Afkondiging: Eerste Kwartaalprogram

Mossiestilte: Die Woord van God

Die Bybel is die Lewende Woord van die Lewende God en geen ander boek kan daarmee vergelyk word nie. Dit is 'n direkte openbaring van God aan die mens om die weg na die ewige lewe aan te dui; en ofskoon dit deur mense geskrywe is, was God self die Outeur daarvan. Sy oorsprong is Bonatuurlik en sy gesag Onbetwisbaar. Dit is Persoonlik van toepassing, besit Herskeppingskrag en is Geïnspireer in totaliteit.

Ongeveer 40 verskillende persone het die Bybel onder die inspirasie van die Heilige Gees geskryf. Hulle het 66 boeke oor 'n tydperk van byna 2000 jaar voortgebring. Hulle was in verskillende lande woonagtig en het in verskillende omstandighede grootgeword. Hulle het verskillende tydvakke belewe en was uit verskillende lae van die samelewing. Een was 'n groot wetgewer; 'n ander een was 'n banneling in Babilonië; nog een was 'n skaapboer van Tekóa; en 'n ander een was 'n skaapwagtertjie wat later 'n koning geword het. Sommige was heersers, ander weer onderdane; party was ryk en ander arm; onder hulle was geleerdes sowel as ongeletterdes; een was 'n dokter, 'n ander een 'n tollenaar en party was ongeletterde vissermanne.

Hulle het in verskillende tale oor elke denkbare onderwerp geskryf. Sommige het nooit die ander gesien of met hulle in aanraking gekom nie. Tog was daar verbasende harmonie in alles wat hulle geskrywe het. Hulle het EEN Boek geskryf. Soiets is ongeëwenaard in die letterkunde en is op sigself bewys van die Bomenslike en Bonatuurlike oorsprong van die Skrif.

Gebore in die Ooste, en geklee in Oosterse vorm en beeldspraak, betree die Bybel die weë van die wêreld met bekende voetstappe.

Die Bybel se boodskap is van toepassing op mense van alle tye en op alle vlakke van die samelewing. Dit spreek in honderde tale tot die harte van manne en vroue. Kinders luister met verwondering en genot na sy verhale, en wyse manne bepeins dit met diepe ontsag.

Dit is 'n woord van advies in tye van nood;

'n Woord van troos wanneer die onheil tref;

Dit verskaf lig in tye van donkerheid;

En dit adem mirre en wierook by die wieg en die graf.

Die kwaaddoeners en hooghartiges word deur sy uitsprake bedreig;

Maar tot die gewondes en boetvaardiges spreek dit met die stem van 'n moeder.

Die hooftema van die Bybel is Christus en Sy versoeningsdood aan die Kruis om 'n verlore mensdom te red. 

Sy boodskap word volmaak opgesom in die woorde van Johannes 3:16: "Want so lief het God die wêreld gehad, dat Hy Sy eniggebore Seun gegee het, sodat elkeen wat in Hom glo, nie verlore mag gaan nie, maar die ewige lewe kan hê." 

[AJ Steyn]

Flitsgedagte: U wil

Verjaardae

Kerkgenotjies: Mediese raad

Een van die gemeenteseuns het optometrie gaan studeer. 'n Heel nuwe wêreld het vir hom oopgegaan, veral finansieelgewys.

Een van sy dosente in optometrie wou die boodskap aan sy studente tuisbring dat jy in die dae wanneer dit minder goed gaan met die ekonomie, maar moet sorg dat jy elke moontlike sent uit die kliënt kry, die volgende in gedagte moet hou:

As jy byvoorbeeld 'n bril verkoop, sê jy aan die kliënt: Dit sal R3000 kos."

Dan bly jy 'n oomblik stil. Kyk of hy frons.

As hy nie frons nie, sê jy: "Vir die raam."

Dan wag jy weer. As hy geen reaksie toon nie, sê: "Die lense sal 'n bykomende R2000 wees."  

Wag weer 'n oomblik. As hy nog steeds nie 'n oog trek nie, voeg jy by: "Elk."  

oooOOooo

Griep trek een van die predikante in Kimberley plat en hy is genoodsaak om dokter toe te gaan.

Die dokter skryf toe 'n hele klomp medisyne voor. Die uiteinde van die saak is 'n groot klomp rekenings wat hom 'n aansienlike bedrag geld uit sy sak jaag.

Hy gaan koop die pille en betaal die rekeninge.

By die huis gekom, gooi hy tot sy gesin se verbasing al die pille in die asdrom.

Sy bekommerde gesin wil weet hoekom hy dit doen.

Hy antwoord: "Die dokter moet lewe, die apteker moet lewe en ek moet ook lewe." 

Opdrag: 'n Beter self

"Jy moet 'n beter wêreld bou," het God gesê.

"Maar hoe?" het ek gevra. 

"Die wêreld is so groot en wyd, 

met moeilikheid gepla, 

en ek so nietig en so swak; 

wat sal ek reg kan kry??" 

Maar in Sy wysheid antwoord God: "Bou net 'n beter JY!"

