Here ontheilig.

Iemand wat van die kerk af los raak, verloor sy sin vir waardes met betrekking tot God en die ewige dinge. Hy vind iets anders om hom mee besig te hou en word maklik opgeneem in die maalkolk van dolle plesierversugting.

Hierdie dinge verskaf egter nie die versadiging en satisfaksie waarna sy siel smag nie. Daardie leemte in sy binneste word al groter, totdat die lewe eindelik, ontbloot van alle sin en betekenis, 'n vermoeienis en 'n oorlas word, met die moontlikheid van selfdood nie uitgesluit nie.

Dit klink miskien vergesog en onwaarskynlik, maar dit is die verhaal van menige persoon wat van God af weggedwaal het - en die eerste stap op daardie weg was verontagsaming van Gods Woord, van Sy Huis en van Sy Dag.

* Maak 'n gewoonte daarvan om Sondae die kerk te besoek. 

* Ontmoet God daar. 

* Hy daag altyd op vir die afspraak ... 

* En jy? 

* Wat doen jy Sondae?

Afkondiging: Nuwe intrekkers

Mossiestilte: Joh. 12:31

[Nou] is dit die oordeel van die wêreld, [nou] sal die owerste van hierdie wêreld buitentoe gedryf word.

Jesus het as Seun van die mens gesterf en vir jou sondes met sy bloed betaal, daar en dan aan die kruis.
Vers 32 kan met Joh. 14:3 vergelyk word vir verdere studie. Hy sal almal na Hom toe trek. Christus het die Satan (owerste van hierdie wêreld) oorwin en buitentoe uitgedryf. Wandel in die lig sodat die duisternis jou nie kan oorval nie.

Dankie Here, vir u getrouheid om vir my aan die kruishout te betaal. U het die owerste van die wêreld vir my oorwin. Ek is klaar veroordeel omdat ek in U glo, en as U van die aarde verhoog sal word sal U my na U toe trek. Amen.

[Aangestuur deur Pieter Swanepoel]

Afkondiging: Eerste Kwartaalprogram

Flitsgedagte: Genade

Verjaardagwense

Kerkgenotjies: Sondagskoolonderwyser

Geskiedenisonderwyser: Wanneer is Rome gebou?"

Kato: "In die nag."

Onderwyser: "Hoekom sê jy so?"

Kato: "Want my pa sê altyd Rome is nie in 'n dag gebou nie."

oooOOooo

Sondagskool-onderwyser: "Wat kan jy my vertel van die Dooie See?"

Jannie: "Meneer, ek het nie eens geweet dis siek nie." 

oooOOooo

Sondagskooljuffrou behandel Spreuke 6:6-8 met haar klassie. Sy vra vir Jannie om die gedeelte in die Bybel te lees.

Jannie: "Gaan na die mier, luiaard, kyk na sy weë en word wys! Hy wat geen aanvoerder, opsigter of heerser het nie, maak sy brood klaar in die somer, bêre sy voedsel weg in die oestyd."

Sondagskooljuffrou: "Jannie, kyk hoe fluks is die mier. Hy werk die hele dag sonder om te kla."

Jannie: "Ja, Juffrou en dan trap iemand op hom, Juffrou."

Vrydag Terugflits: Sondag se nagmaal

Fanie Minne, ds. Ensie Enslin en Malan Smith

Wat simboliseer nagmaal?

* Christus se opoffering: Die brood en wyn stel Jesus se liggaam voor wat gebreek is en Sy bloed wat gevloei het vir die sonde en verlossing van mense.

* Vergifnis en genade: Nagmaal herinner Christene aan God se groot genade, vergifnis en verlossing wat vryelik deur Christus se offer gegee word.
* Eenheid en gemeenskap: Deur nagmaal te deel, wys Christene hulle eenheid en saamwees as een geestelike familie, verenig deur Christus se opoffering (1 Korintiërs 10:16–17).

Here Jesus, Dankie dat U U liggaam en bloed gegee het vir my vergifnis en nuwe lewe. Terwyl ek U opoffering deur nagmaal onthou, vul my hart met dankbaarheid, nederigheid en liefde. Vernuwe my gees, versterk my geloof, en bring my nader aan U en my broers en susters in Christus. Mag ek nooit vergeet wat U vir my gedoen het om my vry te maak nie. Amen.

