Mossiestilte: Jes. 40:31

maar die wat op die Here wag kry nuwe krag; hulle vaar op met vleuels soos die arende; hulle hardloop en word nie moeg nie, hulle wandel en word nie mat nie.

Wanneer dit vir jou voel jy kan nou nie meer vorentoe nie. As alles wat jy aanpak net nie wil uitwerk nie. As alles wat nog altyd gewerk het, nie meer in plek val nie en moedeloosheid jou wil oorval; as jy ouer word en jou liggaam wil nie meer by die denke en gedagtes byhou nie; gaan sit stil by by die voete van Jesus. Keer terug soos die verlore seun na jou Vader. Hy wil jou vandag weer met nuwe klere bedek (jou 'n nuwe identiteit gee), 'n identiteit wat van Hom afkom; geklee met God se genade en barmhartigheid.  

God wil jou nuwe krag gee soos toe jy jonk was, sodat jy nie moeg of mat sal raak, as jy jou Skepper vereer met jou werke van geloof. 

Jy sal soos 'n arend sweef oor jou uitdagings en probleme. 

Dankie, Here, dat as ek moedeloos word, versterk U my. Ek sal kan aanhou en deurbreek deur u krag. Moegheid sal my nie terughou nie maar ek sal my doelwitte kan bereik omdat U met my is. Ek sal aanhou wandel op die weg wat U vir my voorberei het, en in oorwinning sal ek sweef oor my vyand en die uitdagings en hindernisse, want U versterk my met krag en wysheid. Ook vanoggend word ek weer gesalf met U vars vreugde-olie. Aan U Here, kom toe al die eer, aanbidding en lof. Amen.

[Aangestuur deur Pieter Swanepoel]

Kerkgenotjies: Die manlike spesie ...

* Manlief neem private vlieglesse en vroulief staan erg bekommerd en kyk na sy vierde onsuksesvolle landingspoging.

"Toe maar," troos die instrukteur, "ons kan hom altyd afskiet, mevrou."

* Die seuntjie vra aan sy vader, wat 'n bles begin kry: "Pa, hoe lyk dit dan of Pa langer word?"

"Hoe so?"

"Pa se kop begin dan bokant Pa se hare uitsteek."

*Twee vriende, intussen getroud, ontmoet mekaar ná jare.

"Ja, sug die een toe hulle 'n ruk gesels het, "my vrou kry altyd die laaste woord in."

"Myne nie."

"Hoe so?"

"Ek sê altyd ná 'n rusie: 'Ek is jammer, liefling.'" 

Genade, onbeskryflik groot

1. Genade, onbeskryflik, groothet U aan my bewys:
verlore seun - 'n wegloopkind -
weer in die Vaderhuis.

2. Ek is die naam van kind nie werd -
wou self my sake reël.
My lewe, kanse, tyd en geld
is nutteloos verspeel.

3. Maar U sien ver, oneindig ver.
U sien my honger, dors.
Nog voordat ek kon skuld bely,
druk U my aan die bors.

4. Genade, onbeskryflik groot -
daar's fees, ek is weer tuis.
U Seun bring my - verlore mens -
weer in die Vaderhuis.

Lied 510
NG Kerk Uitgewers

Afkondiging: Erediens

Dink hieroor: Moed is ...

die kennis hoe om te vrees
wat gevrees moet word
en hoe om nie te vrees
wat nie gevrees moet word nie.

David Ben-Gurion (1886 – 1973)

Mossiestilte: 2 Kron. 27:6

En Jotam (koning van Juda) het magtig geword, want hy het sy weë gerig voor die aangesig van die Here sy God. 

En die volk het nog verderflik gehandel. vers 2c.

Ten spyte van jou geloof en dade voor God, sal nie almal God dien nie. 

God sal jou egter seën, want jy erken Hom as jou God en jy dien Hom.

Dankie Here, vir u seëninge oor my. Ek erken U as my God. Jesus, Seun en Lam van God, U alleen is koning oor my lewe. Amen.

[Aangestuur deur Pieter Swanepoel]

'n Gedig vir Woensdag: Vir 'n pepermossie

Voortaan sal ek winterskemer
Vleilangs loop
En droë takkies

van geraamte struike stroop

Die wilgers sal gekruisig
Aan die hemel hang
En ek sal, dood menslik
Na jou terug verlang

Soos na die somer se rinkink
Van vinke in palmiete
En die onbeholpe liefde
Van wildeganse tussen riete

Voortaan sal ek winterskemer
Vleilangs loop
En droë takkies

van geraamte struike stroop

-Willie van der Merwe-

[Dankie, Liz, vir die aanstuur van vreugde. Klik HIER vir die gedig.] 