[Dorothy R Jones]

Afkondiging: Welkom by Sondag se erediens

Gedagte uit 'n koevert: Wegkruip

Daar is baie mense 

wat vir die Here 

in die kerk wegkruip! 

Dink hieroor: Is ek "niemand" en "almal"?

Niemand sien jou trane nie.
Niemand sien jou hartseer nie.
Niemand sien jou pyn nie.
Niemand sien jou bekommernis nie.
Niemand sien jou teleurstellings nie.
Maar almal sal jou foute sien.

Mossiestilte: Ps. 113:7&8

wat die geringe uit die stof oprig, die behoeftige van die ashoop af verhef;

om hom te laat sit by die edeles, by die edeles van sy volk.

Die Here wil jou vandag oprig vanuit jou moeilikste tye en probleme, daar waar jy nie meer 'n uitkomste sien nie. Al is jy nou die slegste van die slegstes, wil die Here, jou weer in ere herstel met Homself.

In hemelse plekke wil God, jou laat sit, saam met die edeles.

Nie sodat dit in jou hart opkom om meerwaardig as ander te probeer lyk of te wees nie.

Onthou van waar jy kom en gee al die eer aan God, wat jou raakgesien en weer opgerig het.

Here, U, is hoog bo al die nasies; bo die hemele is sy heerlikheid. Wie is soos die Here onse God, wat hoog woon, wat laag neersien, in die hemel en op aarde? (Vers 4-6). HALLELUJA! Loof, o knegte van die Here, loof die Naam van die Here! Laat die Naam van die Here geprys word, van nou af tot in ewigheid! Van die opgang van die son tot by sy ondergang moet die Naam van die Here geloof word! (vers 1-3). Amen.

[Aangestuur deur Pieter Swanepoel]

Die wagtende wêreld

Evangeliesasiewerk word dikwels op groot skaal geloods en op groot skaal bygewoon wanneer een of ander beroemde prediker op die toneel verskyn en die dienste lei. (Dink maar aan die Mighty Men Conference.)

Dit is goed.

Maar die groot behoefte van ons dag is nie juis groot predikers nie. Wat die wêreld nodig het, is toegewyde kinders van God, wat hul getuienis op alle vlakke van die samelewing uitleef: in hul huise, gemeentes, woonbuurtes en werke.

Wanneer werkgewers hul werkers geestelik bearbei dan sal die aarde vol word van die heerlikheid van die Here.

[Ivor Powell]

Mandjie Hoop: Konstante krag ...

Jou geloof is nie 'n eindpunt wat jy moet bereik nie;
dis 'n reis van genade wat elke oggend nuut begin.
Laat ons vashou aan hierdie wete:
ons is nooit alleen op hierdie pad nie,
en Sy liefde is die konstante krag wat ons vorentoe dra.

Uitreik: Kom net soos jy is ...

'n Bekende filmbaas het eendag 'n bedelaar op straat raakgeloop, en omdat hy gedink het dat die man besonder geskik sou wees vir filmdoeleindes, het hy vir hom geld gegee en aangesê om vir diens by die ateljee aan te meld. 

Toe die bedelaar op die bepaalde tyd sy verskyning maak, was hy skaars herkenbaar. Hy was geskeer, en sy hare netjies geknip vir sy nuwe loopbaan. Tot sy teleurstelling moes hy egter verneem: "Ek is jammer maar ek kan jou nou nie meer gebruik nie."

Baie mense doen dieselfde met betrekking tot hul saligheid. Hulle wil hulself eers verbeter, terwyl die Here Jesus gekom het om sondaars te red. Die Here wil hê dat jy kom net soos jy is ...

Getuienis-uitreik:

Wanneer: Getuienis-uitreike vind Sondae direk na die erediens plaas.

Kontak Coen by: 082 821 0217 vir verdere inligting.

Afkondiging: Bid saam met ons vir ...

Seënbede: Mag jy vandag geseën word ...

met vaste HOOP

met SY GUNS 

en met SY GROOT GENADE!

Flitsgedagte: Genade

 

Afkondiging: Eerste Kwartaalprogram

Mossiestilte: Ps 119:105 - 'n Lamp vir die pad

"U Woord is 'n lamp vir my voet en 'n lig vir my pad." 

Die Here se Woord is 'n lamp vir ons voete en 'n lig vir ons pad. Die lig is sekerlik nie bedoel om kilometers ver vorentoe te skyn nie, maar in die donkerste nag gee die lamp lig vir die volgende stap. 

Die Woord is 'n lamp wat so ontwerp is dat dit net stap vir stap ons pad verlig. Ons moet nooit haastig wees nie en die lig vooruit wil loop nie. Ons sal die kosbare les van geduld en afwagting moet leer, indien ons in die lig wil wandel.

Die Here is nooit haastig nie; en as ons die lig verontagsaam omdat ons nie op Hom wil wag nie, dan loop ons die gevaar om ons teen die klippe op die lewenspad te stamp en oor die struikelblokke te val.

Die lamp skyn slegs vir diegene wat die Lewende Woord in die geloof aanvaar het en volgens Sy eise wandel. Dit is wanneer die Heilige Gees ons oë vir die waarhede in die Woord oopmaak, dat die lamp se lig oor ons pad val en ons voetstappe beveilig.