Foto's: Elsa Minne

Gedagte uit 'n koevert: Knieologie

Baie predikers het al die onderspit gedelf, 

nie omdat hulle teologie verkeerd was nie,

maar omdat hulle hul knieologie verwaarloos het.  

[Die Pelgrim]

Think about it: Each day choose ...

to live by choice, not chance;
to make changes, not excuses;
to be motivated, not manipulated;
to excel, not compete.

Choose self-esteem over self-pity.
Choose to listen to your inner voice,
not the random opinions of others.
Each choice you make
defines your future.

Choose to be happy!

Mandjie Hoop: Om God te kies, is om:

• Ewige lewe te kies
• Volkome liefde te beleef
• Genade te ontvang
• In Sy voorsiening te leef
Dis nie altyd maklik nie, maar dit’s altyd die moeite werd.
* KIES WYSLIK. 

* KIES VIR GOD.
Wat jy vandag saai in geloof, 

sal jy môre in seën oes!

Seënbede: Mag jy vandag geseën word ...

Mag jy altyd
Mure vir die wind hê
`n Dak vir die reën
Tee langs die kaggel
Plesier om jou op te beur
Jou geliefdes naby jou
En alles wat jou hart mag begeer. 

Afkondiging: Eerste Kwartaalprogram

Mossiestilte: Die Woord van God

Die Bybel is die Lewende Woord van die Lewende God en geen ander boek kan daarmee vergelyk word nie. Dit is 'n direkte openbaring van God aan die mens om die weg na die ewige lewe aan te dui; en ofskoon dit deur mense geskrywe is, was God self die Outeur daarvan. Sy oorsprong is Bonatuurlik en sy gesag Onbetwisbaar. Dit is Persoonlik van toepassing, besit Herskeppingskrag en is Geïnspireer in totaliteit.

Ongeveer 40 verskillende persone het die Bybel onder die inspirasie van die Heilige Gees geskryf. Hulle het 66 boeke oor 'n tydperk van byna 2000 jaar voortgebring. Hulle was in verskillende lande woonagtig en het in verskillende omstandighede grootgeword. Hulle het verskillende tydvakke belewe en was uit verskillende lae van die samelewing. Een was 'n groot wetgewer; 'n ander een was 'n banneling in Babilonië; nog een was 'n skaapboer van Tekóa; en 'n ander een was 'n skaapwagtertjie wat later 'n koning geword het. Sommige was heersers, ander weer onderdane; party was ryk en ander arm; onder hulle was geleerdes sowel as ongeletterdes; een was 'n dokter, 'n ander een 'n tollenaar en party was ongeletterde vissermanne.

Hulle het in verskillende tale oor elke denkbare onderwerp geskryf. Sommige het nooit die ander gesien of met hulle in aanraking gekom nie. Tog was daar verbasende harmonie in alles wat hulle geskrywe het. Hulle het EEN Boek geskryf. Soiets is ongeëwenaard in die letterkunde en is op sigself bewys van die Bomenslike en Bonatuurlike oorsprong van die Skrif.

Gebore in die Ooste, en geklee in Oosterse vorm en beeldspraak, betree die Bybel die weë van die wêreld met bekende voetstappe.

Die Bybel se boodskap is van toepassing op mense van alle tye en op alle vlakke van die samelewing. Dit spreek in honderde tale tot die harte van manne en vroue. Kinders luister met verwondering en genot na sy verhale, en wyse manne bepeins dit met diepe ontsag.

Dit is 'n woord van advies in tye van nood;

'n Woord van troos wanneer die onheil tref;

Dit verskaf lig in tye van donkerheid;

En dit adem mirre en wierook by die wieg en die graf.

Die kwaaddoeners en hooghartiges word deur sy uitsprake bedreig;

Maar tot die gewondes en boetvaardiges spreek dit met die stem van 'n moeder.

Die hooftema van die Bybel is Christus en Sy versoeningsdood aan die Kruis om 'n verlore mensdom te red. 

Sy boodskap word volmaak opgesom in die woorde van Johannes 3:16: "Want so lief het God die wêreld gehad, dat Hy Sy eniggebore Seun gegee het, sodat elkeen wat in Hom glo, nie verlore mag gaan nie, maar die ewige lewe kan hê." 