Mandjie Hoop: Hoe meer ...

Hoe meer jy gee
hoe meer kry jy.
Hoe meer jy lag,
hoe minder huil jy.
Hoe meer jy deel,
hoe meer bly oor.
Hoe meer jy liefhet,
hoe meer sal jy ervaar.
Want net wat ons weggee,
verryk ons, oud en jonk.
Medelydende Vader,
help my om selfsug opsy te skuif 

en meer soos U te word.
Heer, ek het U elke dag nodig!

Afkondiging: Selgroep

Doopsondag: Die doop is 'n genadeverbond

Ons as gemeente het Sondagoggend, 24 Augustus 2025, gedeel in die genade en vreugde om God se Woord te kon hoor en die doop van Azalia Natal te kon beleef wat deur ds. Ensie Enslin waargeneem is.

Die doop is die teken wat ons sekerheid gee van God se verbond van genade met ons en Jes 43:1 is as tekvers gegee: "MAAR nou, so sê die Here, jou Skepper, o Jakob, en jou Formeerder, o Israel: Wees nie bevrees nie, want Ek het jou verlos; Ek het jou by jou naam geroep; jy is myne!"

Leef dan in die genadeverbond deur die Heilige Gees met hierdie sekerheid onder alle omstandighede.

Gebed: Gebed veroorsaak 'n beroering

ELKE keer wanneer ons BID,
is daar ‘n BEROERING in die HEMELE en op AARDE.
Elke GEBED wat ons BID,
sneller ‘n Goddelike REAKSIE in die GEES.
Die ALLERHOOGSTE GOD mis nie een gebed nie.
Elke gebed wat ons BID,
het bonatuurlike MOMENTUM en KRAG.
Gebed verander nie net OMSTANDIGHEDE vir ons nie.
Dit verander ook ONS vir die omstandighede.
Soms bid ons vir die BERG om te skuif …
maar dikwels skuif die HERE ons.
Soms gee die HERE nie vir ons wat ons gevra het nie,
want Hy het iets BETERS in gedagte.
Solank ons net glo en verstaan:
HY weet altyd die BESTE vir ons.
Daarom het HY die LAASTE SÊ!
GEBED is altyd ‘n teken
van ons KINDERLIKE geloof in die Lewende GOD.
Dankie VADER dat U altyd na ons GEBEDE LUISTER!
Amen.

Afkondiging: 2026-kerkkalender se advertensieruimte

Afkondiging: Dagboek

Afkondiging: Kwartaalprogram

Mossiestilte: Heb. 1:9

U het geregtigheid liefgehad en ongeregtigheid gehaat; daarom het, o God, u God U gesalf met vreugde-olie bo u metgeselle;

Hier moet biejie dieper gekyk word, of ons verloor die draad; "o God, u God U gesalf ..."

Een van die aannames wat veral die Moslems deurmekaar maak en kwaadwillig laat stry met Christene deur te sê: Jesus is nie God nie. 

Daar is net een God - maar drie-enig; Jesus is God, die Seun van God en die God die Vader, Vader van Jesus, sy Woord; Die Heilige Gees is God se Gees teenwoordig in ons harte. 

Selfs Dawid het dit gesien en gesê: My God het vir my God gesê ...

God wil jou ook met sy vars vreugde-olie salf vanoggend. 

Dankie, my Vader, dat U my vanoggend salf met u vars vreugde-olie. Ek is bly in die Heilige Gees. In my hart sal ek sing, om hulde te bring aan die Naam van Jesus my Heer. Amen. 

Lees gerus ook vers 8, en sien dit nou in die lig met die kennis wat jy nou besit. 

[Aangestuur deur Pieter Swanepoel]

Kerkgenotjies: Allerlei

* 'n Ou het 'n bietjie te diep in die bottel gekyk voordat hy op sy donkie huis toe gery het. Dit was nogal 'n gebeurlike rit want die twee het mekaar in die omstandighede nie goed verstaan nie.