Verjaardagwense

Chrisna, met jou verjaardag herdenk jy jou unieke menswees. Jy is een van sy kunswerke en daarom maak die Here bemoeienis met jou en doen Hy moeite met jou. Leef in dankbaarheid jou uniekheid uit. Mag God jou altyd beskerm, jou hand vashou en jou lei op elke tree van jou pad. Mag Hy jou seën met vreugde, wysheid en liefde in oorvloed. Dankie dat jy as voorbidder passievol vir Dutoitspan-gemeente en -familie intree.

Kerkgenotjies: Probleemoplossings

In Kimberley is daar nie baie werk nie en mense hou maar voortdurend die media dop vir werk of vir 'n beter werk. 'n Man wat suksesvol om 'n senior pos by 'n klein onderneming aansoek gedoen het, hoor van sy nuwe baas dat sy salaris 'n miljoen rand per jaar sal wees.

"Hoe kan so 'n klein onderneming bekostig om my soveel te betaal?" wil hy weet.

"Dit is jou eerste probleem," antwoord die werkgewer.

oooOOooo

'n Skoolinspekteur het besoek aan 'n skool se godsdiensklas gebring. Hy vra toe vir Jannie wie vir al die skade aan Jerigo se mure verantwoordelik was. Jannie sê hy weet nie. En nie een kind in die klas kon die vraag beantwoord nie. Ook nie die onderwyser nie.

Toe die inspekteur by die skoolhoof kom, vertel hy hom dat niemand weet wie vir die skade verantwoordelik was nie en dat dit sekerlik nie 'n aanvaarbare toestand is nie. Hy is nie tevrede met die gehalte werk nie.

Waarop die hoof antwoord: "Moenie so bekommerd wees nie. Kry net vir my drie kwotasies en ek sal sorg dat die mure herstel word."  

Hoe begin ek my dag?

Elke oggend is 'n dolle gejaag. Dis 'n missie om almal wakker te kry en betyds gereed te kry vir skool en werk. Maar God wil hê dat ons verhouding met Hom deel van ons daaglikse roetine moet uitmaak.

Ons het 'n daaglikse oggendroetine, maar ons vergeet so maklik dat net om in die oggend wakker te word is alreeds ’n geskenk uit God se hand. Nie almal het vanoggend wakker geword nie. Hy skenk aan my nog ’n dag. Wat ek met die volgende 24 uur gaan doen, is my geskenk aan Hom.

Ons staan aan die begin van die tweede maand van 2026. Kom ons begin van vandag af met 'n wysiging in ons daaglikse oggendroetine:

1. Neem ’n wilsbesluit - begin met 1 minuut stiltyd per dag.

2. Doen dit elke dag - hierin lê die groot uitdaging.

3. Lees jou Bybel - begin met Psalms. Dit is dan ook jou manier om lof aan God te bring.

ONTHOU:

* Die Skrif kom van God af. 

* Dit is ons GPS. 

* Dit wys ons waar ons mense die pad byster raak, maar ... 

* Dit help ons weer terug op die regte pad. 

“ Die hele Skrif is deur God geïnspireer en het groot waarde om in die waarheid te onderrig, dwaling te bestry, verkeerdhede reg te stel en ’n regte lewenswyse te kweek, sodat die man wat in diens van God staan, volkome voorberei en toegerus sal wees vir elke goeie werk.” – 2 Tim 3:16-17 (Afr 83)

Verjaardae

Afkondiging: Welkom by die erediens

Gedagte uit 'n koevert: Hoop

'n Godloënaar het 'n rede,

maar geen hoop nie.

'n Huigelaar het hoop,

maar geen rede vir sy hoop nie.

'n Christen het hoop

en 'n rede vir sy hoop.

[Anoniem]

Pas oorlede

Dit was die aanhef van 'n roubrief wat deur 'n Engelse predikant aan sy gemeente gestuur is. Hy het baie gebid voordat hy die brief gepos het. Ds. Fox was bekend as 'n persoon wat ernstig was en wat vir jare onvermoeid in sy gemeente die Woord van God gebring het. Hy het met sy gemeente gepraat oor hulle geestelike agteruitgang en hulle geroep tot bekering. Sy gebed en begeerte was dat hulle waarlik die beeld van Jesus sou uitdra aan 'n verlore wêreld. 

Gedurende huisbesoek het hy elke lid van die gemeente aangespreek en die Woord aan hulle verkondig, waarna hy 'n gebed gedoen het. Dit het egter alles niks gehelp nie. Ds. Fox se gemeente was maar net lidmate van die kerk omdat dit tradisie was. Hulle het dit as 'n prestasie beskou wanneer die kerk half of driekwart vol was. Daar was 'n koue atmosfeer in die kerk. Sekere gemeentelede het net sommige mense gegroet in die kerk en die res vermy. Party was belangriker as ander.

Op 'n sekere môre, nadat hy weer vir sy gemeente gebid het, het daar plotseling 'n vonkel in die oë van ds. Fox gekom. Hy het by sy skryftafel gaan sit, sy vulpen uitgehaal en die volgende roubrief aan sy gemeente met die bostaande opskrif geskrywe.