[AJ Steyn]

Flitsgedagte: U wil

Verjaardae

Kerkgenotjies: Mediese raad

Een van die gemeenteseuns het optometrie gaan studeer. 'n Heel nuwe wêreld het vir hom oopgegaan, veral finansieelgewys.

Een van sy dosente in optometrie wou die boodskap aan sy studente tuisbring dat jy in die dae wanneer dit minder goed gaan met die ekonomie, maar moet sorg dat jy elke moontlike sent uit die kliënt kry, die volgende in gedagte moet hou:

As jy byvoorbeeld 'n bril verkoop, sê jy aan die kliënt: Dit sal R3000 kos."

Dan bly jy 'n oomblik stil. Kyk of hy frons.

As hy nie frons nie, sê jy: "Vir die raam."

Dan wag jy weer. As hy geen reaksie toon nie, sê: "Die lense sal 'n bykomende R2000 wees."  

Wag weer 'n oomblik. As hy nog steeds nie 'n oog trek nie, voeg jy by: "Elk."  

oooOOooo

Griep trek een van die predikante in Kimberley plat en hy is genoodsaak om dokter toe te gaan.

Die dokter skryf toe 'n hele klomp medisyne voor. Die uiteinde van die saak is 'n groot klomp rekenings wat hom 'n aansienlike bedrag geld uit sy sak jaag.

Hy gaan koop die pille en betaal die rekeninge.

By die huis gekom, gooi hy tot sy gesin se verbasing al die pille in die asdrom.

Sy bekommerde gesin wil weet hoekom hy dit doen.

Hy antwoord: "Die dokter moet lewe, die apteker moet lewe en ek moet ook lewe." 

Opdrag: 'n Beter self

"Jy moet 'n beter wêreld bou," het God gesê.

"Maar hoe?" het ek gevra. 

"Die wêreld is so groot en wyd, 

met moeilikheid gepla, 

en ek so nietig en so swak; 

wat sal ek reg kan kry??" 

Maar in Sy wysheid antwoord God: "Bou net 'n beter JY!"

[Dorothy R Jones]

Afkondiging: Welkom by Sondag se erediens

Gedagte uit 'n koevert: Wegkruip

Daar is baie mense 

wat vir die Here 

in die kerk wegkruip! 

Dink hieroor: Is ek "niemand" en "almal"?

Niemand sien jou trane nie.
Niemand sien jou hartseer nie.
Niemand sien jou pyn nie.
Niemand sien jou bekommernis nie.
Niemand sien jou teleurstellings nie.
Maar almal sal jou foute sien.

Mossiestilte: Ps. 113:7&8

wat die geringe uit die stof oprig, die behoeftige van die ashoop af verhef;

om hom te laat sit by die edeles, by die edeles van sy volk.

Die Here wil jou vandag oprig vanuit jou moeilikste tye en probleme, daar waar jy nie meer 'n uitkomste sien nie. Al is jy nou die slegste van die slegstes, wil die Here, jou weer in ere herstel met Homself.

In hemelse plekke wil God, jou laat sit, saam met die edeles.

Nie sodat dit in jou hart opkom om meerwaardig as ander te probeer lyk of te wees nie.

Onthou van waar jy kom en gee al die eer aan God, wat jou raakgesien en weer opgerig het.

Here, U, is hoog bo al die nasies; bo die hemele is sy heerlikheid. Wie is soos die Here onse God, wat hoog woon, wat laag neersien, in die hemel en op aarde? (Vers 4-6). HALLELUJA! Loof, o knegte van die Here, loof die Naam van die Here! Laat die Naam van die Here geprys word, van nou af tot in ewigheid! Van die opgang van die son tot by sy ondergang moet die Naam van die Here geloof word! (vers 1-3). Amen.

[Aangestuur deur Pieter Swanepoel]

Die wagtende wêreld

Evangeliesasiewerk word dikwels op groot skaal geloods en op groot skaal bygewoon wanneer een of ander beroemde prediker op die toneel verskyn en die dienste lei. (Dink maar aan die Mighty Men Conference.)

Dit is goed.