Die donkie het in 'n stadium vir iets geskrik en wild aan die spring gegaan. Só erg het hy geskop en gespring dat een van sy agterpote in 'n stiebeuel vasgevang is.

Toe die hoenderkopruiter sien wat aangaan, sê hy: "Wag 'n bietjie ... as jy opklim, gaan ek nou dadelik afklim."  

* Koos en Charlie was saam in die Tweede Wêreldoorlog. Ná die oorlog het Charlie Australië toe getrek en Koos is terug Suid-Afrika toe. Maar Koos het Charlie gemis en mettertyd in die gewoonte gekom om elke middag ná werk twee drankies in die kroeg te bestel: een vir hom en een vir Charlie, waarop hy dan al twee gedrink het.

Eendag stap hy weer in. Hy lyk bietjie vaal. 'n Stilte daal oor die aanwesiges toe hy net een drankie bestel. Almal wil dadelik weet of Charlie dan nie meer daar is nie.

"So erg is dit darem nie," sê hy. "Ek het besluit om op te hou drink."

* 'n Suid-Afrikaner gaan besoek 'n fortuinverteller in Parys, nie Frankryk nie.

"Jy sal arm en ongelukkig wees tot jy veertig is," sê die fortuinverteller.

"Ja en dan?" vra Koos gretig.

"Daarna sal jy gewoond wees daaraan," kom die antwoord.

Kontraste

Winter en lente (soos somer en herfs) is albei deel van een proses. Nes 'n mens gee en ontvang nie van mekaar kan skei nie, kan 'n mens ook nie een seisoen sonder die ander ervaar nie. As mense kan ons baie uit die tydlose wysheid van die natuur leer en in ons eie lewens toepas.

Die koue van die winter maak dat alles stadiger word en selfs in 'n winterslaap insluimer. En soms sterf goed ook af. Ek sien hierdie as 'n tyd om te rus en om na te dink oor waar jy jou in jou lewe bevind. Dit skep vir jou 'n geleentheid om te besluit wat vir jou in jou lewe belangrik is, en wat nie. En om dan stappe te neem om ontslae te raak van alles wat nie meer 'n positiewe rol in jou lewe speel nie. Kyk mooi na elke area van jou lewe: jou huis en besittings, jou werk, vriende, familie en ander verhoudings, kyk ook na jou emosies. En besluit dan wat jy wil hou, wat jy wil verander en wat jy van ontslae wil raak.

So sal jy jouself voorberei vir die nuwe lewe wat lente bring. Jyself gaan verjong en heel voel, reg om 'n nuwe seisoen in jou lewe te skep. Jy kan dit inkleur met al jou hartsbegeertes, soos 'n tuin in volle bloei.

Nes in die natuur, groei ons as mense in sarsies. Daar is tye van groei, tye om te voed, tye van bloei en tye van rus in elke lewe, joune ook.

Die kontraste tussen winter en lente herinner ons dat hierdie ook sal verbygaan. Ons word bewus van en dankbaar vir alles wat ons het. Dit gee ons ook die geleentheid om die mooi in die lewe weer raak te sien, al is dit soms vaal en grys.

In die lewe is daar seisoene. Soos die son soggens opkom en die sterre saans skyn, kan jy verskillende seisoene in jou lewe verwag. Jy kan óf daarteen baklei óf dit aanvaar en die beste maak van die omstandighede wat oor jou pad kom. Die keuse is joune!

Kies DIT wat jou gelukkig maak, DIT wat niemand skade aandoen nie, JY inkluis. En wanneer jy twyfel, kyk na die tydlose wysheid van die natuur vir antwoorde.

[Prince Albert Vriend, Oktober 2017, bl.9: Maruschka Erasmus - 'n NLP-lewensafrigter, EFT-praktisyn en 'n geregistreerde berader.]  

Afkondiging: Erediens

Dink hieroor: Jou denke beïnvloed jou geluk

Wat jy het,

wie jy is,

wat jy doen,

maak jou nie gelukkig 

of ongelukkig nie.

Wat saak maak,

is dit waaroor jy dink.

[Dale Carnegie]  

'n Moderne weergawe van Psalm 23 vir elkeen in die werkplek

PSALM 23 (AANGEPAS)

Die Here is my eintlike baas ek kom niks kort nie.
Hy maak my rustig, al is daar chaos rondom my.
Hy bring my by waters waar daar vrede is,

al woed die kantoorpolitiek rondom my.
Hy gee my telkens nuwe krag

wanneer die werklas en die verantwoordelikhede my wil oorweldig.