"Pas oorlede. Die gemeente is pas oorlede nadat sy haar lyding en smart kalm gedra het. Die roudiens word aanstaande Saterdagmiddag in die kerk gehou, waar daar nog geleentheid sal wees om die oorledene vir oulaas te sien."

Dit was veral die laaste sinsnede wat gemaak het dat die kerk volgestroom het van mense. Baie het hulself afgevra wat die dominee voor oë het. Die mense was gewoond dat hy nie ligsinnige dinge doen nie, dus moes daar iets ernstig agter geskuil het. Sal die kerk afgebreek word? Word die gemeente ontbind?

Onder, reg voor die preekstoel het daar 'n doodskis gestaan. Ds. Fox het die kansel bestyg en 'n kort boodskap gebring. In sombere woorde het hy die nagedagtenis van die oorlede gemeente herdenk. Sy het aan 'n langdurige en gevaarlike siekte gely en daarom gesterwe. Gelukkig het sy nie veel pyn verduur nie, maar is oorlede aan 'n langdurige lusteloosheid en swaarmoedigheid. Die feit dat daar geen pyn was nie, het juis die vroeë einde verhaas. Omdat sy gedink het dat sy niks makeer nie, het sy alle inspuitings geweier wat verseker nuwe lewe kon gebring het. So sag en rustig as wat sy die afgelope aantal jare was, so het sy gesterf. Die enigste wat van haar oorgebly het, is haar siel wat ons nou aan "die barmhartigheid van die almagtige God toevertrou." Hierna het hy gesê dat daar geleentheid is om plek langs die kis in te neem vir die laaste afskeidsgroet.

Skaam en vraend het die gemeente aanvanklik in hulle plekke bly sit, maar ds. Fox wat in alle erns langs die kis kom staan het, het die kerkraad gewink om ook hulle plekke daar te kom inneem.

Die broers het stadig na vore gekom en een vir een het 'n laaste blik in die kis gegee, waar, volgens die predikant, die oorskot van die oorlede gemeente lê. Baie min van die gemeente het onbeweeg gebly na hierdie gesig. Sommige het blykbaar geskrik terwyl ander se gesigte bleek geword het. Ander het weer vraend 'n verontwaardigde blik op die predikant gewerp, wat doodstil gestaan het, sonder om 'n woord te sê. Daar was slegs 'n groot liefde op sy gelaat vir die gemeente.

Langsaam volg die gemeente die voorbeeld van die kerkraad. In diepe eerbied soos met enige begrafnis, gaan hulle een vir een by die kerkdeur uit. Iemand het weer teruggegaan in die bank en die gesig met 'n sakdoek bedek. 'n Vrou het begin om gedemp te snik. In die kis het 'n groot spieël gelê. Wie hom oor die dooie gemeente buig, het homself in die spieël gesien.

Teen die aand staan daar 'n ouderling en sewe gemeentelede by ds. Fox op die stoep, daaronder was daar twee vroue en twee jongmense. Die ouderling wat die woord moes doen, het nie te op sy gemak gevoel nie. Hy sê: "Dominee, ons het almal begryp ... ons wil egter nie meer dood wees nie; ons wil 'n lewende gemeente van ons Here Jesus wees. Sal u ons help om dit te wees? En ... e... e... buite staan die res van die gemeente wat ons gestuur het om te kom praat."

[Bron: Die Pelgrim, Maart 1988, p. 20] 

Mandjie Hoop: Psalm 116:7

"Ek moet nou tot rus kom, die Here het goed aan my gedoen:"
Vrees en angs het 'n vreemde manier om in ons harte en lewens in te kruip.
Maar ons moet onsself herinner aan hoe God in die verlede vir ons onderneem het.
Getrouheid is deel van Sy karakter en Hy bly getrou.
So 'keer terug na jou rus', vind weereens jou vrede en veiligheid in Hom.

Gebed: Vader, as ek nadink oor hoe U my gehelp en goed vir my was, kan ek net verheug wees en in U vertrou. Ek sal in U rus en op U vertrou. Amen.

Week van gebed: Braam Grobbelaar van Moreletapark-gemeente

Foto's: Elsa Minne

Braam se motto in die lewe is dat Hy lief is vir die Here en graag in alle nederigheid ‘n verskil wil maak in mense se lewens.

Afkondiging: Bybelstudie

Afkondiging: Bid saam met ons vir ...

 

Nooit alleen nie: Ek sal sterk wees, want ...

* Ek het 'n bron van krag wat altyd genoegsaam is: "Die Here is my lig en my heil, vir wie sal ek vrees?" Ps. 27:1

* Ek is hier op Gods bestelling en in sy bewaring: "Laat jou weg aan die Here oor en vertrou op Hom en Hy sal dit uitvoer." Ps. 37:5

* Ek is hier in die Skool van Christus en sal met 'n gewillige hart luister en leer: "Neem my juk op julle en LEER van my, want Ek is sagmoedig en nederig van hart, en julle sal RUS vind vir julle siele."  