Maar die groot behoefte van ons dag is nie juis groot predikers nie. Wat die wêreld nodig het, is toegewyde kinders van God, wat hul getuienis op alle vlakke van die samelewing uitleef: in hul huise, gemeentes, woonbuurtes en werke.

Wanneer werkgewers hul werkers geestelik bearbei dan sal die aarde vol word van die heerlikheid van die Here.

[Ivor Powell]

Mandjie Hoop: Konstante krag ...

Jou geloof is nie 'n eindpunt wat jy moet bereik nie;
dis 'n reis van genade wat elke oggend nuut begin.
Laat ons vashou aan hierdie wete:
ons is nooit alleen op hierdie pad nie,
en Sy liefde is die konstante krag wat ons vorentoe dra.

Uitreik: Kom net soos jy is ...

'n Bekende filmbaas het eendag 'n bedelaar op straat raakgeloop, en omdat hy gedink het dat die man besonder geskik sou wees vir filmdoeleindes, het hy vir hom geld gegee en aangesê om vir diens by die ateljee aan te meld. 

Toe die bedelaar op die bepaalde tyd sy verskyning maak, was hy skaars herkenbaar. Hy was geskeer, en sy hare netjies geknip vir sy nuwe loopbaan. Tot sy teleurstelling moes hy egter verneem: "Ek is jammer maar ek kan jou nou nie meer gebruik nie."

Baie mense doen dieselfde met betrekking tot hul saligheid. Hulle wil hulself eers verbeter, terwyl die Here Jesus gekom het om sondaars te red. Die Here wil hê dat jy kom net soos jy is ...

Getuienis-uitreik:

Wanneer: Getuienis-uitreike vind Sondae direk na die erediens plaas.

Kontak Coen by: 082 821 0217 vir verdere inligting.

Afkondiging: Bid saam met ons vir ...

Seënbede: Mag jy vandag geseën word ...

met vaste HOOP

met SY GUNS 

en met SY GROOT GENADE!

Flitsgedagte: Genade

 

Afkondiging: Eerste Kwartaalprogram

Mossiestilte: Ps 119:105 - 'n Lamp vir die pad

"U Woord is 'n lamp vir my voet en 'n lig vir my pad." 

Die Here se Woord is 'n lamp vir ons voete en 'n lig vir ons pad. Die lig is sekerlik nie bedoel om kilometers ver vorentoe te skyn nie, maar in die donkerste nag gee die lamp lig vir die volgende stap. 

Die Woord is 'n lamp wat so ontwerp is dat dit net stap vir stap ons pad verlig. Ons moet nooit haastig wees nie en die lig vooruit wil loop nie. Ons sal die kosbare les van geduld en afwagting moet leer, indien ons in die lig wil wandel.

Die Here is nooit haastig nie; en as ons die lig verontagsaam omdat ons nie op Hom wil wag nie, dan loop ons die gevaar om ons teen die klippe op die lewenspad te stamp en oor die struikelblokke te val.

Die lamp skyn slegs vir diegene wat die Lewende Woord in die geloof aanvaar het en volgens Sy eise wandel. Dit is wanneer die Heilige Gees ons oë vir die waarhede in die Woord oopmaak, dat die lamp se lig oor ons pad val en ons voetstappe beveilig.

Verjaardagwense

Chrisna, met jou verjaardag herdenk jy jou unieke menswees. Jy is een van sy kunswerke en daarom maak die Here bemoeienis met jou en doen Hy moeite met jou. Leef in dankbaarheid jou uniekheid uit. Mag God jou altyd beskerm, jou hand vashou en jou lei op elke tree van jou pad. Mag Hy jou seën met vreugde, wysheid en liefde in oorvloed. Dankie dat jy as voorbidder passievol vir Dutoitspan-gemeente en -familie intree.

Kerkgenotjies: Probleemoplossings

In Kimberley is daar nie baie werk nie en mense hou maar voortdurend die media dop vir werk of vir 'n beter werk. 'n Man wat suksesvol om 'n senior pos by 'n klein onderneming aansoek gedoen het, hoor van sy nuwe baas dat sy salaris 'n miljoen rand per jaar sal wees.

"Hoe kan so 'n klein onderneming bekostig om my soveel te betaal?" wil hy weet.