Wanneer die gevaarlike weë van korrupsie vir my wink,

lei Hy my tot sy eer op die regte pad.
Selfs al gaan ek deur die donker dieptes van

ontelbare e-posse, rekenaars en netwerke wat "oppak,"
die rugstekery van kollegas, bestuurders, begrotings en
'n moeë liggaam wat ek soggens uit die bed moet sleep,
sal ek nie bang wees nie, want U is met my.

In u hande is ek veilig.
U laat my by die feesmaal van u liefde aansit,
selfs al dreig die regering met verdere "regstellende aksie"
of al is daar praatjies van afskaling en afdankings in die maatskappy waarvoor ek werk.
U ontvang my soos 'n eregas
selfs al word ek telkens deur my bestuurders oor die hoof gesien.

Ek word oorlaai met u hartlikheid
al ontvang ek weinig erkenning vir my harde werk.
U goedheid en liefde is vir my meer werd,
as enige bonustjek, want dit sal my lewe lank by my bly.

Al is my mediese voordele en my pensioen maar skraps,
sal ek tot in lengte van dae by U tuis wees,
in die Ewige Aftree-oord wat U vir my beloof!

(Geleen HIER. Skrywer van aangepaste Psalm 23: Onbekend.)

* Lees Psalm 23 HIER

Afkondiging: Selgroep

Mandjie Hoop: Ek is God se kind ...

Ek glo nie net in Jesus nie,

maar - 

ek aanbid Hom

ek vertrou Hom

ek is lief vir Hom

Ek volg Hom 

Ek preek Hom

Ek deel Hom

Ek dien Hom

Ek is God se kind!

Verjaardagwense

Suzanne, baie geluk met jou verjaardag. 'n Nuwe lewensjaar gevul met alles wat mooi is word jou toegewens. Geniet die spesiale dag! 

Afkondiging: Bid saam met ons vir ...

Gebed: Aan die begin van 'n nuwe dag.

Here, vanoggend is ons dankbaar dat U 'n nuwe dag aan ons lewens toegevoeg het. Dankie dat ons weet dat U reeds voor ons uit loop. Dankie dat U ons Saligmaker en Verlosser is. Ons kom vanoggend opnuut en gee weer ons hele lewe, al ons kommer, probleme, hartseer, ongelukkigheid in U hande oor! Here, ons sal op U vertrou vir ons rus en vrede. In Jesus se wonderlike Naam alleen. Amen

Mossiestilte: Jak. 2:10

Want wie die hele wet onderhou, maar in een opsig struikel, het aan almal skuldig geword.

Baie mense sê: As ek maar net van hierdie een sonde in my lewe ontslae kan raak, sal dit goed gaan met my en sal ek 'n beter mens wees en sal God en mens en ekself, my beter aansien. Dit is 'n beginsel van eie werke; geen een van jou werke kan jou regverdig nie.

Net die bloed van Christus kan jou regverdig. 

Kan jy jouself laat gebore word; net so is dit Christus wat jou wederbaar. 

As jy op jou verkeerde werke (sondes) konsentreer, word dit net al hoe groter.

As jy op die Verlosser konsentreer, word Hy al hoe groter en neem Hy jou sondes weg en maak jou vry van sonde.

Here, ek weet ek kan nie die wette onderhou nie. Ek weet U is die wet. U het vir my sondes aan die kruishout betaal. Nou konsentreer ek op U my Verlosser van al my sondes en my sondes word vernietig. Ek het die oorwinning oor my sondes gekry deur my geloof in Christus. Ek word daagliks verander om soos Christus te wees. Dankie vir U vergifnis in Jesus Naam. Dankie vir u bloed wat my gereinig rny geheilig het. Amen.

[Aangestuur deur Pieter Swanepoel]

Kerkgenotjies: Werksontevredenheid en andere

* Werknemer: "Meneer, ek loop die einde van die maand."

Werkgewer: "Hoe het jy geweet?"

* "Jimmie, jy is afgedank," sê die baas.

"Maar ek het niks gedoen nie," protesteer Jimmie.

"Presies!" bulder die baas.   

* Wat noem jy 'n boemerang wat nie werk nie?

'n Stok

* Wat is die eerste bus wat oor die Atlantiese Oseaan gevaar het?