Mat. 11:29 

* Ook my liggaam behoort aan die Here en is vir Hom van groot waarde: "Want julle is duur gekoop. Verheerlik God dan in julle liggaam en in julle gees wat aan God behoort." 1 Kor. 6:20

Die kerk staan by jou ...

Siekte raak nie net ons liggaam nie - dit het ook 'n invloed op ons gees. Ons gees het egter ook 'n invloed op ons liggaam.

Daarom wil die kerk met jou saamleef in tye van siekwees. Ons sal saamwerk en bid vir die versterking van jou gees en die genesing van jou liggaam. 

Mag jy ondervind dat hierdie tyd nie verlore tyd is nie, maar dat dit blywende resultate lewer.

INDIEN JY 'N BEHOEFTE HET AAN HUIS-, HOSPITAAL- 

OF SIEKEBESOEK, SKAKEL ASB DIREK VIR 

DS. ENSLIN BY 079 522 9680.

Seënbede: Mag jy vandag geseën word ...

Mag die pad vriendelik wees onder jou voet
Mag die wind jou altyd stu
Mag die son warm streel op jou gesig
En die reën saggies op jou lande val
En - tot ons weer ontmoet
Mag God jou bewaar in die Palm van Sy Hand …

(Ierse Gebed - vrye vertaling)

GOD SE CV AS LEWENSAFRIGTER EN BESTUURDER - GOD HET BEDANK

1 Samuel 8 & Johannes 8:31-47

Aan wie dit mag aangaan.

Ek, as God, het besluit om te bedank. Die wêreld en kerk het my dalk nie meer nodig nie. Alles is nou gerekenariseer. Vrae word vir die rekenaar gevra en dit gee vir ons al die antwoorde. Dit is vir My as 
Skepper van alles hartseer om My bedanking in te dien.

Ek wil net My CV gee sodat die een wat in My plek aangestel word, weet wat Ek alles gedoen het, dalk kan daardie persoon veranderings aanbring om ‘n beter verhouding te skep.

My CV en werk was soos volg:

Ek het die hemel en aarde gemaak. Ek is die enigste een wat dit nog suksesvol gedoen het. Ek was die eerste bestuurder van die menslike skepping. Eintlik het Ek hulle gemaak. Dus weet Ek hoe die mens se verstand, sy liggaam en sy denke werk. Ek weet die beste hoe om met die mens te werk en hoe verhoudings moet werk.

Dit is so goed om die vervaardiger van enige iets as die persoonlike werktuigkundige te hê.

Ek wil dit uitwys dat my salaris reeds betaal is met die bloed van My Seun Jesus aan die kruis. Dit wat Ek na smag het is dat julle vir My erkenning sal gee dat die prys wat My Seun betaal het, genoeg was vir al die sondes van die mens wat afhanklik is van My.

Die volgende wat Ek wou doen, was om mense se lewens te verander en die seer van mense se lewens te kan herstel. Ek wil graag veranderings doen waar dit nodig is. Ek wil dit graag beklemtoon dat Ek die ontdekker is van onvoorwaardelike liefde.

Ek het gevra dat julle My ten volle sal vertrou en om My werk te doen. Dan sal alles goed afloop en sal daar geen teleurstellings wees, of tyd gemors word nie, maar dit wil vir My voorkom dat julle as Dutoitspan-gemeente en die mense van die wêreld nie meer belangstel in My nie. Mense probeer My met AI en wetenskap uitwerk of Ek regtig bestaan. Dit is vir my ‘n hartverskeurende geleentheid om maar te bedank, want Ek is nie meer nodig nie.

My Naam is God
Adres: Ek is altyd teenwoordig 24/7
Telefoonnr. 777
Toe Ek in die begin My CV gestuur het vir die wêreld, was dit die volgende:

AAN ALMAL WAT MY CV LEES, WIL EK GRAAG DIE VOLGENDE DEEL:
EK HET BELOWE DAT EK MY ALLERBESTE VIR JULLE SAL GEE EN GEHOOP DAT JULLE NOOIT SPYT SOU WEES NIE.

ONDERVINDING:
Ek het tyd gemaak van die begin tot die einde. Ek het al die mag en krag.

MY VORIGE WERK:
Ek het die hemelruim, aarde en die waters van die wêreld gemaak. Ek hou tans die wêreld in stand.

MY OPLEIDING:
Ek ken die volle waarheid, Ek het die volmaakte kennis, Ek is die lig, Ek verstaan alles, Ek is die lewe,
Ek is die weg, Ek is die goeie skaapwagter, Ek is ook die Vader van die heelal.

AS JY MY BETER LEER KEN, DAN SAL JY AL MY KARAKTERTREKKE LEER KEN. 

HIER IS ‘N PAAR VAN MY KARAKTERTREKKE:

Wysheid - Jak 1:5; 3:17-18

Die lig skyn in die duisternis, die duisternis kon dit nie uitdoof nie. (Ps. 11:10, 1Kor 1:30)

Waarheid - Joh 8:32

Julle sal die waarheid ken en die waarheid sal julle vry maak.

Geestelike Geneesheer - 1 Pet 2:24

Hy het self ons sondes in Sy liggaam aan die kruis gedra. Daardeur is ons vir die sonde dood en kan ons lewe in gehoorsaamheid aan die wil van God. Deur Sy wonde is julle genees.