"Dit is jou eerste probleem," antwoord die werkgewer.

oooOOooo

'n Skoolinspekteur het besoek aan 'n skool se godsdiensklas gebring. Hy vra toe vir Jannie wie vir al die skade aan Jerigo se mure verantwoordelik was. Jannie sê hy weet nie. En nie een kind in die klas kon die vraag beantwoord nie. Ook nie die onderwyser nie.

Toe die inspekteur by die skoolhoof kom, vertel hy hom dat niemand weet wie vir die skade verantwoordelik was nie en dat dit sekerlik nie 'n aanvaarbare toestand is nie. Hy is nie tevrede met die gehalte werk nie.

Waarop die hoof antwoord: "Moenie so bekommerd wees nie. Kry net vir my drie kwotasies en ek sal sorg dat die mure herstel word."  

Hoe begin ek my dag?

Elke oggend is 'n dolle gejaag. Dis 'n missie om almal wakker te kry en betyds gereed te kry vir skool en werk. Maar God wil hê dat ons verhouding met Hom deel van ons daaglikse roetine moet uitmaak.

Ons het 'n daaglikse oggendroetine, maar ons vergeet so maklik dat net om in die oggend wakker te word is alreeds ’n geskenk uit God se hand. Nie almal het vanoggend wakker geword nie. Hy skenk aan my nog ’n dag. Wat ek met die volgende 24 uur gaan doen, is my geskenk aan Hom.

Ons staan aan die begin van die tweede maand van 2026. Kom ons begin van vandag af met 'n wysiging in ons daaglikse oggendroetine:

1. Neem ’n wilsbesluit - begin met 1 minuut stiltyd per dag.

2. Doen dit elke dag - hierin lê die groot uitdaging.

3. Lees jou Bybel - begin met Psalms. Dit is dan ook jou manier om lof aan God te bring.

ONTHOU:

* Die Skrif kom van God af. 

* Dit is ons GPS. 

* Dit wys ons waar ons mense die pad byster raak, maar ... 

* Dit help ons weer terug op die regte pad. 

“ Die hele Skrif is deur God geïnspireer en het groot waarde om in die waarheid te onderrig, dwaling te bestry, verkeerdhede reg te stel en ’n regte lewenswyse te kweek, sodat die man wat in diens van God staan, volkome voorberei en toegerus sal wees vir elke goeie werk.” – 2 Tim 3:16-17 (Afr 83)

Verjaardae

Afkondiging: Welkom by die erediens

Gedagte uit 'n koevert: Hoop

'n Godloënaar het 'n rede,

maar geen hoop nie.

'n Huigelaar het hoop,

maar geen rede vir sy hoop nie.

'n Christen het hoop

en 'n rede vir sy hoop.

[Anoniem]

Pas oorlede

Dit was die aanhef van 'n roubrief wat deur 'n Engelse predikant aan sy gemeente gestuur is. Hy het baie gebid voordat hy die brief gepos het. Ds. Fox was bekend as 'n persoon wat ernstig was en wat vir jare onvermoeid in sy gemeente die Woord van God gebring het. Hy het met sy gemeente gepraat oor hulle geestelike agteruitgang en hulle geroep tot bekering. Sy gebed en begeerte was dat hulle waarlik die beeld van Jesus sou uitdra aan 'n verlore wêreld. 

Gedurende huisbesoek het hy elke lid van die gemeente aangespreek en die Woord aan hulle verkondig, waarna hy 'n gebed gedoen het. Dit het egter alles niks gehelp nie. Ds. Fox se gemeente was maar net lidmate van die kerk omdat dit tradisie was. Hulle het dit as 'n prestasie beskou wanneer die kerk half of driekwart vol was. Daar was 'n koue atmosfeer in die kerk. Sekere gemeentelede het net sommige mense gegroet in die kerk en die res vermy. Party was belangriker as ander.

Op 'n sekere môre, nadat hy weer vir sy gemeente gebid het, het daar plotseling 'n vonkel in die oë van ds. Fox gekom. Hy het by sy skryftafel gaan sit, sy vulpen uitgehaal en die volgende roubrief aan sy gemeente met die bostaande opskrif geskrywe.