Columbus

* Wat leer ons by Dawid en Goliat?

Om te koes vir klippe. 

Vrouefees: Is jou vorm in? Vandag is die laaste dag!

Ring van Kenhardt 

VROUEFEES:

Wanneer: 29-30 Augustus 2025
Waar: NG Kerk Keimoes

PERSOONLIKE INLIGTING

Naam en Van: _________________________

Kontaknommer: ____________________

Adres: _______________________________

e-pos: _______________________________

Gemeente: ___________________________

Enige siektetoestand waarvan organiseerders bewus moet wees?

_____________________________________

INSKRYWINGSFOOI: R650

Ingesluit: alle etes en aktiwiteite tydens fees.
Ontbyt = Koffie en beskuit, ligte middagete, aandetes.

 RSVP: 15 Augustus 2025

e-pos asseblief die voltooide inskrywingsvorm en bewys van betaling na  ngkerkkanoneiland@vodamail.co.za

Vir navrae: whatsapp Anneléne: 082 755 2271 (Ma-Do: 8:00-13:00)

Bankbesonderhede:    

NG Kerk Kanoneiland
FNB - Upington
Takkode: 230604
Tjekrek: 631 608 22 186
Verwysing: VF + naam & van

Verblyf en Vervoer:

NB: Feesgangers is verantwoordelik vir hul eie verblyf en vervoer. Spesiale akkommodasietariewe vir feesgangers te:

Ikaia River Lodge: 082 331 1353

Ou Skool Gastehuis: 084 431 7844

INSKRYWINGSVORMS BY DIE KERKKANTOOR BESKIKBAAR!

Sien jou daar !

JY KAN … MAAR JY MOENIE

(Veral vir mense bo 65!)

Jy kan op ’n hoë, wankelrige leer klim … maar jy moenie.

Jy kan ’n storie begin met “In MY dae” … maar jy moenie.

Jy kan (modieuse) geskeurde jeans dra … maar jy moenie.

Jy kan op jou hurke sit en vinnig opstaan … maar jy moenie.

Jy kan loshande op die huis se dak rondloop … maar jy moenie.

Jy kan oor ’n redelike groot plas water spring … maar jy moenie.

Jy kan jou 3-jarige kleinkind probeer inhardloop … maar jy moenie.

Jy kan jou broek sommer so in die loop aantrek … maar jy moenie.

Jy kan ’n styfpassende help-my-beter-lyk-T-hemp dra … maar jy moenie.

Jy kan met jou hande in jou sakke by ’n trap afhardloop … maar jy moenie.

Jy kan by die badkamer in die winkelsentrum verbyloop … maar jy moenie.

Jy kan die week se kruideniersware op een slag uit die kar dra … maar jy moenie.

Jy kan probeer om die spyskaart te lees sonder jou leesbril … maar jy moenie.

Jy kan kliphard kommentaar lewer op mense se voorkoms … maar jy moenie.

Jy kan altyd die hele rekening betaal as die familie gaan uiteet … maar jy moenie.

Afkondiging: Erediens

 

Kindervreugde: Ondersteun die Santa Shoeboksprojek

Dink daaroor: Jy het drie keuses ...

Jy het een van drie keuses

wanneer iets slegs met jou gebeur:

* Jy kan toelaat dat dit jou vernietig

of

* dit kan  jou nuwe realiteit word

of 

* dit kan jou sterker maak. 

Projek Resthaven

Wat 'n vreugdevolle dag was dit nie vandag by Resthaven nie. 'n Splinternuwe broodnodige rolstoel is vandag daar afgelewer. Aan stuur van die projek is Rina Groenewald saam met haar regterhand, Pula.

Nico Broodryk en Bea Benson was saam om met die inwoners te praat en ook om te kyk waar die nood druk.

Op die foto verskyn die kombuispersoneel, saam met Pula Leburu, links.

Kontak gerus vir Rina indien jy by die volgende projek van Resthaven betrokke wil raak.

Mag ons vandag onthou dat ons sy hande en voete moet wees vir mekaar deur gehoorsaam te wees. Dis met jou oë waardeur Hy met deernis na hierdie wêreld kyk.