Vergewe, want vergifnis is my belangrikste karaktertrek - 1 Joh1:9

Maar as ons sondes bely, Hy is getrou en regverdig. Hy vergewe ons ons sondes en reinig ons van alle ongeregtigheid.

Voorsiener - Fil 4:19

En my God sal in elke behoefte voorsien volgens Sy wonderbaarlike rykdom in Christus Jesus.

Genade - Ef 1:7-8 – (7). 

Deur die bloed van Sy Seun is ons verlos en is ons oortredinge vergewe kragtens die ryke genade van God, (8). wat Hy in al Sy wysheid en insig so oorvloedig aan ons geskenk het.

Vrede - Is vir My belangrik Rom 14:17

... die koninkryk van God is nie ‘n saak van eet en drink nie, maar van gehoorsaamheid aan God, vrede en vreugde, wat die Heilige Gees ons gee.

Ek is gewillig en gereed om jou lewe oor te neem en wil graag vandag vir jou laat kennis neem van My besluit.

Ek wil graag in jou behoeftes voorsien: In jou verlossing en ewige lewe. Ons kan onmiddelik begin. Ek was beskikbaar 24 uur per dag, sal jou daaglikse vriend wil wees, Ek sal jou berader wil wees en jou leiding gee, krag om staande te bly in die teenstand van al die aanvalle van die vyand. Ek sal jou graag wil transformeer soos Ek is. Ek wil jou lewe beheer en dan sal jy deel van My liggaam word.

SALARIS VERGOEDING
Ek herhaal dat alles reeds betaal is met die bloed van My Seun. Die enigste van belang is dat jy moet in My glo en jou verbind aan My en My vertrou. Aanvaar ook My liefdesverklaring as Ek jou herinner dat jy Myne is Ek het jou gevorm. Ek het baie van julle persoonlik ontmoet wat vir My baie beteken het. Die hartseer is dat baie mense My nie wou ontmoet nie, of na my wou luister nie en My gewoon geïgnoreer het.

DIE POS IS OOP: WIE VAN JULLE GAAN AANSOEK DOEN VIR GOD SE POS?

Daarom is hierdie CV die beste en belangrikste kommunikasie wat ons het om te reageer op die God se bekendstelling, want God sal graag wil hê dat ons Hom moet antwoord op Sy CV. As ons nie gaan reageer nie, sal dit ‘n groot teleurstelling vir God wees. Een daarvan is liefde; een van mentorskap, nie diktatorskap nie.

Die vraag is as ons vandag deel van die paneel is wat weer God se CV sal hanteer, sal jy só iemand aanstel, of sal jy sê die CV is nie goed genoeg nie, of dalk sê: Nee genade, dit lyk vir my na ‘n oorgekwalifiseerde CV.

God het so pas Sy pos bedank! Wil jy aansoek doen vir Sy pos? Sien jy kans om God se pos te hê? Of sal jy uit dankbaarheid vandag sê Here asseblief moenie bedank nie, ek het U nog baie nodig, of dankie Vader dat U my God is wat ‘n nietige mens soos ek liefhet. Dankie dat U ‘n reuse prys betaal het vir my verhouding, ek sal dit met my hele lewe koester en U volg tot aan die einde van my lewe.

Sal ek en jy kwalifiseer vir dit wat God se CV sê? Daar is een uitstaande punt in God se CV wat sê dat die Vader jou ontsettend lief het. Daarom vra die Vader ook vandag vir ons: Praat asseblief met My, Ek smag na jou geselskap. Ek wil graag met jou deel wat op My hart is.

EK TREK MY BEDANKING VANDAG TERUG NET TER WILLE VAN JOU EK SAL DAAR WEES VIR JOU TOTDAT EK JOU KOM HAAL.  

DAAR IS EEN VOORWAARDE VIR DIE TERUGTREK VAN MY BEDANKING: LEEF MY LIEFDE EN GENADE UIT SODAT MY KONINKRYK UITGEBREI KAN WORD.

Afkondiging: Eerste Kwartaalprogram

Afkondiging: Tabita se Bybelbingo & braai

Afkondiging: Dagboek

Oesmaande: Februarie

Flitsgedagte: Liefde

Februarie-verjaardae

Kerkgenotjies: Dit laat 'n mens dink ...

Een van die kerkraadslede het eendag in die middestad van Johannesburg verdwaal. Hy vra toe 'n verbyganger hoe hy by die bepaalde gebou in die stad kan uitkom?

Die man het eers dié kant toe, dan daardie kant toe beduie. Einde ten laaste sê hy: "Meneer, as u soontoe wil gaan, moet u nie eintlik hier begin nie."

oooOOooo

Verkeerskonstabels het ook hulle probleme. Eendag het een 'n man voorgekeer wie se motor in 'n treurige toestand was.

"Noem jy hierdie wrak 'n motor?" snou hy die bestuurder vies toe.

"Nooit," antwoord die man, "anders sou ek vir my al lankal 'n rybewys probeer kry het."

oooOOooo

In die ver afgeleë dele van die Noord-Kaap gebeur daar selde iets. Tot op 'n dag ...

