Kerkgenotjies: Kerkbasaars

* Soos dit maar gaan met kerkbasaars, het tant Marie se mooi koek wat sy bak platgeval. Daar is nie tyd om 'n nuwe een te bak nie.
Sy prakseer toe 'n toiletrol in die middel van die koek om dit te ondersteun en vul dit toe op met versiersuiker.
Haar plan is toe om dit self te koop by die basaar.
Maar toe sy baie vroeg by die basaar kom, is die koek klaar verkoop!
Dis toe nie die einde van die storie nie.
Toe sy die Maandag by 'n vriendin gaan tee drink, staan die koek op die tafeltjie en wag!
"Wat 'n mooi koek," is al wat tant Marie kan uitkry.
"Dankie," sê die vriendin, "Ek het dit gister gebak ..."

* Oom Koos was baie suinig. En 'n bietjie skelm ook.
Dominee vra 'n bydrae vir die kerkbasaar. 

Oom Koos skryf 'n tjek vir R1000 uit.
Dominee kom later, baie verleë, by oom Koos aan en sê die tjek het teruggekom, gemerk: "Verwys na trekker (VT)."
Oom Koos sê hy is baie jammer en skryf weer ‘n tjek vir R1000 uit.
Dominee bring weer die tjek, weer gemerk: "VT."
Oom Koos sê: "Dominee, ek sê jou wat. Ek sal jou nie weer 'n tjek gee nie, ek gee jou drie skape."
"Baie dankie, Broer," sê Dominee.
Oom Koos vat die skape kerkbasaar toe waar die skape opgeveil word.
Oom Koos koop toe sommer self die skape - en betaal per tjek!