Bybel in Kaaps: Psalm 23

’n Psalm van Dawid

1 Die Jirre is my herder, niks sal my ontbreekie.
2 Hy laat my neerlê in groen weivelde,
daa waa die waters rustig is, lei hy my heen,
3 hy gie my siel nuwe krag.
Hy lei my oppie regte paaie,
tot die eer van sy Naam.
4 Selfs al loep ek deurie donkeste paaie
sal ekkie bang wiesie,
wan U is met my;
U stok en U staf,
hulle vetroos my.
5 U het ’n tafel gedek vi my
tewyl my vyande kyk.
U het my kop gebedek met olie;
my bieke loep oor.
6 U goedheid en U liefde sal my volg
allie dae van my liewe,
en ek sal innie huis van Jirre loep
tot in lengte van dae.

[Geleen by LitNet. Klik HIER]

Psalm 23 - beryming

1. Net soos 'n herder uittrek met sy skape
en hul laat neerlê in die veld van milde groen,
met sagte hand hul lei langs stille waters -
so is die HEER, so het Hy ook aan my gedoen:
Hy laaf my siel en lei my swakke skrede
in vaste spoor van sy geregtighede.

2. En is ek soos 'n skaap in doodsgevare,
wat in die velde as 'n prooi vn wolwe gaan,
en moet ek in die doodsdal, diep n donker,
van alle hulp ontbloot, in my alleenheid staan -
dan nog ken ek geen doodsvrees of verskrikking
omdat u staf my troos is en verkwikking.

3. U bring vir my die tafel in gereedheid,
my hoof druip olie en my beker vloei van wyn,
'n bron van goedheid stroom vir my gedurig;
dit is my gees 'n vreug, my vyande 'n pyn;
dit kroon my lewe met u welbehae;
en in u huis, daar bly ek al my dae.

Afkondiging: Selgroep

Verjaardagwense

Jan, baie geluk met die herdenking van jou geboortedag. Mag die nuwe lewensjaar gevul wees met alles wat mooi en goed is. Geniet die spesiale dag.

Mandjie Hoop: Bekeringsoomblik

Toegang tot die hemel
is nie in die uur van ons dood nie,

maar die oomblik van ons bekering.

- Benjamin Whichcote (1609 – 1683) -

Afkondiging: Bid saam met ons vir ...

Gebed: U is groot

My God ek juig. 

Ek is ‘n oorwinnaar 

deur U wat my red, 

my krag gee, 

my lei en wysheid gee. 

In u voetstappe volg ek, 

my oë gerig op U.
Ek loof en prys U, Here.
Dankie vir u genade onbeskryflik groot.
Ek is vry, ek is verlos, ek is gered.
My geloof red my elke dag.
Ek neem dit, 

ek leef dit 

en ek glo dit.
Ek is vry deur Jesus se bloed.
Ek is verlos deur Sy genade.
Ek is gered in die MAGTIGE NAAM VAN JESUS CHRISTUS. 

Heilig. Heilig. Heilig is die Here, grote God.
In Jesusnaam.
AMEN

Afkondiging: Dagboek

Afkondiging: Kwartaalprogram

Afkondiging: SMS-besonderhede

Mossiestilte: Gal. 6:7-10

Moenie dwaal nie; God laat Hom nie bespot nie; want net wat die mens saai, sal hy ook maai.

Hy wat in die vlees saai, sal uit die vlees verderf  maai; maar Hy wat in die Gees saai sal ook uit die Gees die ewige lewe maai

en laat ons nie ophou om goed te doe nie, want op die regte tyd sal ons maai as ons nie verslap nie.

Die wet van saad saai, is 'n werklikheid - swak saad, of bossiesaad wat bossies oplewer; goeie saad sal gesonde eetbare voedsel oplewer.

Die woord sê: vir wat jy aan ander gedoen het,  het, het jy dit aan My ook gedoen; die goed of die sleg. 

Daarom sal jy die goed of die sleg eet wanneer jy moet maai.

Here, ek weet ek kan nie deur my beste werke die saligheid ontvang nie. Ek kan net deur Christus se kruisdood ewige voedsel kry. Net Christus kan ons red en u brood is ons ewige voedsel, en net u bloed is ons ewige drank, tot verlossing van al ons sonde. Amen.

[Aangestuur deur Pieter Swanepoel]

Statistiek: Dankie vir 266 000 e-besoeke

So op Vrouedag steek ons die 266 000-kerf oor! 