"Pas oorlede. Die gemeente is pas oorlede nadat sy haar lyding en smart kalm gedra het. Die roudiens word aanstaande Saterdagmiddag in die kerk gehou, waar daar nog geleentheid sal wees om die oorledene vir oulaas te sien."

Dit was veral die laaste sinsnede wat gemaak het dat die kerk volgestroom het van mense. Baie het hulself afgevra wat die dominee voor oë het. Die mense was gewoond dat hy nie ligsinnige dinge doen nie, dus moes daar iets ernstig agter geskuil het. Sal die kerk afgebreek word? Word die gemeente ontbind?

Onder, reg voor die preekstoel het daar 'n doodskis gestaan. Ds. Fox het die kansel bestyg en 'n kort boodskap gebring. In sombere woorde het hy die nagedagtenis van die oorlede gemeente herdenk. Sy het aan 'n langdurige en gevaarlike siekte gely en daarom gesterwe. Gelukkig het sy nie veel pyn verduur nie, maar is oorlede aan 'n langdurige lusteloosheid en swaarmoedigheid. Die feit dat daar geen pyn was nie, het juis die vroeë einde verhaas. Omdat sy gedink het dat sy niks makeer nie, het sy alle inspuitings geweier wat verseker nuwe lewe kon gebring het. So sag en rustig as wat sy die afgelope aantal jare was, so het sy gesterf. Die enigste wat van haar oorgebly het, is haar siel wat ons nou aan "die barmhartigheid van die almagtige God toevertrou." Hierna het hy gesê dat daar geleentheid is om plek langs die kis in te neem vir die laaste afskeidsgroet.

Skaam en vraend het die gemeente aanvanklik in hulle plekke bly sit, maar ds. Fox wat in alle erns langs die kis kom staan het, het die kerkraad gewink om ook hulle plekke daar te kom inneem.

Die broers het stadig na vore gekom en een vir een het 'n laaste blik in die kis gegee, waar, volgens die predikant, die oorskot van die oorlede gemeente lê. Baie min van die gemeente het onbeweeg gebly na hierdie gesig. Sommige het blykbaar geskrik terwyl ander se gesigte bleek geword het. Ander het weer vraend 'n verontwaardigde blik op die predikant gewerp, wat doodstil gestaan het, sonder om 'n woord te sê. Daar was slegs 'n groot liefde op sy gelaat vir die gemeente.

Langsaam volg die gemeente die voorbeeld van die kerkraad. In diepe eerbied soos met enige begrafnis, gaan hulle een vir een by die kerkdeur uit. Iemand het weer teruggegaan in die bank en die gesig met 'n sakdoek bedek. 'n Vrou het begin om gedemp te snik. In die kis het 'n groot spieël gelê. Wie hom oor die dooie gemeente buig, het homself in die spieël gesien.

Teen die aand staan daar 'n ouderling en sewe gemeentelede by ds. Fox op die stoep, daaronder was daar twee vroue en twee jongmense. Die ouderling wat die woord moes doen, het nie te op sy gemak gevoel nie. Hy sê: "Dominee, ons het almal begryp ... ons wil egter nie meer dood wees nie; ons wil 'n lewende gemeente van ons Here Jesus wees. Sal u ons help om dit te wees? En ... e... e... buite staan die res van die gemeente wat ons gestuur het om te kom praat."

[Bron: Die Pelgrim, Maart 1988, p. 20] 

Mandjie Hoop: Psalm 116:7

"Ek moet nou tot rus kom, die Here het goed aan my gedoen:"
Vrees en angs het 'n vreemde manier om in ons harte en lewens in te kruip.
Maar ons moet onsself herinner aan hoe God in die verlede vir ons onderneem het.
Getrouheid is deel van Sy karakter en Hy bly getrou.
So 'keer terug na jou rus', vind weereens jou vrede en veiligheid in Hom.

Gebed: Vader, as ek nadink oor hoe U my gehelp en goed vir my was, kan ek net verheug wees en in U vertrou. Ek sal in U rus en op U vertrou. Amen.

Week van gebed: Braam Grobbelaar van Moreletapark-gemeente

Foto's: Elsa Minne

Braam se motto in die lewe is dat Hy lief is vir die Here en graag in alle nederigheid ‘n verskil wil maak in mense se lewens.