Vrou: "Ou man, kom gou. 'n Man het nou net uit 'n vliegtuig geval en toe deur die skoorsteen tot in die eetkamer."

Man: "Dek maar nog 'n plek. Snaaks wat mense nie alles sal doen om ons gasvryheid te misbruik nie." 

Afkondiging: Welkom by die erediens

Oorwinningslied

Ek sien in my gees die glorie
En die almag van die Heer
Die Allerhoogste wat in liefde
Oor sy Koninkryk regeer
Hy’t belowe aan die einde
Op die wolke kom Hy weer
Hy’s Koning Hy regeer

Loof Hom, prys Hom, halleluja (3x)
Hy’s Koning Hy regeer

Die Here is ons vesting
Wat vir altyd sal bly staan
Hy beskerm elke mens
Wat in geloof na Hom toe gaan
Hy’s ons skuiling, Hy’s ons wapen,
Hy’t die vyand reeds verslaan
Hy’s die rots wat ewig staan

Loof Hom, prys Hom, halleluja (3x)
Hy’s die rots wat ewig staan

Kom deel nou in ons loflied
Hef jou hande op na bo
Blaas basuine, slaan op dromme
En kom dans voor God se oë
Kom leef in die oorwinning
Van sy Woord waarin ons glo
want sy Woord sal ewig staan

Loof Hom, prys Hom, halleluja (3x)
Sy Woord sal ewig staan

[Bron: Klik HIER]

Gedagte uit 'n koevert: Bruikbaar

Mense bid dikwels dat God hulle moet gebruik, maar Hy kan nie. Hulle is nie aan Hom oorgegee nie. Hulle stoflike belange, hul eer en posisie staan in die pad.

[Anoniem] 

Verjaardagwense

Dink hieroor: Soos jy saai - sal jy maai

Dit is raar maar waar,

Diegene van wie jy nie hou nie,

vind jou ook naar.

Die rede hiervoor is duister.

Nogmaals besef jy dat wanneer jy suur is

en die lewe jou teister

Is vriende skaars en moeilik te vinde.

Wanneer jy kwaad is en vir almal kwel

wens hulle jy bly stil en gaan na die h*l.

Maar as jy glimlag en 'n ander deuntjie sing

Vergader vriende vir die geluk wat jy hul bring

Dit is dus raar maar waar

Diegene van wie jy hou, hou ook van jou!

[Dankie, Janeanne)

Mossiestilte: 1 Kor. 15:10a

Maar deur die genade van God is ek wat ek is, en sy genade aan my was nie tervergeefs nie, maar ek het oorvloediger gearbei as hulle almal nogtans nie ek nie, maar met die genade van God wat met my is.

Die Here wil jou 'n prys gee oor jou oorvloedige werk ... werk uit die geloof en nie om aansienliker ander vooruit te gaan in goeie werke nie, maar om mekaar te dien en te ondersteun. God gee jou sy genade om aan te hou en voluit vorentoe te gaan in sy werk vir die ewigheid. Jy is wat jy is deur die genade en beplanning van God, oor wie en hoe jy moet wees.

Dankie, Here, dat U my geskep het soos ek is. Ek is geskep om U Naam te verheerlik en u evangelie uit te brei. Ek verheug my daarin dat ek die werk kan doen ten spyte van kritiek en vyandigheid. Ek doen dit nie om eendag 'n prys te kry nie, maar net om in u heerlike teenwoordigheid te mag voortleef. U is die Seun van God en waarheen sal ons anders gaan, as om in u lieflike en aangename heerlikheid te bly. Amen.

[Aangestuur deur Pieter Swanepoel]

Mandjie Hoop: Soms ...

Soms … moet jy ‘n kans waag.

Soms … moet jy na jou hart luister.
Soms … moet jy na jou kop luister.
Soms … moet jy nie dink nie en net dóén.
Soms … moet jy terugstaan.
Soms … moet jy laat los.
Soms … moet jy aanvaar.
Soms … maak dit seer.
Soms … maak dit gelukkig.
Soms … moet jy jouself op die skouer klop.
Soms … moet jy besef jy’s verkeerd.
Soms … moet jy net vertrou.
Soms … moet jy net lewe.
Altyd … moet jy die beste maak met wat jy het.

Aan die veilige kant?

"Wat glo jy?" wou iemand eendag van 'n Ier weet.

"Wat die kerk glo," het hy geantwoord.

"En wat glo die kerk?" het die ondervraer voortgegaan.

"Wat ek glo," was sy antwoord,

"En wat is dit wat julle albei glo?"

"Dieselfde ding,," het hy weer ontwykend geantwoord.

Dalk is ons, net soos die Ier, besig om in een of ander kerk vir God weg te kruip. Ons is nie bereid om die werklikheid van ons ewige bestemming in die gesig te kyk en dit in 'n ernstige lig te beskou nie. Ons is nie gewillig om ons hart en lewe aan Christus oor te gee en Hom onvoorwaardelik te volg en te dien nie; maar ons het 'n lidmaat van die kerk geword en gemeen om daardeur aan die veilige kant te wees.