Gelukkige Vrouedag en -maand

Nasionale Vrouedag word elke jaar op 9 Augustus gevier en dan val die kollig op die vroue wat daagliks met moed, krag en deursettingsvermoë hul bydrae tot die huishouding, gemeenskap en land moet lewer.

Vroue is kosbaar, veerkragtig en onmeetlik waardevol. Hulle beskik oor die vermoë om oor hoë hekkies in moeilike tye te kom. Vrouedag is ’n geleentheid om nie net na die verlede te kyk nie, maar ook om na die toekoms, want vroue beskik oor die vermoë om 'n verskil in die wêreld te maak. 

Mag hierdie dag gevul wees met liefde, vreugde en waardering vir alles wat jy is en wat jy doen.

Kerkgenotjies: Ander lande

* Een van die gemeentelede wil graag Australië toe emigreer.

Hy gaan kry al die vorms by die ambassade. Voor die klerk dit vir hom gee, vra hy eers: "Was u al ooit skuldig aan enige misdrywe?"

"Nee," antwoord die gemeentelid, "maar is dit steeds 'n aanbeveling?"

* Eendag kom 'n Amerikaner in Suid-Afrika vakansie hou. Terwyl hy in die supermark inkopies doen, sien hy groenmielies.

"Wat is dit dié?" vra die Amerikaner.

"Dis mielies, vars uit die Vrystaat," antwoord die winkelassistent.

"O, in Amerika is die mielies seker drie keer so groot."

Hy kom by die tamaties, bloedrooi en so groot soos tennisballe. "Watse goed is dit dié?" vra hy.

"Dis tamaties," antwoord die winkelassistent.

"O, in Amerika is ons tamties so groot soos sokkerballe."

Die winkelassistent raak toe lekker dik vir hierdie arrogante Amerikaner.

By die waatlemoene vra die Amerikaner weer: "Wat's dit dié?"

"Dis ons druiwe," antwoord die winkelassistent. 

Maklik vs. Moeilik

Waarom is dit so moeilik om die waarheid te praat 

en tog so maklik om 'n leuen te vertel?
Waarom word ons so vaak in die kerk,

maar skielik nugter wakker onmiddellik na die preek verby is?
Waarom is dit so moeilik om oor God te praat,

terwyl dit maklik is om oor lelike dinge te praat?
Waarom is dit so vervelig om in 'n Christelike tydskrif te lees, 

maar soveel makliker om in 'n smerige een te kyk?
Waarom word 'n e-pos met 'n godvresende strekking so maklik uitgewis, 

terwyl ons al die smeriges aanstuur?
Waarom word die kerke al hoe kleiner,

terwyl die kroeë en klubs al groter word?

Die keuse is joune en joune alleen.
Mag God jou bewaar en jou seën.

Afkondiging: Erediens

Dink hieroor: Ses eenvoudige maniere om gelukkiger te leef

Vul jou hart met vergifnis.

Moenie tob oor die verlede nie.

Vee bekommernis uit jou gedagtes.

Leef eenvoudig.

Gee meer.

Verwag minder. 

Afkondiging: Tabita se lepeltjie-aand

Psalm 23 soos deur Lina Spies verwoord

1. Die Here is my herder en bewaarder:
ek kom niks kort nie; daar is niks wat my ontbreek.
In groene weiveld en by stille water
laat Hy my uitrus in ‘n bar en dorre streek.
Die steiltes ken Hy en die skerpste draaie:
Hy rig my altyd op die regte paaie.

2. Nie een sal U ooit van u skaap berowe:
U is by my in diep en donker klowe.
Wanneer ek afdwaal, haak u staf my nader
en met u stok verdryf U die gevare.
By U is ek beveilig en geborge:
Bevry is ek van vrese en van sorge.

3. U dek in my teenwoordigheid ‘n tafel:
My vyande kyk toe en staan verslae!
U vul my beker, voed my en verheug my;
u goedheid volg my al my lewensdae.
Ek ken u liefde en u gunsbetoning
en bly ‘n leeftyd, Here, in u woning.

[Geleen by Bybelskool klik HIER] 

Verjaardagwense

Chris, verjaardae is vol van gister se herinneringe, vandag se vreugde en blydskap en môre se drome. Mag hierdie spesiale dag vol seëninge wees en met nuwe lewensherinneringe gevul word ...

Afkondiging: Selgroep

Mandjie Hoop: God ken die regte tyd

Net soos die eienaar van 'n vyeboom
die tyd weet wanneer die vye ryp is,
so weet ook God die tyd
om die regverdiges uit hierdie wêreld
weg te roep.

Leo Tolstoi (1828 – 1910)

Verjaardagwense

Johannes, mag die oorvloed van die liefde van Christus al die dae van jou lewe vul. Baie geluk met jou verjaardag. Baie seën vir hierdie spesiale dag.

Gebed: Krag vir vandag

Here, gee ons krag vir vandag,
wees ons opgeeharte genadig.
U weet hoeveel moed dit vat om oor te gee,
U weet alleen waar ons vandaan kom,
hoe swaar ons dra aan alles,
laat moed ons opgee se hand vat
sodat ons saam ‘n nuwe lewe kan begin.
Neem ons vrees en maak ons dapper
sodat ons die lewe kan leef
wat U vir ons beplan het
volgens U wil en vir U.
Help ons asseblief, Here,
niks is by U onmoontlik nie.
Maak ons hart stil
sodat ons U stem kan hoor.
Amen

Afkondiging: Bid saam met ons vir ...

Verjaardagwense

Oom Hennie, mag jou spesiale dag baie geluk, liefde, gesondheid en vreugde vir jou bring. Geniet 'n vreugdevolle dag vol seëninge! Dankie dat jy tannie Rina met ons deel en dankie vir al die kere wat jy vir ons by Sally Aucamp kom help het. 

Met liefde!
Van almal by Sally Aucamp

Wie is Jesus?

• Vir die juwelier is Hy die Kosbare pêrel. 

• Vir die bakker is Hy die Brood van die Lewe.
• Vir die oogarts is Hy die Stralende Oë.
• Vir die dokter is Hy die Groot Geneesheer.
• Vir die bankier is Hy die Kosbare Skat.
• Vir die tuinier is Hy die Herfsroos van Saron en die Lelie van die Velde.
• Vir die koerantman is Hy die Tyding van Groot Blydskap.
• Vir die geoloog is Hy die Ewige Rots.
• Vir die regter is Hy die Waaragtige Getuie.
• Vir die advokaat is Hy die Voorspraak.
• Vir die prisonier is Hy die Verlosser.
• Vir die dorstige is Hy die Fontein van Lewende Water.
• Vir die landbouer is Hy die Ware Wynstok.
• Vir die skaapwagter is Hy die Goeie Herder.
• Vir die sterrekundige is Hy die Blink Môrester.
• Vir die musikant is Hy die Soetste Melodie.

• Vir die kunstenaar is Hy die Lieflikheid self.
• Vir die treurende is Hy die Trooster.
• Vir die sagmoedige is Hy die Prins van Vrede.
• Vir die vermoeide is Hy die Een wat Rus gee.
• Vir die sondaar is Hy die Lam van God wat die sonde van die wêreld wegneem.

Vir elkeen van ons is Hy die Ewige Lewe!!

Mossiestilte: 1 Joh. 1:7b + 3:9

... en die bloed van Jesus Christus, sy Seun, reinig ons van alle sonde

Elkeen wat uit God gebore is, doen geen sonde nie, omdat sy saad in Hom bly; en hy kan nie sondig nie, want hy is uit God gebore.

Lees ook 1 Joh. 1:9

Hoe weet jy dat jy 'n kind van God is; aan die Gees wat Hy ons gegee het. (1 Joh. 3:24b)

Jy is uit God, my kind en het die wêreld oorwin, omdat Hy wat in julle is, groter is as hy wat in die wêreld is. (Joh. 4:4)

Want alles wat uit God gebore is, oorwin die wêreld; en dit is die oorwinning wat die wêreld oorwin het, naamlik ons geloof. (1 Joh 5:4)

Wie anders is dit wat die wêreld oorwin as hy wat glo dat Jesus die Seun van God is? (1 Joh. 5:5)

Dankie, Here, U het my 'n oorwinnaar gemaak deur u genade in my geloof. Ek is nou meer as oorwinnaar deur Christus wat my liefhet (Rom. 8:37). Ek glo in die Seun van God en het die getuienis in myself (1 Joh. 5:10a). En dit is die getuienis: dat God ons die lewe gegee het, en die lewe is sy Seun (1 Joh. 5:11). 

Amen.

[Aangestuur deur Pieter Swanepoel]