Maar is dit werklik veilig?

Seënbede: Mag jy vandag geseën word ...

"En laat die lieflikheid van die HERE onse God oor ons wees,

en bevestig die werk van ons hande oor ons, 

ja, die werk van ons hande, bevestig dit!"
Ps 90:17

Oesmaande: Januarie

Tyd vir gebed

Mense kry vandag al hoe minder tyd vir gebed.

Daar is tyd vir enige ander ding:

tyd om te eet,

tyd om te slaap,

tyd om na die radio te luister,

tyd om TV te kyk,

tyd om die koerant te lees,

tyd om op FB rond te kuier ...

maar geen tyd vir gebed nie!

Susanna Wesley*, ten spyte van die feit dat sy negentien kinders grootgemaak het, het nogtans tyd gevind om haarself elke dag vir 'n volle uur in haar kamer toe te sluit, alleen met God.

Dit is nie sodanig 'n kwessie van tyd vind nie, maar van tyd maak!

En ons kan tyd maak as ons wil.

[Oswald Smith] 

* Lees HIER oor Susanna Wesley se gebedsnalatenskap en die invloed wat haar man en twee bekende seuns, John and Charles Wesley, op die Christelike geloof gelaat het.

Afkondiging: Bid saam met ons vir ...

Mossieboodskap: Nog net drie minute ...

Die breinspoeling was al weke lank aan die gang, soms tot 14 uur per dag - 48 uur aaneen by een geleentheid. Maar hy het sy man gestaan. Hy wou nie swig nie.

Die plek: 'n Kommunistiese gevangenis in China. 

Die tyd: in die vroeë vyftigerjare. 

En die man: 'n Stralende Chinese Christen.  

Uiteindelik, na herhaalde gekruisvra, bespotting en marteling, sê die Christen aan sy verdrukkers: "Julle mors julle tyd, Menere. My geloof is dieper gewortel as enige marteling waaraan julle my kan onderwerp. Dit is vir ewig gewortel in Jesus Christus, die Seun van God."

Woedend klap die indoktrineerder hom deur die gesig en skreeu: "Val op jou knieë en bid! Want oor drie minute gaan ons 'n koeël deur jou kop jaag."

Terwyl die indoktrineerder, 'n gewapende wag en vyftien van die man se medegevangenes staan en kyk, maak hy soos hy beveel is.

"Here," begin die man bid, "ek dank u vir die vrede wat daar in my hart is. Ek dank u vir die geloof wat dit vir my moontlik maak om te glo dat, ten spyte van my verdrukkers, my hemelse Vader op sy troon sit en in staat is om enige oomblik die monde van hulle wat Sy Naam laster, vir ewig te stop. Here, u is in staat om hierdie oomblik U mag aan hierdie twee manne te bewys. U is in staat om te toon dat U God is. U mag kan hierdie manne in een oomblik laat dood neerval, en ..."

Maar hy het nie aan die einde van sy gebed gekom nie, want, hygend van pyn, het die twee manne gelyktydig op die grond neergeval. Binne 'n paar uur was albei dood.

Die Christen is daarna vrygelaat, en na wat verneem word, is hy toegelaat om by sy vrou en kinders aan te sluit en ongehinderd in sy huis te woon. Geen nie-Christen het dit naby sy huis gewaag nie.

* Eerw. Leslie Millen, lank 'n CIM-sendeling in China, was 'n ooggetuie van bostaande gebeurtenis tydens sy eie gevangenskap deur die kommuniste.   

Lees HIER van David Lin se ervarings agter tralies.

[Oorgeneem uit: Die Kruisgesant - Die Spoorwegbode, Februarie 1986]

Afkondiging: Eerste Kwartaalprogram

Flitsgedagte: Jesus is ...

Kerkgenotjies: The trail

During a trial in a Baltimore courthouse, the prosecutor calls his first witness - an elderly woman named Mrs. Rabinowitz. He approaches her with confidence and begins the questioning:

“Mrs. Rabinowitz, do you know me?”

She adjusts her glasses, looks him straight in the eye and says:

“Of course I know you. I’ve known you since you were a little boy, and to be honest, I’m deeply disappointed in you. You lie, you cheat on your wife, you manipulate people, and gossip behind everyone’s back. You walk around acting like some big shot, but the truth is ... you’re just a small-minded bureaucrat who never figured that out.”

The courtroom erupts in whispering.

The prosecutor freezes, completely stunned.

Desperate to shift attention, he points across the room.

“Mrs. Rabinowitz ... do you know the defense attorney?”

She nods.

“Oh, I know him too. He’s lazy, impatient, and he has a drinking problem. He can’t hold together a single healthy relationship. His law practice is one of the worst in the city. And let’s not even mention the fact that he cheated on his wife with three different women ... one of whom is your wife, by the way. So yes, I know him.”

The defense attorney turns pale.

The judge, barely holding himself together, bangs his gavel.

He calls both lawyers to the bench and whispers through clenched teeth:

“Listen carefully. If either one of you idiots asks her whether she knows me, I swear I’ll have you both out chopping wood by sunset.”

Verjaardagwense